1 Ǫhdah ekǫ-le hòèhtsı̨ nı̨dè yatı nàtsoo t'à wets'ǫ̀ goı̨de-le, hanìkò netà ts'ǫ̀ goı̨de lanì weghǫnàdaı̨tì. Eyıts'ǫ cheko sìı nechı lanì gıts'ǫ̀ k'ehoı̨ɂa. 2 Ts'èko ǫhdaà sìı nemǫ lagı̨ı̨hwhǫ, eyıts'ǫ t'eeko sı nedè lagı̨ı̨hwhǫ; gıts'ǫ̀ nınì-jıı welè-le.

3 Ts'èko gıdǫǫ̀ ełaı̨dèe sìı gık'èdì whìle nı̨dè hotıì nezı̨į̀ gıts'àądı. 4 Ekò gıza eyıts'ǫ gıchaà gǫ̀hłı̨ nı̨dè ededı̨ t'akwełǫ̀ǫ̀ edèot'ı̨ ts'àgedı ha hoghàdegııtǫ. Gıgha ehkw'ı-ahodı k'ę̀ę̀ edèot'ı̨ k'ègedì ha hǫt'e. Edèot'ı̨ ts'ǫ̀ hanì geeda nı̨dè ek'èt'à t'asìı goghǫ̀gele lanì ha hǫt'e, eyıts'ǫ Nǫ̀htsı̨ eyı ghǫ sìghà anıwǫ hǫt'e. 5 Ts'èko gıdǫǫ̀ ełaı̨dèe, sıì etegeèt'ı̨ı̨ xè dǫ wı̨ı̨zìı gok'èdì-le sìı hotıì Nǫ̀htsı̨ ghǫ hòtł'ò agı̨ı̨wǫ ha hǫt'e. Nǫ̀htsı̨ gots'àdı gha toò, dzęę̀ ehk'ę̀ę̀ t'aats'ǫǫ̀ Nǫ̀htsı̨ ts'ǫ̀ yagehtı welì. 6 Hanìkò ts'èko gıdǫǫ̀ ełaı̨dèe sìı sìgoèt'ı̨ı̨ zǫ gı̨ı̨wǫ nı̨dè, ı̨łaà geeda et'ıì dǫ ełaı̨dèe lagı̨ı̨t'e. 7 Dıı yatı wet'à ts'eedaa sìı dǫ gıghàı̨ɂà, hanì-ı̨dè dǫ wı̨ı̨zìı gok'e nìdahogeeɂà ha-le. 8 Dǫ edèot'ı̨ ts'àgedı-le, xàè edèot'ı̨ gots'àgedı-le nı̨dè ayìı wegha ehkw'ı-ahodıı sìı k'ę̀ę̀ eda nıìle. Dǫ wegha ehkw'ı-ahodı-le nahk'e ekǫ-le hòèhtsı̨ hǫt'e.

9 Ts'èko gıdǫǫ̀ ełaı̨dèe eyıts'ǫ ek'ètaènǫ daats'ǫ̀ gıghoò sìı ededı̨ zǫ gıızì dek'eèhtł'è aahłe. Gıdǫǫ̀ ı̨łè zǫ gòı̨lèe xè ededǫǫ̀ xè ehkw'ı gı̨ı̨dà nı̨dè, 10 eyıts'ǫ dǫ ts'ǫ̀ nezı̨į̀ eghàlageeda gha gık'èhoedzǫ nı̨dè, nezı̨į̀ chekoa geèhsǫ nı̨dè, wekǫ̀ dǫ gha enìxànı̨ı̨tǫ nı̨dè, gıdzeè nezı̨ı̨ xè Nǫ̀htsı̨ wets'ǫ dǫ gha eghàlageeda nı̨dè, dǫ gıgha hoìlaa sìı ts'àgedıı, eyıts'ǫ gınì nàtso xè t'aats'ǫǫ̀ dǫ ts'ǫ̀ nezı̨į̀ eghàlageeda nı̨dè, gıızì dek'eèhtł'è ha hǫt'e.

11 Ekò ts'èko ı̨łaà gıghoò łǫ-le et'ıì gıdǫǫ̀ ełaı̨dèe sìı gıts'àahdı gha gıızì dek'enèahtł'è-le. Zezì-Krı ts'ǫ̀ yatı nàtsoo gèhtsı̨ sǫnı kò nǫǫde nı̨dè dǫzhìı gı̨ı̨wǫǫ̀ agede ha eyıts'ǫ honìgedè gı̨ı̨wǫ ha sǫnı. 12 Hagejà nı̨dè Zezì ghàyatıgı̨ı̨ɂǫǫ sìı nàgı̨ı̨zhì t'à gısınìyaetıì adegììdlà hǫt'e. 13 Zezì ts'ǫ̀ edeyatıì k'egı̨ı̨zhì wedaats'ǫ̀ gots'egeedì agede ha sǫnı, eyıt'à ekìı kǫ̀ta k'egedè agede ha. Gots'egeedì agede wedaats'ǫ̀ yatıts'ıì kǫ̀ta k'egeɂa xè t'asìı gı̨į̀dı-le sìı ghǫ gogedeè agede ha, eyıts'ǫ t'asìı gıghǫ gode ha-le sìı ghǫ gogedeè agede ha. 14 Eyıt'à ts'èko gıghoò łǫ-le et'ıì gıdǫǫ̀ ełaı̨dèe sìı honìgııdè kò dehwhǫ hǫt'e. Gıza gǫ̀hłı̨ xè edekǫ̀ k'ègedì kò eyı denahk'e gıgha nezı̨ hǫt'e. Hanì-ı̨dè wehłı̨ı̨ goızì jıı ehtsı̨ ha gıghàhòɂà ha-le. 15 Dǫ mǫ̀hdaa sìı hòt'a gıgha ehkw'ı-ahodı-le agejà, eyıts'ǫ wehłı̨ı̨ nàowoò k'ę̀ę̀ geedaà agejà.

