1 Tenang niiꞌning nantoong Jiisuuꞌanko porora nauaama aaꞌpauꞌ, “Pailatiꞌke piatooronuka˜ botovurioꞌ niiꞌning Kaaleliꞌnupoong boontunang nkoari otoko dupisiꞌaarioꞌ ereng biikaning boontunang-kooning ereng ninka pitu-antavaaring.”

2 Eeꞌnoko Jiisuuꞌke aaꞌpuruꞌ, “Diiꞌke eeꞌ noruꞌeriaukaꞌ: teing teeꞌ boorouꞌning kapooꞌ orara makensiꞌning diiꞌ otoꞌderuiaing-pinaꞌ oroꞌ otoko Kumponinge Roomaꞌnupoong tauraꞌpuruꞌ teing Kaaleliꞌnupoong dupisiꞌkoo. 3 Otoaꞌ, teeꞌ deeaꞌ. Teka diiꞌ teeꞌ nariꞌ paaꞌdariaininge bereꞌdariaukaꞌning deekoꞌ. 4 Aiꞌ eeꞌ noruꞌerimang teing nanaiꞌketa ˜beenaumo-taa [18] pava deto isikava dau duaꞌarara tavuruꞌning bakei oreng masikeng niiꞌning Jerusalemaꞌnupoong divuꞌaari otong? 5 A, otoaꞌ, teeꞌ naurampimang. Diiꞌ teeꞌ nariꞌ paaꞌdariaininge bereꞌdariaukaꞌning deekoꞌ.”

6 Eeꞌnoko teie aung dikitoꞌ nauvuruꞌ, “Narung naninge koiꞌ piikiꞌ keempuuꞌnung bakanooꞌ uaininau-koo, eeꞌnoko niiꞌnaꞌmung sinang kavuꞌkoo pouꞌnung tevari-koo, teka oovuaꞌ. 7 Eeꞌnoko teie uaininau tanata nauvuma aaꞌpuuꞌ, ‘Aung ee, aing beenaumo mareꞌkoo ning sinang kavuꞌkoo momaung avari-koo piikiꞌnavari-koo, teka sinang ooampaung ninge. Nokieaing tevari tamung kansiꞌ orarivumatoꞌneenga.’ 8 Eeꞌnoko teie makuꞌuma aaꞌpuuꞌ, ‘Ovorooꞌ ee, sipeioꞌ amareꞌ iroꞌ otoai napoꞌ bera okoraꞌ nenkeꞌamira kansiꞌ pankauang sipampaing. 9 Daunamareꞌkoo sinang biꞌuaing deekoꞌ tampaꞌ masikaꞌ, teka biꞌuaruko deekoꞌ nokieaing.’ ”

10 Teketa niiꞌnaꞌmung Doong Uaanaꞌmung, nau-antavarakoꞌnung pava dootuuꞌnanka-koo niiꞌnava-koo. 11 Teke nani maꞌnaange siipa-antavukoꞌnani otokoꞌ mareꞌ kivora-ita ˜beemareꞌpi-taa-koo [18], kaiꞌaritaaꞌ baka deto koompari donkong-koo makotuarukoꞌ. 12 Eeꞌnoko tenang Jiisuuꞌke oovura teni, teie bokuvuko uroꞌke poko aaꞌpuuꞌ, “Ani ee, daꞌ unaaroinani dakaang siipa-ita.” 13 Eeꞌnoko teie bakaang bireng panteꞌuuꞌ teni-koo dau eeꞌnoko tenang namuꞌke teni koomparuꞌ. Eeꞌnoko tenie Kumponing daangampuuꞌ.

14 Teka Jiisuuꞌke Doong Uaanaꞌmung-koo taare-anta nkovuuꞌnung-koo teie pava dootuuꞌnava tanatavukoꞌnunge iiravoma eeꞌ minkuvuruꞌ teing nantoong, “˜Naꞌmung-taa doong otong nko-nko nko-kooning. Teing-koo doonko porira taare-anta nkaveriaing, Doong Uaanaꞌmung-koo deeaꞌ.” 15 Teketa Ovoringe makuꞌuma aaꞌpuuꞌ tee, “Daꞌ ampirinung˜, diiꞌkoo ee narunge teꞌmung Doong Uaanaꞌmung bakaang boromakaꞌ niiꞌnaꞌ doonkiiꞌ dapaꞌuma biꞌari otomanooꞌketa barampui beaung ntong nai-anta-koo? 16 Eeꞌnoko teeꞌ makosi deekoꞌ, aming-koo ani manikuma Eebaraamiꞌ baurang makosi deeaꞌ Doong Uaanaꞌmung-koo unaa-anta-koo, Sietaniꞌke daiꞌuuꞌnani booniꞌantavuma teing-koo mareꞌ kivora-ita ˜beemareꞌpi-taa-koo?”

17 Teeꞌ minkuvura teing bakaning tooꞌde-nupoong maiaꞌantavuruꞌ eeꞌnoko ookara nantoong dotuariruꞌ ookara kapooꞌ nepuꞌnaꞌ nkovuuꞌning-koo teie.

18 Napoꞌ niiꞌnaꞌ Jiisuuꞌke eeꞌ minkuvuuꞌ, “Kumponing bakaang muuꞌ aming-pinaꞌ oroꞌ? Aminge pa paara-antavampeuꞌ tee? 19 Tee aaꞌ sinanu okiꞌnu-pinaꞌ oroꞌ masitaraꞌkoonu naninge nkavura mintoong-koo keempuuꞌnu, eeꞌnoko dupura koiꞌ pankavari deemparuꞌ, eeꞌnoko barennankai bitonanka kaniauꞌ kaumpeꞌnanka-koo.”

