DOS ID POKITA
ni Disas Krays ki Juan
Unna nod Bosan
Inin libru, id sulat ni Juan no sokkad taddot sopuu-oruwon apostoles no mgo tinodduwan ni Disas Krays. Sokkad sikandin taddot oppat no mid sulat to libru moka-atag to Moppiyon Dinoggan. Woy sikandan mandad kos id sulat to otollun moobbavon libru, no idda en so 1 Juan, 2 Juan woy 3 Juan.
Iddot timpu to kodsulat ni Juan ka-ay'n libru, id pohos sikandin tid piyod diyot disok no isla no id ngoranan no Patmos pomon to kodponudtuu rin to kahit Monama woy pomon to kodposivonnaa moka-atag ki Disas. Su iddon timpu, duwon suhu pomon diyot hari to Roma no od prisuwon woy'd imotayan iddos od pomakoy ki Disas Krays. Iyon unayan no id sulat ni Juan ini riyon tod pompomakoy, su amoy od mosalig kos kopomakoy ran, woy od pokoti-is sikandan to dakkoon kodposuppit nod inguma kandan.
Id posulat to Monama ki Juan iddos mo-uraan mokososoobbu no id pokita rin diyot kandin. Ka-ay ta en pantok od kosorollan, no duwon otollun kovonnaan moka-atag tod ingumon kotomanan.
Unna, duwon morat no ispiritu no id waong ka-ay to ampow't ingod, woy pomon tadda, od ukit en to koosayan kos od pompomakoy woy dos duma, od patoy pomon to kopomakoy ran.
Iko-oruwa, od kotalu ni Disas iddos langun nod supak to Monama. Longaggon en sikandin, piru od ngoranan mandad no Natin Karnero, su noko-iling sikandin to natin karnero no id buwis amoy'd koposinsyan kos saa to mgo minuvu.
Iko-otollu, duwon motoos no ganti no id panoy to Monama atag to mgo minuvu rin no od ponayun nod lohinat diyot kopomakoy ahad mosuppit kos no-ukitan dan, labbi ron en taddot od patoy pomon to kopomakoy ran ki Disas Krays.
Diyot tigkonayan ka-ay'n libru, duwon pittun sulat atag to pittun id lolivuung nod pompomakoy. Inin mgo sulat, od pokita taddot nokod-osso-osson kodbovotasan tod pompomakoy (2:1 taman to 3:22). Mo-uraa kos po-ukit ni Juan amoy od paabbotlabbot to kotuusan woy kodsilut to Monama. Dos id pokita to Monama ki Juan moka-atag to trunu rin (4:1-11), woy dos id luun no popii nid porokkot no silyu woy dos Natin Karnero (5:1-14), kilaannan ini no iddos langun no minuvu woy dos mokososoobbun kotomanan, no-iraom to kodponguu to Monama woy ki Disas Krays. Ukit to kodlokkat taddot pittun silyu (6:1 taman to 8:5), ukit to kod-irup to pittun trumpeta (8:6 taman to 11:19) woy ukit to kodbusbus to pittun yohung (16:1-21), id pokita to Monama ki Juan iddos langot woy kodsilut din to mgo minuvu ka-ay to ampow't ingod.
Kopongnga taddon kosupittan, od silutan ni Disas si Moivuyan woy dos mgo sakup din, ahad iddos langun no minuvu no od elle nod pomakoy ki Disas. Dos mgo minuvu to Monama, od kotanggap dan iddos motoos to langun no kopiyannan, no idda en so od oubpa kos Monama duma kandan. Od punason din kos dayas dan, woy worad kopotayan, koosayan, kodsinoggow woy mosakit. Od lihad ini taman to waad tomanon (21:3-4). Na riyot morin allow, od lommiyon to Monama kos langit woy livuta, woy od hari si Disas to langun. De-en ukit to mgo ponudtulon to Monama no id posulat din ki Juan ka-ay'n libru, id monokkaa kos ginawa taddot od pompomakoy dangan ahad taman ko-ungkay.
