OREPALAISANE
Jone keta pii repa repa piyamo buku dake Kurisene wambu Yesu Koraisa Kamongo ingyuo kapa ingingi karamo lao suu piyami dokona randa maiyami dokopa piya. Buku dake angi renge paleyamo piya doko randa epo pyao pirami dokopa yaki nyii nao keyange mende pyakara lao suu pyao mondo lao pilyaminyi dokona pyuo karalu karena lao pii porakaiyo lao pyao maiya.
Buku dakena liti andarele pii repa repa piipi yulu oo repeta pyaka selana pilyamo dupwa lasaka pingi piipi pyasi palamo. Pii dupwana kongwalu malu palamo dupwa Kurisene wambu yuu gii dokopa kareyami dupwa kando leyasa kapa siyami. Wambu menge dupwa keta renge yalu pyuo siyasa kapa soo nyerami ingya naya. Buku dakena renge angi paleyamo piyamo dusipa dee kambako pii repa repa dupwa wakale wakale ingyuo piyamopape pii renge angi leyamo dusipanako epo renge palipa piya. Buku Orepalaisane dakena pii kuki lapona lao wambu suu pingi wakale wakale nyilyaminyi. Dopa piminyipape renge mupwa doko ama pano silyamo. Renge doko Kamongo Koraisa keta Anatumi banya yanda pimwai dupwa nyuo anamasi minyaramo dokopa Satane opetae anamasi minyalu minyuo minyapala baa yaki nyii nange wambu dupwa renge keyange maiyuo yuu yakepe enenge dokona pisara, leya.
Orepalaisane dokona Yesu dee kamba epara lao lalu lao lenge pii doko palamo.
Buku Dakena Pii Palamo Dusipa
1. Pii kanda soo leya 1:1-8
2. Kanda soo pii repa repa piyamo dokope pepa pase Elyambu Pingi yanda ipingi nyepo pyao maiyamo dusipape 1:9—3:22
3. Pepa rongo pisi isa roo yanda ipingimi rambu lao upi lasi 4:1—8:1 4. Bikuli yanda ipingi nyepo 8:2—11:19
5. Kau pambeyape mena koo dolapope 12:1—13:18
6. Pii repa repa rara wakale wakale lapo 14:1—15:8
7. Pere warake yanda ipingi Anatunya imbu singi siya dusipa 16:1-21
8. Yuu Bapilone anda taone doko lalyuo burumbara piya dee mena koo poropeta kyambo lenge Satane baape isa parami doko 17:1—20:10
9. Lumwa pyuo kote palira doko 20:11-15
10. Yuu yakepe enenge Jerusaleme enenge 21:1—22:5
11. Pii lao lumwa pyuo leya 22:6-21
1
1 Anatumi Yesu Koraisa dokona pii polo lamaiyamo doko dakena pyasi palamo. Yulu oo repeta pyaka selana pilyamo dupwa Koraisa banya yulu pyakamaingi wambu wambo lasaka pinyale lao Anatumi baa lamaiya. Koraisame banya yulu akali Jone soo karena lao banya aŋala mende lamaiyala pena leya. 2 Namba Joneme Anatunya pii repa repa dokonape dee Yesu Koraisana pii renge kinyi rolae palamo dokonape kandapala pyao reteyo. 3 Yuu gii pyaka seramo doko repe ingilyamo dokona pii pyasi buku dakena yaka larami dupwa rae mairami. Pii polo lenge dusipa sepala warombo serami dupwa rae mairamiko.
Elyambu Pingi Yanda Ipingi Nyepo Dusipa Yako Leya Doko
4-6 Namba Jone, Elyambu Pingi yanda ipingi nyepo yuu Esia dokona pepa pyao jilyu. Anatu baa epapu karamo doko wambo kareyako enakana kararako dokope dee imambu yanda ipingi nyepo banya petenge isa repeta dokona karaminyi dupwape dee Yesu Koraisa pii rolae lao karenge doko baa kumungi dupwana kanda soo lete epapala, isa akali kamongo dupwa rapu pyuo karenge dokope dusipana mona keyange palyuo ipingi rengepe mona kyuu lao singi rengepe nakama keta paliramopa karamili yaka lao suu pilyu. Yesu namwa mona reteyamo dokona ranjama kulimbuo joo kumuyamo dokome, namwana koo dupwa rekya lanyi nembakaya. Banya isingi pandana namwa rapu pingi inginyi pyambuo Rakange Anatu lakandalapa langiya. Baa iki mupwa ingyaramopa neta renge yulu doko baa keta palu palena, doko kinyi.