20 Eeꞌnoko napoꞌ aaꞌpuuꞌ, “Kumponing bakaang muuꞌ aminge pa paara-antavampeuꞌ tee? 21 Tee aaꞌ tee teu-pinaꞌ parauanu naakoꞌniiꞌnu iisi-poꞌnu-pinaꞌ naninge manikumai nkavura paraua diisi beerentuꞌkoo maantoꞌura naroꞌka bereꞌuko bera teue ookara pangapangavopeuꞌ.”

22 Teketa tee tenkenura Jiisuuꞌ nanuuꞌnung Jerusalemaꞌaape osi pankeng eeꞌnoko okiꞌnarekaꞌ beeroꞌui nau-antavurima. 23 Eeꞌnoko niiꞌninge aaꞌpauꞌ tee, “Ovoring, teing ee mooꞌariaining okiꞌning?” Eeꞌnoko teie aaꞌpuruꞌ teing, 24 “Muuꞌ paninung-koo tuntoma teꞌ ito-navarong. Teke tevaronge aaꞌnaꞌ purintariri paararariaing tung-koo avutevuꞌdariaꞌ, aming-koo, nnaꞌ teing karinga avitoitoi miruꞌarima paaravariaining makosiaavaukaꞌnung. 25 Tenang namuꞌke pava okonarai iꞌamparara karanaang pinkaꞌuko diiꞌ tee damaꞌdue donkoniri otoriaing kopikopiꞌerima teꞌ karanaang, aaꞌperima, ‘Ovoring, daateꞌmeriai.’ Eeꞌnoko teie aaꞌduriaing diiꞌ, ‘Ninge diiꞌ noruꞌdampiaꞌ areketa porininge.’ 26 Tenang diiꞌke aaꞌperiaing, ‘Niiꞌ aaꞌ daꞌ ninka nariꞌ taamanampima tuaamarikoꞌning, eeꞌnoko daꞌ niikaning osinanka-koo nau-antararakoꞌ.’ 27 Teka teie aaꞌduriaing, ‘Ninge naurampimang diiꞌ noruꞌdampiaꞌ, areꞌnupoonge. Tokoi beriaing ning-ankoita diiꞌ orakaꞌ nkorarimaing.’

28 “Teke eeꞌnooꞌke damaꞌdu otoritaaꞌ birontariai siꞌdaꞌ kakirinkurarima sisikeera-koo otori, aaꞌning oovererima: Eebaraamiꞌ, Aisakeꞌ, Jeekopiꞌ eeꞌnoko teing ookara Kumponing bakaning nakaro-nupoong teka muuꞌ Kumponing bakanooꞌka. 29 Eeꞌnoko nantoong aaꞌning-eta poroaining teke muuꞌ Kumponing bakanooꞌke nariꞌ taamanaavaing: duaaꞌ pomanooꞌ, tumparamanooꞌ, eeꞌdoompeto eeꞌnoko eeꞌdepeto. 30 Ee aing, niiꞌning teing enang damaꞌduariri otoroining ureaavaining eeꞌnoko napoꞌ niiꞌning enang ureai otoroining napoꞌ damaꞌduariaing.”

31 Eeꞌnoko tenang tee-koo batei-koo niiꞌning Boto Keperuuꞌnavitu porora aaꞌpauꞌnung Jiisuuꞌ, “Tenkeniai anketa, Eerotiꞌke daꞌ dupisiꞌduuꞌnaang piavomaang.” 32 Eeꞌnoko Jiisuuꞌke aaꞌpuruꞌnung teing, “Berira nauerima tee daang-koong daurarong aaꞌperiaing, ‘Aung ee, Jiisuuꞌke aaꞌpuing, “Ninge aaꞌnomaang: maꞌnari bataꞌaramang, taare-anta nkoamaang-eꞌmung, taneꞌ teeꞌke, eeꞌnoko daunaꞌmung opamaꞌnaang nkaning nko-nko nkoama Kumponinge miruꞌmuuꞌning. 33 Teka eꞌmung, taneꞌ, eeꞌnoko daunaꞌmung nkoampaing teing nkaning nko-nko, bera Jerusalemaꞌke bakeampaing, aiꞌ Kumponing bakaning nakaro-nupoong teing Jerusalemaꞌkoo taapoꞌke booroaung.” ’

34 “Oi bakaꞌ Jerusalemaꞌnupoong, Jerusalemaꞌnupoong, dupisiꞌerererimaing Kumponing bakaning nakaro-nupoong, eeꞌnoko teing diiꞌkoo botovurimaing kapange tooꞌpererima dupisiꞌerererikooꞌ, arekeeꞌning batei-koo ninge diiꞌ naroꞌkoo kariamaung kokoreeꞌke baurukaaꞌ kupaꞌkoo boong naroꞌurimanaꞌ, teka diiꞌ arooꞌdariaung. 35 Aing ee, Kumponinge diikanooꞌ osi siꞌduring diiꞌke diiꞌka tare-koo. Eeꞌnoko naurampimang, diiꞌ teing ning napoꞌ oomeriarooꞌnaang bera tenang batei aaꞌmeriainang, ‘Biraankenung tee naning Ovoring bakaang miring-koo pomaatomaung.’ ”