Dos mgo Nokota-aw:
Kodpokilaa (1:1-8)
Dos kodpokita ni Disas ki Juan (1:9-20)
Dos ponudtulon atag to pittun id lolivuung nod pompomakoy no riyot pittun bonuwa (2:1 taman to 3:22)
Dos koddoong diyot datas to langit (4:1-11)
Dos id luun no popii, dos Natin Karnero woy dos kodlokkat taddot pittun silyu (5:1 taman to 8:5)
Dos pittun trumpeta (8:6 taman to 11:19)
Dos dragon woy dos oruwon moka-arat-arat no monnanap (12:1 taman to 13:18)
Dos kanta taddot id pontobbus to Natin Karnero (14:1-5)
Dos ponudtulon to otollun ponolihan (14:6-11)
Dos od kottuwon ka-ay to ampow't ingod 14:12-20
Dos pittun yohung no noponnut langot to Monama (15:1 taman to 16:21)
Dos kodtalu to Monama taddot od pongkuntra kandin (17:1 taman to 20:15)
Dos kodlammi to Monama to langun (21:1 taman to 22:5)
Dos kodlivod ni Disas (22:6-21)
1
Kodpokilaa
1 Nokosulat ka-ay'n libru iddos id pokita to Monama ki Disas Krays, amoy id posaddoo rin mandad diyon tod pompomakoy iddos od inguma pon od kotomanan to diid kouhoy. Woy id pokita ni Disas Krays ini ukit to ponolihan no id suhu rin dinit koddi no uripon din no si Juan. 2 Id sulat ku ka-ay iddos langun no nokita ku moka-atag taddot ponudtulon to Monama no id posivonnalan ni Disas Krays. 3 Moppiya kod kotomanan taddot minuvu no od basa ka-ay't id poponudtuu to Monama riyon tod lolivuung nod pompomakoy. Moppiya mandad kod kotomanan taddot od pominog, woy taddot od tuman to langun no nokosulat ka-ay, oyya su diid kouhoy, od inguma en inin kotomanan.
4-5 Siyak si Juan kos id popiyod ka-ay'n sulat atag to pittun id lolivuung nod pompomakoy no id pon-ubpa riyot mgo bonuwa no sakup to Asia.* Ini en kos prubinsya no morani riyot Metom no Dahat woy Dakkoon Dahat no od ngoranan don to Turkey ko-ungkay'n timpu.
Muopa no iddos Monama, dos Ispiritu woy si Disas Krays, od pokita koniyu to eru woy kosunayan. Dos Monama, duwon don tapoy to waa pa iddos tigkonayan to ingod, ahad ko-ungkay, woy taman to waad tomanon. Na moka-atag taddot Ispiritu,* Otik diyot Griego no kinohiyan, pittu no Ispiritu. Diyot nosulat no Kahit Monama, dos kohulugan to numeru no “pittu,” waa kulang. De-en waa en kulang to Uhis no Ispiritu. diyon sikandin to isowwan to trunu to Monama. Si Disas Krays kos od kosolihan no tohodposivonnaa to kahit Monama. Sikandin kos unnon novadnow, woy od hari to langun no ponguu ka-ay to ampow't ingod.* Od kovasa ini riyot Salmo 89:27.
Id ginowannan ki nikandin, woy id polegguang to kodsilut atag to keton mgo saa ukit to longossa rin. 6 Id polonug ki nikandin to kodhari rin amoy'd ponguu duma kandin, woy id bovallan ki no mgo tohodbuwis no od puung atag to Monama no Amoy rin woy Monama rin mandad. De-en muopa nod posivontuhon si Disas Krays, woy od hari sikandin to waad tomanon. Oyya, od kotuman en ini.
7 Pomotawi row! Od livod si Disas Krays duma to souhapun, woy od pokokita kandin kos langun, ahad iddos id pakpak kandin diyon to krus. Woy mopet kos sinoggawon to langun no tribu ka-ay to ampow't ingod pomon to allak dan. Oyya, od kotuman en ini!
8 Dos Monama nod Longaggon no Motuus to Langun, mid ikahi to,
“Siyak kos Alpa woy Omega,* Dos “Alpa,” idda en kos unnon litra to Griego no abakada, woy dos “Omega,” idda en kos kotompusan no litra. no iddos kohulugan, dos tigkonayan woy dos kotompusan. Duwon ad to waa pa iddos tigkonayan to ingod, ahad ko-ungkay, woy taman to waad tomanon.”