16 Ts'èko wegha ehkw'ı-ahodıı sìı wèot'ı̨ gıta ts'èko gıdǫǫ̀ ełaı̨dèe gǫ̀hłı̨ nı̨dè, gıts'àdı ha hǫt'e. Hanì-ı̨dè Nǫ̀htsı̨ wecheekeè deɂǫ̀ǫ̀ gıts'ǫ̀ hoèlı̨ ha-le, ts'èko sıì gıts'àwedì whìle sìı ts'àgedı ha dìì-le.

17 Nǫ̀htsı̨ wecheekeè gha k'aodèe gı̨ı̨lı̨ı̨ sìı nezı̨į̀ edılaà eghàlageedaa k'èxa nezı̨į̀ gıts'ǫ̀ nageɂa welì. Dǫ Nǫ̀htsı̨ yatıì t'à gogedee xè dǫ hoghàgogeehtǫǫ sìı wek'èxa denahk'e hanì nezı̨į̀ gıts'ǫ̀ nageɂa welì. 18 Nǫ̀htsı̨ Nı̨htł'è k'e dıı hanì dek'eèhtł'è: “Ejıe tł'olà tàtsǫyeèhɂe nı̨dè shètı̨ ch'à wewà xèɂehchıì aahłe ha-le,” dek'eèhtł'è. Eyıts'ǫ dıı hanì dek'eèhtł'è: “Dǫ eghàlaedaa sìı wek'èxa wets'àɂeedì ha hǫt'e,” dek'eèhtł'è. 19 Dǫ ı̨łè zǫ weyatıì k'e naxıgha k'àowo k'e nìdahoet'à nı̨dè wǫǫ̀hkw'ǫ-le. Dǫ nàke, hanì-le-ı̨dè dǫ taı gıdaà ekǫ-le eghàlaı̨dà gedı nı̨dè zǫ gı̨į̀kw'ǫ ha. 20 Hołı̨ı̨ hòèhtsı̨ nı̨dè dǫ hazǫǫ̀ gınadąą̀ eyı ghǫ wets'ǫ̀ goahde ha. Hanì-ı̨dè dǫ gıgha ehkw'ı-ahodıı sìı hołı̨ı̨ hogehtsı̨ ch'à edexogııhdı ha.

21 Nǫ̀htsı̨ eyıts'ǫ Zezì-Krı gınadąą̀, eyıts'ǫ yak'eet'ı̨į̀ gììchìı sìı gınadąą̀ dıı yatı nàtsoo neghàehɂǫ: Dǫ hazǫǫ̀ eyı nàowo ełèht'eè k'ę̀ę̀ gısınìyaı̨htı ha hǫt'e, eyıts'ǫ dǫ wı̨ı̨zìı denahk'e nezı̨į̀ wets'ǫ̀ k'ehoı̨ɂa ha-le.

22 Nǫ̀htsı̨ la eghàlageeda gha dǫ k'eèyatıı sìı ekòet'ıì nılà gık'e anele-le. Hanejà nı̨dè gıhołı̨į̀ k'ę̀ę̀ eghàlaı̨daà anede ha sǫnı. Hołı̨ı̨ nàowoò ch'à edek'ènedì.

23 Gǫı̨tłǫǫ̀ nebò t'à eyanelè t'à tı zǫ nedǫ-le, hanìkò jìetì łǫ-lea nedǫ.

24 Hołı̨ı̨ hogehtsı̨ gha sìı, dǫ mǫ̀hdaa gıhołı̨į̀ hoɂıì wègaat'ı̨, gıhołı̨į̀ gınakweè wek'èhoedzǫ. Ekò dǫ mǫ̀hdaa sìı gıhołı̨į̀ ekòet'ıì wègaat'ı̨-le t'à nǫǫde nı̨dè wek'èhoedzǫ hǫt'e. 25 Eyı xèht'eè, Nǫ̀htsı̨ gha nezı̨į̀ eghàlats'ı̨ı̨dà nı̨dè hoɂıì wègaat'ı̨ ha hǫt'e, ekò goılaà mǫ̀hdaa hoɂıì wègaat'ı̨-le kò wek'èhoedzǫǫ̀ adle ha hǫt'e.