1 مِنْ يَحَيَ، مَوْطٛ ندٜرْ کَوْتَلْ تٛکُّٻٜ يٜىٰسُ، اٜ مِ وِنْدَنْمَا طٜرٜوٛلْ نغٛعٛلْ غَايُسْ غِطَاطٛ اَمْ مٛ نغِطُمِ اٜ غٛونغَ؞

2 غِطٛ اَمْ، اٜ مِ وَطَنْمَا دٛعَارٜ کٛو طُمٜ يَحَنْمَا بٛطُّمْ کٜٻَا نجَمُ ٻَنْدُ، نٛنْ نٛ اَنْدِرْمِ سُمْڤٛ مَاطَ اٜ اَللَّه اٜ يَحَ بٛطُّمْ؞ 3 مِ نَنِي بٜلْطُمْ نَاع سٜطَّ شَرٜلْ کٛ وٛٻّٜ تٛکُّٻٜ يٜىٰسُ نغَرِ کٛکِّيَمْ حَبَرُ نٛ تٛکِّرْطَا غٛونغَ اٜ نٛ کُوتِنِرْتَاکَ؞ 4 وَلَا کٛ ٻُرِ وٜلْنَنْکِيَمْ ٻٜرْندٜ بٛ مِ نَنَ ٻِٻّٜ اَمْ اٜ تٛکَّ غٛونغَ؞

5 غِطٛ اَمْ غَايُسْ، اَ وَطَ کٛو طُمٜ نٛ حَانِ نغَمْ تٛکُّٻٜ يٜىٰسُ، کٛ ٻُرِ مَا وٛنِ ٻٜ اَ اَنْدَا؞ 6 کَمْٻٜ کٛکِّ حَبَرُ بٛطُّمْ دٛوْ مَاطَ يٜىٰسٛ کَوْتَلْ تٛکُّٻٜ يٜىٰسُ غٛنْٻٜ طٛعٛ دٛوْ يِدّٜ ندٜ نغٛودُطَا؞ اَ وَطَيْ بٛطُّمْ تَا وَطِي کَ وَلُّکِ اِرِ يِمْٻٜ ٻٜنْ طٛنْ ندٜرْ يَادُ مَٻّٜ نٛنْ نٛ حَانِ اَللَّه مَوْنِنِرٜىٰ؞ 7 ٻٜنْ طٛنْ يِمْٻٜ ٻٜ مبُرْتٛيَکٜ نغَمْ وَعَجِنْکِ اَلْمَسِيحُ، طٛنْمَا ٻٜ نجَٻَايِ کٛو طُمٜ تٛ جُنْغٛ ٻٜ تٛکَّايِ يٜىٰسُ؞ 8 نغَمْ نٛنْ اٜ حَانِ مبَلّٜنْ اِرِ مَٻّٜ نغَمْ نغَرْتٜنْ حِغٛوٻٜ ندٜرْ وَعَجِنْکِ غٛونغَ؞

9 مِ وِنْدَنِي کَوْتَلْ تٛکُّٻٜ يٜىٰسُ غٛنْٻٜ تٛ مَاطَ، اَمَّا دِيٛتَارِفِسْ وَݧِي کٛ مبِيمِ نغَمْ اٜ مٛ يِطِ اٛ وَرْتَ مَوْطٛ دٛوْ مٛوطٛنْ؞ 10 نغَمْ نٛنْ تٛ مِ وَرِي، مِ وِعَيْ کٛو طُمٜ کٛ اٛ وَطِ اٜ نجَيْرِ نغَمْ کٛو مٛيٜ اَنْدَ فٜوْرٜ مَاکٛ اٜ مٜتٜمٜتٜىٰجِ طِ اٛ وَطَتَ دٛوْ اَمِنْ؞ ندٜنْ نَاع کَنْجُمْ تَنْ اٛ وَطَتَ؞ حَا اٜ مٛ وَݧَ جَٻَّاکِ تٛکُّٻٜ يٜىٰسُ غَرْٻٜ، طٛنْمَا اٜ مٛ حَطَ وٛٻّٜ نجَٻّٛوٻٜ اٜ مٛ رِيوَ جَٻّٛتٛوٻٜ ٻٜنْ دَغَ ندٜرْ کَوْتَلْ تٛکُّٻٜ يٜىٰسُ؞

11 حِغٛ اَمْ غَايُسْ مٛ نغِطُمِ، تَاع اٜکِّتَ حَلّٜىٰندٜ، اَمَّا اٜکِّتَ نغِکُّ بٛطُّمْ؞ کٛو مٛيٜ غَطٛووٛ کٛ وٛوطِ اٛ ٻِطّٛ اَللَّه؞ کٛو مٛيٜ غَطٛووٛ کٛ حَلِّ اٛ اَنْدَا اَللَّه کٛو سٜطَّ؞

12 کٛو مٛيٜ اٜ مٜتَ فِي بٛطُّمْ دٛوْ دِمِتِيرِيُسْ؞ طٛنْمَا غٛونغَ اٜ حٛورٜ مَاکَ اٜ حٛلَّ کُوطٜ مَاکٛ طٜ بٛطّٜ؞ مِنٛنْ مَا مِنْ شٜيْدَکٜمٛ، ندٜنْ اٛنْ اَنْدِ کٛ مِنْ مبِعِ طُمْ غٛونغَ؞

13 اٜ وٛودِ فِي طُطُّمْ کٛ نغِطُمِ وِعُکِمَ، اَمَّا مِ يِطَا وِنْدُکِطُمْ ندٜرْ طٜرٜوٛلْ؞ 14 اٜ مِ کَمّٛو وَرٛيْکِ تٛ مَاطَ نَاع کٛ نٜىٰٻِ، نغَمْ مٜدّٜنْ حٛنْدُکٛ اٜ حٛنْدُکٛ؞

15 اَللَّه حٛکُّمَا جَمْ؞ حِغٛوٻٜ مٛوطٛنْ غٛنْٻٜ طٛعٛ اٜ کٛوْنُمَا؞ حٛوْنُ کٛو مٛيٜ حِغٛ مٜىٰطٜنْ؞