1 Zezì edecheekeè ts'ǫ̀ hadı, “Dǫ t'asìı t'à hołı̨ı̨ hogehtsı̨ı̨ sìı hotıì hagode ha t'ıį̀t'e. Hanìkò amìı wets'ıhɂǫ̀ agot'ı̨ı̨ sìı wegha hoìla ha hǫt'e. 2 Eyı dǫ hojıı hohtsı̨ ch'à wek'o k'e kwe nedàa wexeetł'ı̨ gà tègı̨ı̨xà nı̨dè wegha denahk'e nezı̨ ha hǫt'e. Hawììdlà nı̨dè wets'ıhɂǫ̀ dıı chekoa nechà-lea lanıı hołı̨ı̨ hogehtsı̨ ha nıìle. 3 Eyıt'à hotıì edexoahdı.

“Nèot'ı̨ hołı̨ı̨ hohtsı̨ nı̨dè nàweahɂǫ. Edek'eelı̨ nı̨dè weghǫ nahoahłe. 4 Įłè dzęę̀ łǫ̀hdı̨ eht'aà naxık'èch'a hohtsı̨ eyıts'ǫ łǫ̀hdı̨ eht'aà ‘edek'eehłı̨,’ naxèhdı nı̨dè weghǫ nahoahłe,” Zezì gòhdı.

5 Wecheekeèdeè Zezì ts'ǫ̀ hagedı, “Denahk'e goınì nàtsoò agoı̨le,” gıìhdı.

6 Zezì gots'ǫ̀ hadı, “Hòtł'ò-lea kò naxıgha ehkw'ı-ahodı nı̨dè, dıı ts'ı nàı̨ɂaa sìı wets'ǫ̀ dıı haahdı ha dìì-le, ‘Nexochı̨į̀ t'à xàdı̨ı̨hdlà gà tèe ts'ǫ̀ adı̨ı̨le,’ wèahdı nı̨dè naxık'èı̨t'e ha ne,” gòhdı.

7 “Dǫ ı̨łè wecheekeè gǫ̀hłı̨ nı̨dè yegha dèè k'e eghàlaeda, hanì-le-ı̨dè yegha sahzǫ̀ą k'èdì. Wecheekeè eghàlaeda gots'ǫ nǫ̀ǫtła nı̨dè ‘Hot'eè jǫ wheęda gà shèı̨tı̨,’ edecheekeè ts'ǫ̀ hadı ha nì? Į̀le, hadı ha nıìle. 8 Dıı hayèhdı ha, ‘Segha bò xàı̨ht'è, shèhtı̨ gots'ǫ̀ naąɂı̨, eyı tł'axǫǫ̀-ı̨dè nı̨ shèwęętı̨ nǫǫ̀,’ yèhdı ha. 9 Wets'ǫ̀ k'àowo ayìı ts'ǫ̀ yehɂaa sìı yeghàlaı̨dà k'èxa masì yèhdı ha nì? Į̀le, hayèhdı ha nıìle. 10 Eyıt'à naxı̨ sı ayìı ts'ǫ̀ naxegehɂaa sìı hazǫǫ̀ weghàlaahdà nı̨dè, dıı haahdı ha hǫt'e, ‘T'asìı ats'ı̨ı̨t'e nıìle, ekìı goılaà zǫ ghàlats'ı̨ı̨dà,’ dahdı ha hǫt'e,” Zezì hadıì goxè godo.

11 Įłàà Zezì kǫ̀ta Jerusalem ts'ǫ̀ èhtła, Samarıa nèk'e eyıts'ǫ Galılee nèk'e wege dèè k'e naèhtła. 12 Kǫ̀ta ı̨łè ts'ǫ̀ nıwà-lea nììtła ekò dǫ hoònǫ gıkwǫ̀ tàda t'à eyagı̨ı̨lı̨ı̨ sìı Zezì ghǫ nègı̨ı̨de. Įłaà nıwà nàgeèhza et'ıì, 13 Zezì ts'ǫ̀ hòtł'ò gezeh, “Gots'ǫ̀ K'àowo Zezì etegòı̨hɂı̨!” gedı.

14 Zezì goaɂı̨ ekò hagòhdı, “Naxık'ahoeta gha yahtıı gıts'ǫ̀ aahdè,” gòhdı. Yahtıı ts'ǫ̀ geède ekò hazǫǫ̀ gıgha k'aàt'ıì agejà.

15 Dǫ ı̨łè k'aàt'ıì ajà yek'èhoèhzà-tıì ek'èt'à naèhtła. Wınà t'à hòtł'ò Nǫ̀htsı̨ ghàsǫedı. 16 Eyı dǫ Zezì gà dèè k'e ts'ǫ̀ adį̀į̀là xè “Masì,” yèhdı. Eyı dǫ sìı Samarıa got'ı̨į̀ at'ı̨ nǫǫ̀.

17 Zezì hayèhdı, “Dǫ hoònǫ k'aàt'ıì agejà-le nì? Ekò dǫ łǫǫ̀tǫ gılaedì?” yèhdı. 18 Eyıt'à Zezì edecheekeè ts'ǫ̀ hadı, “Dıı eładı̨ gots'ǫ dǫ dànìghǫ ededı̨ zǫ Nǫ̀htsı̨ ghǫ masì nıwǫ t'à ek'èt'à naèhtła?” gòhdı. 19 Eyıt'à Zezì eyı dǫ ts'ǫ̀ hadı, “Nıį̀tła, nekǫ̀ ts'ǫ̀ naı̨tłe. Negha ehkw'ı-ahodı t'à k'aàt'ıì anejà,” yèhdı.