7 Kandalapape, Baa kopa dokona role pyapeta epelyamo. Enda akalipi peparae baa kandarami. Wambu baa arekyuo piyami dupwame kandaramiyoko. Wambu peparae baa suu pyao ee lao kondarami. Dopako pyuo pira, doko kinyi.
8 Kamongo Anatumi Wakasa, Namba yuu ingya ingya ingyuo karo pao lumwa pingi ingyuo kararo letamo. Baa wakasa ingyapala wamba kareya, epapu karamo rengya kararako.
Joneme Yesu Kandeya Pii Doko
9 Namba Jone. Yesupa pakao karo dokome nakamana yangonge ingyuo karo. Namba nakama pipya Anatunya isingi yulu dokona karo randa nyepalape maka nao pyuo karamano. Anatunya pii dupwa polo lamaiyuo, dee Yesunya kingi lao kareyosa dokona yuu kingi Patamosa lenge ipwa kotana sukusa singi dokona nembeyami. 10 Namba dokona karo Kamongona yuu gii sande andake dokopa Imambu dokome namba keta maralyiya. Maralyiyamo dokopa mata siyamo dorena pii andake bikuli pii lele lao leyamo siyu dokona 11 dopa pyuo langiya. Emba kandarene dupwa pepana pyapala Elyambu Pingi yanda ipingi nyepo dusipana mairi. Mende yuu Epesasa lenge, mende Semena, mende Pekamama, mende Tayataira, mende Satisa, mende Pilatepia, mende Leotosia lenge yuu dusipana mairi leya.
12 Leyamo doko sepala nambame apimi lao karape lao kandalana kapu kyiyu. Kapu kyepala bange kendapuli minyingi golome wasisi yanda ipingi nyepo kareyamo kandeyo. 13 Sukusa dokona akalinya ikinyingi yalende ingyuo kareyamopa komau londendeme kimbu dokona sinjimu polo karena lao wapupala, dee banya puingi rengeta dokona golo marapu mende puu pisaro kareya. 14 Banya kyawasi ama kyewa lapala maa bilima kapa ingiya. Banya lenge dolapo isare bui kakai pyuo renge dopale rao kareya. 15 Banya kimbu dolapo kapa lepolepo wakasa pingi dopale ingiya. Banya pii leyamo dokopa ipwa jeraeŋe pyao peya. 16 Banya kingi rolae dokome bui yanda ipingi nyepo minyapala kambu dokona wua gela paki pakipi nenge karenge doko minyaro kareya. Banya lenge kambu doko andowai korakamana neta andake renge dopale ingyuo peya. 17 Nambame baa kandeyo dokopa banya kimbu dokona pao palipala kumasi ingyuo siyu. Dokopa baame banya kingi rolae dokome namba keta retapala langiya. Emba paka napipi. Namba wambowana karapala pao lumwa pingi ingyuo karo. 18 Namba lete karenge akali ingyuo karo. Kanda. Namba kumuya kande doko nambame mee lete karo puu paro ingilyamo. Wambu kumaraminyipape Satane panda paraminyipape dolapona kii namba keta palamo. 19 Kandalene dupwape dakepale kando karene dupwape rengya pyaka seramo dupwape pepana pyao retape. 20 Nambame kingi rolae dokome bui yanda ipingi nyepo minyaro karo dokonape dee kendapuli minyingi bange golome wasisi yanda ipingi nyepo dokonape renge andake yalu pisi silyamo dokona ingyuo polo langiru. Doko bui yanda ipingi dusipa Elyambu Pingi yanda ipingi nyepowana aŋala rapu pyuo karenge dokona makande pyuo minyapusa pilyamo. Dee kendapuli minyingi bange yanda ipingi dupwa Elyambu Pingi yanda ipingi nyepo dokona makande pyuo pilyamo.