1 O Yooba, iŋgi koŋ koi bizin tikamam be tikoto yo. Tana uulu yo mi koto zin.

Zin wal tau tikamam malmal pio i, na itum kam malmal pizin.

2 Kam mburu ku malmal kana ramaki siŋgiao ku,

mi mar ma poroukaala yo.

3 Pas se pa izi ku raama zaaba ku,

mi kas koŋ koi bizin ma timap.

Mi pombol yo ma so yo ta kembei: Nu ulaaŋa tio.

4 Yooba, zin wal ta tisombe tipasaana yo na, koto zin ma mburan imap, mi pamiaŋ zin.

Mi zin ta timbuuru koŋ na, pakankaana zin, mi kam zin ma tikam pirik ma tila len.

5 Aŋela ki Yooba ko iziiri zin ma tiko papirik,

kembei ta miiri iwilaala koroŋ gubungubun ma ila lene.

6 Aŋela tana ko iketo zin.

Mi zin ko tito zaala ta sipirpirŋana i, mi tiwwa pa zugut lene. Tana ko irao tiko na som.

7 Pa nio aŋkam ŋoobo zin som. Tamen zin tiur kilis be tikeene yo,

mi tikel naala ta isula kat be aŋtop sula.

8 Yooba, pamorsop zin mi pambiriizi zin ma tila len.

Kam kilis kizin ma ikeene zitun.

Mi kam zin ma zitun titoptop sula naala kizin ma tisaana kat.

9 Tonabe nio leleŋ ambai kat pa Yooba,

mi menmeen yo pa ulaaŋa kini.

10 Mi aŋso raama mburoŋ, mi ŋgar, mi leleŋ ta kembei:

“Yooba, nu lip kat. Nu kadom tomtom sa som.

Pa zin wal ta len mburan biibi som na, nu tatkewe zin la wal mburanŋan naman.

Mi zin wal sorrokŋan ta kan koi bizin tikototo zin na, nu uluulu zin.” ✡ Kam 9:14

11 Re! Iŋgi tomtom timaŋga mi tiŋgal sua pakaamŋana pio bekena tipasaana yo.

Mi sua ta tiwisese yo pa i, na nio aŋute risa som. ✡ Mt 26:60

12 Mbulu ambaiŋana ta aŋkamam pizin na, zin tipokotkot pa mbulu sananŋana.

Mi timet molo pio, mi tizem yo ma motoŋ monmoondo.

13-14 Mi nio, indeeŋe mete ikam zin na, aŋgun muuŋgu,

mi aŋgalsek ituŋ pa kini kanŋana mi aŋsuŋ pizin.

Tamen suŋŋana tana nu pekel som.

Tana leleŋ ipata kat mi aŋtaŋtaŋ pizin, kembei ta zin toŋmatiziŋ tio ŋonoono, som toroŋ bizin.

Mi aŋtuntuundu pa pai tio ta boozomen, kembei tomtom ta leleene ipata pa meeteŋana ki naana na.

15-16 Tamen indeeŋe pataŋana ikam yo na, zin menmeen zin ma kaipa zin.

Mi tilup zin mi tiru zaala be tipasaana yo.

Wal ta tikamam be tikoto yo i, na nio aŋkankaana pa mbulu ta tikam pio.

Pa iŋgi tinoknok motoŋ seezeŋana. Tizemzem som.

Mi sua repiiliŋana ta tigibgiibi pio i, na ambai som kat.

Mi keten malmal mi tikarrut zurun pio. ✡ Ŋgo 7:54

17 Yooba, parei ta gedgeede zin mi tikamam mbulu tiŋgi pio?

Zin kembei laion ta zoŋon zirzir be tiŋa kan buzur.

Tana tatke yo pizin! Kokena tipasaana yo.

18 Naso leleŋ ambai pu, mi aŋlup raama zin wal ku, mi aŋpakuru.

Mi aŋwit urum isala kor ila iwal biibi matan.

19 Iŋgi koŋ koi bizin tikam ŋoobo yo mi tiur koi pio sorok.

Tana uulu yo lak! Kokena menmeen zin ma tiso tilip pio.

Zin sombe tire yo, na matan repiili yo mi lelen ambai pa pataŋana ta aŋbaada i.

Zem zin ma tikam mbulu tana pio mini pepe. ✡ Yo 15:25

20 Sua kizin iswe kembei lelen be ziŋan zin tomtom tiparlup zin ma timbot ambai som.

Pa tiŋgalŋgal sua pakaamŋan boozo pizin wal ambaimbaiŋan ta manneŋan i.

21 Mi kalŋan izalla sorok mi tiso la motoŋ ta kembei:

“Aa buri ituyam amre katu. Kam ŋoobo kek.”

22 Yooba, mbulu kizin ta boozomen tana, nu re lup.

Zem zin ma tikamam ta kembei pepe.

Mi mbot molo pio pepe.

23 Merere, maŋga mi menderkaala yo!

Anutu tio, mender pio mi koto koŋ koi bizin.

24 Yooba, nu kamam mbulu ndeeŋeŋana men. Tana mender pio mi so pa koŋ koi bizin ta kembei: Nio leŋ uunu sa isaana som.

Uulu yo. Kokena zin menmeen zin pa pataŋana ta ise tio i,

25 mi tiso: “Aa buri! Tilip pini.

Pa koroŋ ta lelende pa be ipet pini, ta ipet pini kek!”

26 Yooba, zin wal ta tire pataŋana tio ti mi menmeen zin pa na,

pamiaŋ zin mi kam zin ma tiru zaala.

Zin wal ta tipakurkur zitun mi tirepilpiili yo na,

koto zin mi kam zin ma kan miaŋ.

27 Tamen zin wal ta lelen be Anutu iuulu yo mi iswe kembei nio leŋ uunu sa isaana som,

nako lelen ambai mi menmeen zin kat.

Ko kalŋan izalla ma tizzo ta kembei: “Tapakur Yooba! Pa ni zaana biibi kat.

Mi leleene be mbesooŋo kini imbot ambai.”

28 To nio ko aŋzzoyaryaara sua pa mbulu ku ndeeŋeŋana,

mi kwoŋ ko ipakurkuru pa mbeŋ ma aigule.