20 Įłàà Pharısee gı̨ı̨lı̨ı̨ sìı Zezì dageehke, “Dàht'e-ı̨dè Nǫ̀htsı̨ Wenàowoò k'ę̀ę̀ hòɂǫ agode ha?” gıìhdı. Zezì gots'ǫ̀ hadı, “Nǫ̀htsı̨ Wenàowoò k'ę̀ę̀ hòɂǫǫ sìı wexàts'eeta t'à wegots'ìhɂà ha nıìle 21 eyıts'ǫ ‘Jǫ agǫ̀ht'e,’ hanì-le-ı̨dè ‘Yeè agǫ̀ht'e,’ dǫ hagedı ha dìì, Nǫ̀htsı̨ Wenàowoò sìı naxıts'ǫ̀-èlı̨ ne t'à,” gòhdı.

22 Eyı tł'axǫǫ̀ edecheekeè ts'ǫ̀ hadı, “Nǫǫde-ı̨dè Dǫ-wet'àaɂàa-deè K'àowocho elı̨ı̨ weahɂį̀ dahwhǫ ha, hanìkò naxıxè hagode ha nıìle. 23 Eyıts'ǫ dǫ naxıts'ǫ̀ dıı hagedı ha, ‘Jǫ wheda,’ hanì-le-ı̨dè ‘Yeè wheda,’ gedı ha. Hanìkò gık'èhoahɂà-le, ekǫ ts'ǫ̀ wekak'eaht'į̀-le. 24 Dǫ-wet'àaɂàa-deè jǫ ts'ǫ̀ anajà nı̨dè hǫtsaa kǫ̀-naìtł'ı̨ı̨ lanì wègoèt'į̀ ha. Kǫ̀-naìtł'ı̨ nı̨dè yat'a hazǫǫ̀ dzęh agot'į̀; jǫ nììtła nı̨dè eyı lagode ha. 25 Hanìkò eyı hagode kwe sìı Dǫ-wet'àaɂàa-deè hòtł'ò daı̨ɂa ha, eyıts'ǫ dıì dǫ geedaa sìı gıgha wedę ha.

26 “T'akwe Noah dıı nèk'e nàı̨dè ekò dànì dǫ gı̨ı̨dàa sìı Dǫ-wet'àaɂàa-deè nììtła nı̨dè eyı xèht'eè lagode ha. 27 Noah elàcho yìetłaa dzęę̀ k'e gots'ǫ̀ dǫ shègezhe, gedǫ, eyıts'ǫ ełexè honìgedè ı̨lè. Hǫtsaa gıxè dèè te teètł'ı t'à dǫ hazǫǫ̀ ełaàgı̨ı̨dè.

28 “Eyıts'ǫ (Abraham wesah) Lot dıı nèk'e nàı̨dè ekò ekìıyeè k'e sı hagǫ̀ht'e ı̨lè. Dǫ shègezhe, gedǫ, t'asìı ełeghǫ nàgeehdì, eyıts'ǫ t'asìı geehshe, eyıts'ǫ kǫ̀ gogehtsı̨ ı̨lè. 29 Hanìkò Lot, kǫ̀ta Sodom gots'ǫ nakwı̨èhtłaa dzęę̀ k'e yak'e gots'ǫ kwe dèk'ǫ̀ǫ hodàètł'ı t'à dǫ hazǫǫ̀ ełaàgı̨ı̨dè ı̨lè.

30 “Dǫ-wet'àaɂàa-deè wègoèt'į̀ı̨ dzęę̀ k'e nı̨dè hotıì eyı lagode ha hǫt'e. 31 Eyı dzęę̀ k'e dǫ edekǫ̀ dahmò ka wheda nı̨dè wekǫ̀ goyìı t'asìı whelaa ts'ǫ̀ hodàwetła-le. Eyıts'ǫ dǫ ededèè k'e eghàlaeda nı̨dè t'asìı wı̨ı̨zìı gha edekǫ̀ nǫǫ̀wetła-le. 32 Lot wets'èkeè wexè dàgòjàa sìı hotıì wenaahdì! 33 Amìı edınì k'ę̀ę̀ eda ha nıwǫǫ sìı wedıhołè ha, hanìkò amìı edınì k'ę̀ę̀ eda-le sìı edaxàweetè ha hǫt'e. 34 Ehkw'ı anaxèehsı̨, eyı toò k'e dǫ nàke daèhte k'e whetee sìı ı̨łè nıwıìtè ha, eyıts'ǫ ı̨łè aìda ha. 35-36 Eyıts'ǫ ts'èko nàke ełexè łè nàgeedee sìı ı̨łè nıwıìtè ha, eyıts'ǫ ı̨łè aìda ha,” Zezì gòhdı.

37 Wecheekeè Zezì dageehke, “K'àowo, edı̨į̀ hagode ha?” gıìhdı.

Zezì hagòhdı, “Edı̨į̀ t'asìıweè whedaa sìı ekǫ tatsǫ̀gaà łǫ ełègehdè hǫt'e,” gòhdı.