86
ग्वाहालिया निंतिं प्रार्थना
दाऊदया प्रार्थना
1 हे परमप्रभु,
जिगु प्रार्थना न्यनादिसँ,
अले लिसः बियादिसँ,
छाय्धाःसा जि चीमि
व मगाःमचाःम्ह खः।
2 जितः रक्षा यानादिसँ,
छाय्धाःसा जि
विश्वास याये बहःम्ह खः।
छि जिमि परमेश्वर खः,
उकिं छितः
भरोसा यानाच्वनाम्ह
छिकपिनि दासयात
उद्धार यानादिसँ।
3 हे परमप्रभु,
जितः दया यानादिसँ,
छाय्धाःसा जिं न्हिच्छिं हे
छितः प्रार्थना यानाच्वनागु दु।
4 थः दासयात लय्ताय्कादिसँ।
छाय्धाःसा हे परमप्रभु,
जिं थःगु मन छिपाखे हे ल्ह्वने।
5 हे परमप्रभु,
छि भिंम्ह व क्षमा
बियादीम्ह खः।
अले गुलिसिनं
ग्वाहालिया लागि
छितः इनाप याइ,
इपिं सकसितं
छिं सदां दया माया यानादी।
6 हे परमप्रभु,
जिगु बिन्ति न्यनादिसँ।
ग्वाहालिया लागि यानागु
जिगु प्रार्थना न्यनादिसँ।
7 दुःखया इलय्
जिं छितः प्रार्थना याये,
छाय्धाःसा छिं जितः
लिसः बियादी।
8 हे परमप्रभु,
द्यःत मध्ये छि थें
जाःम्ह सुं मदु,
छिं यानादीगु थें
मेपिं सुनानं याये फइ मखु।
9 हे परमप्रभु,
छिं गुलि जातितय्त दय्कादिल,
इपिं फुक्क वयाः
छितः आराधना याइ।
अले छिगु नांया प्रशंसा याइ।* ८६:९ प्रका १५:४
10 छाय्धाःसा छि तःधंम्ह
व अजूचायापुगु ज्या
यानादीम्ह खः,
छि हे जक परमेश्वर खः।
11 हे परमप्रभु,
जितः छिगु लँपु क्यनादिसँ,
अले जिं दुनुगलंनिसें
छिगु आज्ञा मानय् याये,
छिगु नांया भय कायेत
जिगु मनयात छधी यानादिसँ।
12 हे परमप्रभु, जिमि परमेश्वर,
दुनुगलंनिसें जिं छितः सुभाय् बी,
अले छिगु नांया
प्रशंसा न्ह्याबलें यानाच्वने।
13 छाय्धाःसा जि प्रति
छिगु न्ह्याबलें दयाच्वनिगु
दया माया तःधं,
छिं जितः चिहानं
बचय् यानादीगु दु।
14 हे परमेश्वर,
घमण्डी मनूत जिगु
विरोधय् दंगु दु,
अले दया माया मदुपिं
छपुचः मनूतय्सं
जितः स्यायेत स्वयाच्वंगु दु।
इमिसं छितः वास्ता हे मया।
15 तर परमप्रभु,
छि दया दुम्ह, माया यानादीम्ह
परमेश्वर खः।
छि तंचायेत लिबाकादीम्ह,
सदां दया माया यानादीम्ह
व तसकं
विश्वास याये बहःम्ह खः।
16 जिपाखे लिहां झासँ,
अले जितः दया यानादिसँ,
जि, छिकपिनि दासयात
थःगु बल बियादिसँ,
थः दासीया काय्यात
उद्धार यानादिसँ।
17 हे परमप्रभु,
छिं जितः ग्वाहालि यानादी धइगु
छगू चिं क्यनादिसँ।
अले जितः मयय्कीपिं
थ्व खनाः लज्या चायेमा।
छाय्धाःसा हे परमप्रभु,
छिं जितः
ग्वाहालि बियादीगु दु
अले जितः
ह्यय्कादीगु दु।