1 Napanelo njelo jumo pakati pavanjelo saba ve vavénavo midamu saba anínguvandika kutwa kushidoni, “Ida ndikulodye ukumu yalilaja nkumene áikele pashanya medi oe, 2 aijá wavatandinavo vyakulauka vaumu vamushilambo; vanu vanáma mushilambo, vandyambalwa vinyu vyakulauka kwake.”

3 Napanelo njelo aníngutwala mu Imumu kunguukanavo kushimbweshe. Ako ndímwona nkongwe jumo àikele pashanya palidimu lyanauvi vàmwandikenge mena oe akukupulu, àvenavo myuti saba na dimembe kumi. 4 Nkongwe jo agwete ligauni lyailangi yanshambalau na yanauvi; andílinemya na shaabu, majanga amali na vyuma vyabei yoe. Mmakono mwake andínyukata shikombe shashaabu shuumbéle vinu vyakudabukanga na vishapu vilódya vyakulauka kwake. 5 Pashenye pake vandyandika lina lyashipii, “Babiloni nkumene; jujumunu wamalaja na wavyakudabukanga vyamushilambo shapai.” 6 Napane kutwa kumwona aijá nkongwe àmbalwidye myadi vyavakwilimyanga na vyavanu váshumya ushuda umwe Yesu.

Paningwene, ngujeeme vila. 7 Bai njelo aningwaulila kushidoni, “Mwaa shani unkushanga? Nangu ndakwaulila shipii shankongwe aju na shalidimu wankwadile ávenavo myuti saba na dimembe kumi jo. 8 Lidimu waungwene jo, andípagwa kanji napane hanapagwa shinu. Nae andauma ambi popa ku Litavaleva kwida ndabamalegwa. Vanu vanáma mushilambo shapai uti vákaandikigwe mena ave mulibuku lyashingumi tangu kukandyangigwa shilambo, vanavo vandashanga pavalota kumwona lidimu mwaa andípagwa, napane hanapagwa shinu kanji andapagwa kavili.

9 “Apa pankutakigwa ding'ano na limanyilo: myuti saba avilá ni mashinga saba aikele nkongwe aijá; namomo ni vaumu saba. 10 Mwanu vandigwa, jumo ankupagwa na junji hanava kuumilila, napane palota kuumilila inimmaikila atime padyoko. 11 Lidimu jo andípagwa kanji napane hanapagwa shinu, nae ni umu wanane. Aju ankupagwa pamo na avalá saba, jojo jo ankuka kukubamalegwa.

12 “Dimembe kumi dyaugwene dyo, ni vaumu kumi vákanava kupata utawala kanji vandapata madalaka akutawala wakati waisaa imo pamo namu aijá lidimu. 13 Vanavo vankuvanavo makumbukililo amo lolo na vandamupa lidimu aijá dimongo dyave pamo na madalaka. 14 Vandatandana ing'ondo namu Ngandolo kanji Ngandolo pamo namu avalá vavashamile, vavatandwele vàvele vo vakulupilíke, andavatema mwaa nae ni Nang'olo wavanang'olo, Umu wavaumu.”

15 Napanelo njelo kushidoni, “Medi augwene àikalidile lilaja lo, ni venentete, dimbumba, vilambo na dinangodi. 16 Kanji napane lidimu pamo na dimembe kumi dyaugwene dyo, dinammangedya aijá lilaja kutwala kumbamola. Vanamuulanga kunneka matakudavo, vandamamena inyama yake na kumwananganga pamoto. 17 Mwaa Nnungu andivika mmitima vyave vatandedye malotelo ake kwambangidya vavenavo makumbukililo amo lolo, namomo kumupa madalaka ave akutawalila aijá lidimu mpaka awikile popo malove ake Nnungu. 18 Nkongwe waungwene jo, ni aulá njini ukumene uvatawála vaumu vamushilambo shapai.”