1 Mi brabli nogudbinji en mi wandim God blanga album mi.

Mi jingat brabliwei langa im blanga irrim mi.

2 Wen ai abum trabul, ai jingat langa YAWEI.

Olnait ai lidimap main bingga en prei,

bat ai nomo fil gudbinji.

3 Wen mi jinggabat main God, mi wori,

en mi fil brabli nogudbinji.

4 Ai kaan jadimap main ai dumaji yu na kipum mi weik.

Mi brabli nogudbinji en ai kaan tok.

5 Mi jinggabat blanga wanim bin hepin bifo,

en mi jinggabat blanga ola oldendeis.

6 Mi jinggabat ola song naitaim,

en mi jinggabat en mi askim miselp.

7 “Maitbi det Bos garra oldei nokambek wi?

Maitbi im kaan gudbinji langa wi igin?

8 Maitbi imbin stap laigimbat wi?

Maitbi im garra stapam det pramis weya imbin meigim longtaim?

9 Maitbi imbin kipumbek det kainbala filing blanga im dumaji im wail langa wi?”

10 Afta na aibin tok miselp, “Dijan na meigim mi brabli nogudbinji.

God bin abum detmatj pawa basdam, bat tudei na ai nomo luk im pawa.”

11 YAWEI, ai garra jinggabat blanga ola haibala ting yubin oldei dumbat.

Ai garra jinggabat ol detlot ting yubin oldei dumbat garram yu strongbalawan pawa longtaim.

12 Ai garra jinggabat ebrijing yubin oldei dum.

Ai garra jinggabat olataim blanga ebrijing yubin oldei dumbat garram yu strongbalawan pawa.

13 Det wei blanga yu main God im holiwan.

Nomo eni drimin brabli haibalawan wulijim yu.

14 Yu na det God hu oldei dum olkain ting garram yu pawa.

Yu na shoum yu pawa langa ola pipul langa ebri kantri.

15 Garram yu pawa yubin seibum ol yu pipul olabat,

detlot bigininimob blanga Jeikob en Josef.

16 God, wen ola woda bin luk yu deibin ol bradin,

en ebrijing weya jidan insaid langa det solwoda bin sheik nomo lilbit.

17 Ola klaud bin meigim rein buldan,

en thanda bin meigim nois brom skai en laitining bin laitlaitbat brom ebri said.

18 Det nois blanga yu thanda bin jidan langa det wiliwili,

en det lait brom yu laitining bin laitimap dijan wel.

Dijan wel bin sheiksheik nomo lilbit.

19 Yubin wok rait thru det solwoda.

Yubin krosim det dipwan solwoda.

Bat nobodi bin luk yu trek.

20 God, yubin lidim yu pipul olabat jis laiga stakmen wen yubin pikimat Mosis en Eran blanga lidimbat yu pipul olabat.