7
144.000 Kaisaronkon Israelyamî'
1 Mîrîrî tîpo asakîrîronkon inserîyamî' era'ma'pîuya. Inkamoro wanî'pî satippe, patakon kî'pî ya', wei epa'ka winî, moropai wei ewomî winî, moropai meruntî winî, moropai kamai' winî kai'ma. Inkamoroya a'situn yapîtanîpî'pî, aata'se'ma namai. Mararî pîrana poro ya'se'maiya namai. Moropai yeikon ya'se'maiya namai. 2 Moropai inî'rî tiaron inserî esenpo'pî wei epa'ka winîpai. Era'ma'pîuya Paapa tîîko'mansenya tîpemonkono yeki'kato' yarakkîrî. Mîîkîrî entaime'pî meruntî ke pu'kuru, manni'kan asakîrîronkon inserîyamî' pata kî'pîya tîwe'sanon pî', manni'kan meruntî yapisîtîponkon sîrîrî pata po, moropai pîrana po imakui'pî kupî tonkon pî'. 3 Mîîkîrîya ta'pî: —Maasa imakui'pî kî'ku'tî pata po moropai pîrana po moropai yeikon pî'. Maasa Uyepotorîkon Paapaya tîpoitîrîtonon yeki'ka tanne to' yepin pî' —ta'pîiya. 4 Mîrîrî tîpo î' warapo kaisarî inkamoro, to' yepin pî' tîpemonkono tonpe, Paapa neki'ka'san ekaremekî'pî to'ya upî'. Inkamoro wanî'pî eseuwarapo 144.000 kaisarî. Inkamoro wanî'pî tamî'nawîronkon Israel pari'pî pe, ipemonkono pe tiwin pî' to' tîîse.
5-8 Tiwin pî' to' tîîse eseuwarapo 12.000 kaisarî'ne to' wanî'pî:
Judá payanyamî' 12.000 kaisarî,
moropai Rubem payanyamî' 12.000 kaisarî,
moropai Gade payanyamî' 12.000 kaisarî,
moropai Aser payanyamî' 12.000 kaisarî,
moropai Naftali payanyamî' 12.000 kaisarî,
moropai Manassés payanyamî' 12.000 kaisarî,
moropai Simeão payanyamî' 12.000 kaisarî,
moropai Levi payanyamî' 12.000 kaisarî,
moropai Issacar payanyamî' 12.000 kaisarî,
moropai Zebulom payanyamî' 12.000 kaisarî,
moropai José payanyamî' 12.000 kaisarî,
moropai Benjamim payanyamî' 12.000 kaisarî.
Eseuwarapo'ne to' wanî'pî Paapa poitîrîtonon.
Arinîkon Iku'ne'tî Yentainokon
9 Mîrîrî tîpo arinîkon pemonkonyamî' o'non pata iku'ne'tî yentainokon era'ma'pîuya. Inkamoro wanî'pî tamî'nawîron pata ponkon pe. Tepu'se pra to' wanî'pî si'ta mai wanî'pî. Inkamoro wanî'pî satippe mîrîrî ereutanto' rawîrî moropai carneiro rawîrî to' wanî'pî. Inkamoro epontîsa' wanî'pî aimutun tîponkon ya'. Moropai inkamoro yenya' yu' yare wanî'pî, imakui'pî yentai tîwanîkon ye'nen. 10 Inkamoro entaimepîtî'pî meruntî ke pu'kuru:
—Anna Yepotorî Paapa taponse' po manni',
moropai carneiro winîpai anna e'pîika'tîto' iipî.
Kure'ne anna pîika'tî'pî to'ya
—ta'pî to'ya. 11 Mîrîrî yai tamî'nawîronkon inserîyamî' wanî'pî satippe Paapa ereutato' taponse' woi, moropai inkamoro ipîkkukon yaponse' woi, moropai asakîrîronkon manni'kan enenankon woi. Mîrîrîya inkamoro inserîyamî' esenumî'pî Paapa ereutato' rawîrî non pona, tenpatakon tîrennu'se. Moropai inkamoroya Paapa yapurî'pî. 12 Ta'pî to'ya:
—Inna, mîrîrî warantî e'pai man.
Yapurîpai'nîkon man!
Morî pe, ipîkku pe nai.
Epu'nen pe nai, Paapa.
“Morî pe man, Paapa”, taapai'nîkon man!
Anna nînama amîrî.
Meruntî pu'kuru amîrî Paapa, anna yepotorî.
Mîrîrî warantî taa pî' ko'manpai'nîkon ipatîkarî, tî'napanse pra.
Inna mîrîrî warantî nîsi
—ta'pî to'ya.
13 Mîrîrîya tiwin ipîkkukon yonpaya uyekaranmapo'pî: —Anî'kan see insamoro aimutunkon to' pon? O'non patapai to' ii'sa' mîrîrî? —kai'ma.
14 —Inna pa'ye, Uyepotorî. To' epu'tîuya pra wai. Amîrîya neken to' epu'tî —ta'pîuya.
Mîrîrî ye'nen ta'pîiya upî': —Insamoro wanî manni'kan kure'nan e'taruma'tînto' kore'tapainonkon pe. Tarîpai insamoro e'pîika'tîsa' mîrîrî winîpai. Morî pe to' e'ronasa', tîponkon ronasa' to'ya aimutun pe, carneiro mînî ke. Imakui'pî to' nîkupî'pî mo'kasai'ya wanî'pî.
15 Mîrîrî ye'nen carneiro yaponse' ereutanto' rawîrî
satippe to' wanî mîrîrî.
Moropai inkamoroya epîremanto' yewî' ta si'ma
yapurî ko'mannîpî'pî wei kaisarî moropai ewaron kaisarî.
Mîrîrî ye'nen mîîkîrî taponse' pona eereutasa' manni' ya',
to' koneka ko'mannîpî,
to' yarakkîrî tîwanî ye'nen.
16 Mîrîrî ye'nen inkamoroya inî'rî emi'nan epu'tî pepîn.
Moropai inî'rî tuna aninnîpai to' wanî pepîn.
Moropai inî'rî a'ne' pe wei epu'tî to'ya pepîn.
Weiya to' yeki'ka pepîn inî'rî.
17 Maasa pra mîîkîrî carneiro,
ereutanto' kore'ta wanî manni',
mîîkîrî ko'mamî to' esa' pe.
Moropai mîîkîrîya to' pinunpa,
to' yarîiya tîîwarîrî teepa'kasen
ipatîkaron ko'mannîto' tuna enî'se.
Moropai Paapaya inkamoro yenu ya'mananîpî
to' karawato' winîpai.
Mîrîrî tîpo inî'rî to' karau pepîn
—ta'pîiya upî'.