2 Tesalonaika
Polokafo mono wenina Tesalonaika numudo minabo ya lufuwa hofa aliga i fulo betibo ha
Homu Ha
Polo ya Kolinti numudo minomo wibo hamenalo ya Yesu holi hikito muti monolo nuba o-o abo wenina Tesalonaika numudo minabo ya lufuwa hofa aliga i fulo betibo ha me ya ne. Weninawa yauti maleka yasi Yesu Kilisto moda liwila oto lotaiye, loti hatina kiti lo-lo abo yagunu Polo ya hawa holito lufuwa me ya i fulo betigu ya hamena hulanogolaido idafa ma lo fedanaibo ha, ido Wenaba hiyabala o minoto mona fefe loto molanubo ha ya auba ito api itibinowe, loto lufuwa me ya i fulo betibo ne.
1
Lo oloto molaibo ha
1 Aiyo, hemotina Metefo Goti ido Wenaba Yesu Kilisto lutinau mino betiti Tesalonaika numudo monolo nuba o-o abo weninao, lemo Polole, Sailasile, Timotile lufuwa me ya i fulo betiyoniyo. Walo.
2 Metefo Gotidokati ido Wenaba Yesu Kilistolokati ya aifa li dowa lo ledaibo mona ido you amena mona ya hemotinaloka mino betinaiye.
Polokafo weninawa yagunu holito Goti lomuibo ha
3 Mono weninate-motao, lemo hemotinagunu holito Goti lomuwonibo, ya holi hikitabo mona naba-naba yoimo uto, ido hemotina muki lutina-hatina bi minabo mona yagi u naba yoimo wibo yagunu holito ya dowae, lalowe, loto hamena-hamena lomu-lomu onibo ya moda fefe loto lomumo yowone. 4 Yagunu leimo ya Goti weninala numudo-namado monolo nuba o-o agu ya hemotina luwatina lobiyonibo, ya mono uwolafo hasuwala fi biyato, hena naba-naba holi minabo ya lutina-hatina wina ámito, ilalu huti auba iti holi hikitoti mino-mino abo monatina yamagunu luwatina lobi-lobi o minone.
Gotikafo monate hona moloto lifima meina fefe loto liwilato lumibo ha
5 Hena naba oloto pi bibo yamakafo hepa molo bito, ya Goti wehudite hiyaba o ledaibo hilalau ya moda ogofuti yonabo weninane ona hula minae, loto wa betibo, ya fefe lotoko hona molo ledaibo mona ya lilibibo ne. Ena aya hilalagunu holiyabo yagunu onesa me ya moda henawa naba ya holi minae. 6 Moda holiyafe? Aliga ya Gotikafo fefe liboko nebo monala ya meyalo moloto, hasuwala fi betiyabo weninawa ya lifima liwilato bito hasuwala fi betito, 7 ido hemotina henawa holi minabo wenina ya lemogi maina li you lo ledanogolaiye.
Feito feyanaibo, ya Wenaba Yesu ya enisolela auba iyabo yagi okulumauti so huluma naba-naba ligu yau oloto pinaibo hamenalo, yalo ya 8 Gotigi hutifina ámabo wenina ido Wenabate Yesu hala ukuwa dowa holiti hololadámabo wenina ya lifima ha naba liwilato binogolaiye. 9 Lifimawa liwila oto binaibo, Wenaba hola-welalo ido aubala lamenalalo yati fulo faiga o betiyageto, u hopa unabo hanu ya lifima meinawa liwila oto biyageto, yalo ya minowa-minowa oti minanigilae.
10 Ido anaibo hamenawalo ya fele weninala, holi hikito muwabo wenina muki yasi wati elegiti aiyo-weiyo loti huliya li faka lomo yonae. Ido hemotina ya lo oloto biyonibo ha holi hikitabo yagunu aya hamenalo ya hemotina ya lemogi ido weninawa muki yagi maina minanogolone.
Weninawa yagunu holiti Goti lomuwabo ha
11 Idafawa muki ya oloto pinaibo yagunu ya moda hamena-hamena hemotinagunu holito Goti lomuwonibo, ya Gotite yakafo auba i betiyageto, ya mona dowa lotoko molanune, loti dowa holiti, ido holi hikitoti onona hula muki linune, loti holiyabo mona ya feti molanae, loto sutina fibo monawa ya hemotinaloka li oloto pi betito, dowa loti wa betinogolaiye, loto lomu-lomu o minone. 12 Feto feyanabo ya Wenabate Yesu lamena huliya ya hemotina minagu u naba yoimo unaiye. Ido hemotina yagi emo mino lulau edabo ya lamena hulitina naba binaibo ne. Gotite ido Wenaba Yesu Kilisto aifa li dowa lo betibo monawa yakafo idafawa ya li oloto pinogolaiye.