Dos Kodpokita ni Disas ki Juan
9 Siyak si Juan no suwod dow to kopomakoy, no duma row riyon to kodharit Monama woy riyot kodti-is to mgo kodposuppit. Su id pohos a tid piyod diyot isla to Patmos* Inis lugaa no Patmos, id gamit dangan taddot guberno to Roma no timbang prisuwan. pomon to kodponudtuu ku to kahit Monama, woy pomon to kodposivonnaa ku moka-atag ki Disas. 10 Sokkad no allow to allow'n Linggu, timpu to kodsimba riyon tod Longaggon, no-iroomman a to kotuusan to Ispiritu to Monama. Na riyot inoyyuhan ku, norinog ku no duwon morahing no bawos iling to trumpeta 11 no mid ungketen to, “Sulat du kos langun nod kokita ru, woy popiyod du riyon to pittun id lolivuung nod pompomakoy no riyot mgo bonuwa to Efeso, Smirna, Pergamo, Tiatira, Sardis, Filadelfia woy riyot Laodicea.”
12 To norinog ku idda, mid loingoy a amoy'd kokita ku iddos id ooseng koddi. Na iyon ku nokita, iddos pittun tootawwan to suu no buawan no id poohinat. 13 Diyot tongannan tadda, duwon id lohinat no immat minuvu* Otik diyot Griego no kinohiyan, kopakoy mandad no iddos kohulugan ka-ay, iling to Anak to Minuvu. no mowwet kos umpak taman to pa-a rin, woy riyot kabpa rin, duwon ollon no buawan. 14 Dos bowvuut uu rin, moputiputi, woy dos mata rin, iling to loglog to apuy. 15 Iddos pa-a rin, od sellow iling to brunsi no id tunow to apuy woy id posellow. Dos bawos din, golid gohonugguu iling to dakkoon tousuvan. 16 Na riyot kowanan no bollad din, duwon pittun molison no bitu-on no id somaddan din. Woy riyot bivig din, duwon id leggua no polihuma no oruwa kos taom. Dos bonnong din, od pokoselang iling to allow timpu to moko-untud.
17 To nokita ku sikandin, nopiloy a riyon lomig to pa-a rin no immat id patoy ad. Piru id somaddan a nikandin to kowanan no bollad din, woy kahi rin to, “Yo kod kovaakki. Siyak kos Tigkonayan woy dos Kotompusan. 18 Siyak kos ma-antoy. Id patoy a piru ontongngiyu, ma-antoy a taman to waad tomanon. No-iraom to koddin kotungud iddos kopotayan woy dos ingod tid poomatoy no id ngoranan no Hades. 19 De-en sulat du kos langun no id pokita ku kikow, dos od kotomanan ko-ungkay woy ahad init morin allow. 20 Na, id ponudtuu ku kikow kos kohulugan taddot waa id posaddoo dangan moka-atag taddot pittun bitu-on no nokita ru ka-ay't kowanan no bollad ku, woy dos pittun ilowan no buawan no id poohinat. Dos pittun bitu-on, idda en kos pittun sinuhuwan* Otik diyot Griego no kinohiyan, kopakoy mandad no iddos kohulugan ka-ay, ponolihan. to Monama no od tamong taddot id lolivuung nod pompomakoy riyot pittun bonuwa. Woy dos pittun suu nid poohinat, idda en kos pittun id lolivuung nod pompomakoy riyot pittun bonuwa.”
*1:4-5 Ini en kos prubinsya no morani riyot Metom no Dahat woy Dakkoon Dahat no od ngoranan don to Turkey ko-ungkay'n timpu.
*1:4-5 Otik diyot Griego no kinohiyan, pittu no Ispiritu. Diyot nosulat no Kahit Monama, dos kohulugan to numeru no “pittu,” waa kulang. De-en waa en kulang to Uhis no Ispiritu.
*1:4-5 Od kovasa ini riyot Salmo 89:27.
*1:8 Dos “Alpa,” idda en kos unnon litra to Griego no abakada, woy dos “Omega,” idda en kos kotompusan no litra.
*1:9 Inis lugaa no Patmos, id gamit dangan taddot guberno to Roma no timbang prisuwan.
*1:13 Otik diyot Griego no kinohiyan, kopakoy mandad no iddos kohulugan ka-ay, iling to Anak to Minuvu.
*1:20 Otik diyot Griego no kinohiyan, kopakoy mandad no iddos kohulugan ka-ay, ponolihan.