1 Azlaməna gay ləv gulo, kafaw madzugway aŋkul à azladza uwana à afik gesina: ‘Anu la Masasəɗok uwana atsà à waŋ la slaka Zəzagəla’, tagoɗ aw. Ama nərə̀zàw atà dadàŋ, kà akul aŋa masəl: atà la Masasəɗok aŋa Zəzagəla ndzer. Haɗay ndzer, azlaməna mapəh à atà gay ahàl fidaga la ahəŋ, uwana tadàsa à waŋ à gudəŋ à vok, tasləh gəl à ahəŋ gesina. 2 Aganay tetəvi uwana kasəlawla à baŋa dza uwaga la Masasəɗok aŋa Zəzagəla ndzer. Kəla dza uwana agoɗay kà: ‘Yesu kà Kona aŋa Zəzagəla, asà à gudəŋ à vok, apakà dza bokuba anu’, dza uwaga kà, akor kà Masasəɗok, uwana atsà à ahəŋ la slaka Zəzagəla. 3 Ama kəla dza uwana agoɗay kà: ‘Yesu kà Kona aŋa Zəzagəla aw, ŋgaha ndzer apakà dza bokuba anu aw’, dza uwaga aga la Masasəɗok uwana asà à ahəŋ la slaka Zəzagəla aw. Ama dza uwatà kà la masasəɗok aŋa masla məzam aŋa Kristu. Haɗay, katsənàwwàŋ kà masla adàsa à waŋ. Lagonay kà, məda­nəŋəŋ la gudəŋ la vok adagay zlà.

4 Ama kà aŋkul azlabəza gay ləv gulo, akul azlaaŋa Zəzagəla, ŋgaha kaɗùwàw azlaməna mapəh à atà gay à ahàl fidaga uwaga. Masasədok Zəzagəla uwana aga la akul la abà aɗuwa masasəɗok aŋa azladza uwaga tetuw tetuw, kà uwana aŋatà kà aŋa gudəŋ à vok uwanay. 5 Azladza uwaga tapəhay kalkal la gudəŋ à vok uwanay, kà uwaga tapəhay lakəl aŋa gudəŋ à vok uwanay, ŋgaha gudəŋ à vok akəs gay aŋatà. 6 Ama anu, anu azlaaŋa Zəzagəla, kəla dza uwana asəl Zəzagəla, atsəɓ à anu sləm, ama kà aŋa azla­uwana azlaaŋa aŋha aw, tatsəɓ à anu sləm aw. Kiya uwaga à tetəvi kà masəlay Masasəɗok dziriga aŋa Zəzagəla, ŋgaha masasəɗok mazila, kà kità ndzer.

7 Azlaməna gay ləv gulo, məwoya vok kà anu à anu. Kà uwana masal kà atsà à ahəŋ kà la slaka Zəzagəla, ŋgaha kəla dza uwana awoyaŋ deda aŋha kà, masla kona aŋa Zəzagəla, ŋgaha asəl Zəzagəla. 8 Dza uwana awoyaŋ Zəzagəla aw, masla asəl Zəzagəla aw, te­ke­ɗika Zəzagəla masla mawoyəŋ. 9 Kiya uwaga à uwana, Zəzagəla apə̀hanula masal aŋha: Aslə̀l Kona aŋha tekula gà uwatà à waŋ à gudəŋ à vok, kà masla aŋa mav à anu sifa adəv à gay aw. 10 Godega aŋa mawoyəŋ uwanay kà, Zəzagəla awoya anu, aslə̀l à anu Kona aŋha à waŋ, kà aŋa mapis à anu gay à vok, ŋgaha amatsàn tsakana gami ala. Anu la uwana məwoyàŋ Zəzagəla teraŋa aw, ama masla la uwana atsà à vok à mawoy anu dadàŋ.

11 Azlaməna gay ləv gulo, bokuba uwana Zəzagəla awoya anu kaykay kà, say məwoya vok kà anu à anu babay suwaŋ. 12 Dza la ahəŋ adanəŋ Zəzagəla didi aw, ama baŋa məwoy vok kà anu à anu, Zəzagəla adza à ahəŋ la anu, ŋgaha azladza tanəŋəŋ la paraka masal aŋa Zəzagəla, uwana la anu la abà.

13 Kiya uwanay la uwana, anu la maham gay à vok la Zəzagəla, masla adza à ahəŋ la anu la abà, masla avà à anu Masasəɗok aŋha. 14 Mənəŋàŋ, ŋgaha məpə̀h uwaga la kuda zləkkà: Baba aslə̀l Kona aŋha à waŋ à gudəŋ à vok, kà masla aŋa maɓəl anu. 15 Kəla dza uwana apəhay la paraka kà Yesu kà: Kona aŋa Zəzagəla kà, masla adza à ahəŋ la Zəzagəla la abà. 16 Anu məsəl masal uwana Zəzagəla awoya anu, ŋgaha mədakəs masal uwaga.

Zəzagəla masla masal. Dza uwana aga la masal uwaga la abà, masla la maham gay à vok gà la Zəzagəla, ŋgaha Zəzagəla la masla la abà bay. 17 Aganay tatak uwana apəha­nula kà masal aŋa Zəzagəla mahənlaga la anu la abà, guba akəs anu, kà kaslà aŋa seriya aw, kà uwana sifa gami adagay maga­ga­zləlaga la aŋa Yesu Kristu. 18 Dza uwana adakəs masal ndzer, dza uwaga, guba azəŋ ɗiki­ɗiki aw, masal dziriga ahə̀lal guba la vok ala. Ama dza uwana guba azə̀ŋ kà mahənlaga la masal aw, kà uwana guba kà tatak tekula la seriya. 19 Ama anu kà, məwoya Zəzagəla, kà uwana Zəzagəla atsà à vok à mawoy anu teraŋa. 20 Dza uwana agoɗay: ‘Gəwoya Zəzagəla’, awoya deda aŋha aw, dza uwaga kà: Masla fida. Kayyà, kakay awoya Zəzagəla à masla uwana anəŋaŋ aw ma, ŋgaha kà awoya deda aŋha uwana anəŋaŋ la yewdi aw ma? 21 Uwanay kà mapəhay uwana Yesu apə̀h à akul: Dza uwana awoya Zəzagəla, say awoya deda aŋha babay suwaŋ.