1 O Anutu, nio aŋtaŋroro u be muŋai yo.

Piŋgis motom pio pepe.

Ŋgun talŋom pa suŋŋana tio ti mi pekel kalŋoŋ.

2 Motom iŋgal yo mi uulu yo.

Pa iŋgi pataŋana boozomen ikam yo ma aŋru zaala,

tana leleŋ ipata kat.

3 Koŋ koi bizin kalŋan izalla,

mi wal sananŋan tiwirri sua pamotoŋana pio mi tikamam pataŋana pio.

Keten malmal pio, mi tiseseeze motoŋ ma aŋsaana kat.

4 Iŋgi aŋbot naala kezeene i.

Tana keteŋ iporrou biibi kat, mi aŋmoto koŋ.

5 Motoŋana biibi ipun yo ma mburoŋ imap,

mi ndoŋdoŋ ikam yo ma aŋsaana kat.

6-7 Tana aŋso ta kembei: “O yalei, begeŋ sa kembei man mbalmbal, so ndabok!

Tonabe aŋrie ma aŋla leŋ lele ta molo kat, mi keteŋ su.

Aŋso aŋla lele bilimŋana,

mi aŋru leŋ muriŋ ambaiŋana sa be aŋbotmbot pa.

8 Ŋonoono kat, begeŋ sa kembei man, so aŋko ma aŋla aŋru leŋ muriŋ sa be aŋbot pa mi aŋsa pataŋana ti ma imap.

Pa iŋgi kembei aŋbot la yaŋ ma miiri biibi leleene.

9 Merere, pambiriizi koŋ koi bizin ma timap kat. Pakankaana sua kizin mi ŋgar sananŋana ta lelen iurur pa.

Pa aŋre mbulu ki malmal ma zigzik ilol kar biibi ti ma imap.

10 Mbeŋ ma aigule mbulu ru tana tiwwa la kar leleene, mi tikamam peeze pa.

Kar ti bok pa mbulu sananŋana mi pataŋana. Tana tomtom tipasaana mboti ki kar ma isaana kat.

11 Mi sombe tilup zin su kar keteene be tiurpe sua, som tikam mburooŋo, na tikototo zin tomtom,

mi tipakamkaam zin bekena tiwatke len koroŋ kizin.

12 Sombe koŋ koi sa ikamam sua repiiliŋana pio, na nio aŋrao aŋbaada pataŋana ta kembei.

Mi sombe tomtom sa ta iurur koi pio na, ikamam be ikoto yo, na toŋgo. Nio aŋrao aŋke pini.

13 Mi som. Ina nu tau.

Nu ta muŋgu aŋre u kembei gaabaŋoŋ mi toroŋ ŋonoono na.

14 Mi kulindi iparrou ti ma taparzzo sua,

mi itiŋan iwal biibi tuzuŋzuŋ lela Urum Merere.

Mi koozi na, nu we koŋ koi. ✡ Mbo 41:9; Yo 13:18+

15 Nio leleŋ be koŋ koi bizin swon imap karau men.

Leleŋ be matan yaryaara mi tisula len Andewa.

Pa lelen na, bok pa mbulu sananŋana, tana itu raama zin.

16 Mi nio na, aŋboobo Anutu be iuulu yo.

Mi Yooba ko ikamke yo.

17 Aigule ta boozomen, aŋtaŋroro i mi aŋzzwe pataŋana tio ilala kini pa mankwoono, aigule, mi mbeŋ.

Mi ni ileŋleŋ kalŋoŋ.

18 Ŋonoono, koŋ koi bizin boozomen tizorzooro yo,

mi tikamam malmal pio.

Tamen Anutu ko itatke yo la naman ma aŋbot ambai.

19 Ni ko ileŋ suŋŋana tio mi ikoto zin.

Pa ta muŋgu mi imar na, ni imbotmbot se muriini peeze kana.

Mi mbulu kini itortooro som.

Tana wal ta so timototo i som, mi tizorzooro la kalŋaana, na ni kola ikoto zin.

20 Tomtom ta muŋgu igabgaaba yo na, ire sua kini mbukŋana kembei koroŋ sorok.

Tanata isu ma itoori mini, mi ikamam malmal pa zin wal ta muŋgu ni ziŋan tiparluplup zin na.

21 Sua kini na, ambaiŋana mi mbuyeeneŋana.

Tamen leleene na, iso ikam malmal.

Kwoono mbesmbeezeŋana.

Tamen sua ta iwedet pa kwoono na, ipasansaana zin tomtom kembei ta buza mataanaŋana.

22 Pataŋana ku ta boozomen na, ur la Yooba namaana.

Ni ko ipombolu mi ikisu.

Pa ni mataana iŋgalŋgal zin wal ndeeŋeŋan.

Irao izem zin ma titop na som. ✡ Mt 6:25+; Lu 12:22+; 1Pe 5:7

23 Tamen wal pakamkaamŋan mi wal ta tikamam zaaba pizin tomtom na,

Anutu, nu ko loŋa yembut swon,

mi giibi zin sula naala ta usomŋana na be tisaana ma tila len kat.

Mi nio, nako aŋpase pu.