1 विश्रामबार वने धुंकाः मरियम मग्‍दलिनी, याकूबया मां मरियम व सलोमीपिं मिलय्‌ जुयाः सीम्‍हय्‌ इलेत वासः न्‍याः वन। 2 आइतबार खुन्‍हु, सुथ न्‍हापां निभाः त्‍वयेवं इपिं चिहानय्‌ स्‍वः वन। 3 इपिं लँय्‌ थथे हा हां वन -- “प्‍वाः तिना तःगु ल्‍वहं सुनां चीका बीगु जुइ?” 4 थथे हा हां इमिसं उखे पाखे थस्‍वःबलय्‌ तग्‍वःगु ल्‍वहं चीका तःगु खन।

5 चिहानय्‌ दुहां वनाः स्‍वःबलय्‌ अन तुयुगु वसतं पुना च्‍वंम्‍ह मनू छम्‍ह जवय्‌ पाखे दनाच्‍वंगु खनाः इपिं अजू चाल। 6 वं इमित धाल -- “ग्‍याये मते। छिपिं क्रूसय्‌ यख्‍खाना तःम्‍ह नासरतयाम्‍ह येशूयात स्‍वःवयाच्‍वनागु मखु ला? वय्‌कः ला थन मदी। वय्‌कः म्‍वाना वये धुंकल। स्‍व, थ्‍व हे थासय्‌ मखु ला, इमिसं वय्‌कःयागु सीम्‍ह तयातःगु? 7 आः वनाः छिमिसं चेलातय्‌त व पत्रुसयात थथे धया ब्‍यु -- ‘वय्‌कः छिपिं स्‍वयाः न्‍हापां गालीलय्‌ थ्‍यंकादी। वय्‌कलं धयादी थें छिमिसं वय्‌कःयात अन हे खनी।’ ”* १६:७ मत्ती २६:३२; मर्क १४:२८

8 थ्‍व न्‍यनेवं इपिं ग्‍यानाः व अजूचायाः चिहानं बिस्‍युं वन। थ्‍व खँ इमिसं सुयातं मकं, छाय्‌धाःसा इपिं तसकं ग्‍यात।

9 येशू सिनाः हानं म्‍वाना वये धुंकाः आइतबार सुथ न्‍हापां मरियम मग्‍दलिनीयाथाय्‌ खने दत। वय्‌कलं थ्‍व हे मरियमयागु म्‍हं न्‍हय्‌म्‍ह भूततय्‌त पिछ्वयादीगु खः।† १६:९ गुलिं गुलिं हस्‍तलिपिइ मर्कूस १६:९-२० मदु 10 वं वनाः नुगः मछिंकाः ख्‍वया च्‍वंपिं येशूया चेलातय्‌त थ्‍व खँ कन। 11 म्‍वाना वःम्‍ह येशूयात वं खन धकाः धाःगु खँय्‌ इमिसं विश्वास मयाः।

12 थनं लिपा इपिं मध्‍ये निम्‍ह चेला गामय्‌ वना च्‍वंबलय्‌ वय्‌कः मेगु हे रूप कयाः इमिगु न्‍ह्यःने खनेदय्‌कः झाल। 13 थुमिसं नं वयाः मेपिं चेलातय्‌त थ्‍व खँ कन। थुमिगु खँय्‌ नं इमिसं विश्वास मयाः।

14 लिपा झिंछम्‍ह चेलातय्‌ नया च्‍वंबलय्‌ येशू इमिथाय्‌ झायाः इमिसं विश्वास मयाःगु व इमिगु नुगः छाःगुलिं ब्‍वः बियादिल, छाय्‌धाःसा वय्‌कः म्‍वाना वये धुंकाः वय्‌कःयात खंपिन्‍सं धाः वःगु खँय्‌ इमिसं विश्वास मयाः।

15 अले इमित धयादिल -- “सारा संसारय्‌ वनाः छिमिसं फुक्‍क मनूतय्‌त भिंगु खँ न्‍यंकि।* १६:१५ प्रे १:८ 16 विश्वास यानाः बप्‍तिस्‍मा काःम्‍ह बचय्‌ जुइ, विश्वास मयाःपिं दोषी ठहरय्‌ जुइ। 17 जितः विश्वास याःपिन्‍के थ्‍व चिं दइ -- जिगु नामं इमिसं भूततय्‌त पितिनाछ्वइ, न्‍हू न्‍हूगु भासं नवाइ, 18 ताहायात ज्‍वनी, छुं जुयाः बिष हे त्‍वंसां इपिं सी मखु, उसाँय्‌ मदुपिनिगु छेनय्‌ ल्‍हाः तयाः ल्‍वय्‌ लाय्‌का बी।”

19 थथे इपिं नाप खँ ल्‍हाये धुंकाः प्रभु येशूयात स्‍वर्गय्‌ थत यंकल। अले वय्‌कः परमेश्वरयागु जवय्‌ च्‍वनादिल।* १६:१९ प्रे १:९-११ 20 लिपा चेलातय्‌सं फुक्‍कभनं वनाः भिंगु खँ न्‍यंका जुल। प्रभु थःनं इपिं नाप जुयाः इमिगु ज्‍याय्‌ ग्‍वाहालि यानादिल। अजूचायापुगु चिं क्‍यनाः इमिसं न्‍यंकाजूगु खँयागु दसि बियादिल। आमेन।