10
Dijan preya langa God blanga pipul hu abumbat trabul
1 YAWEI,
Wotfo yu jidan brabli longwei brom melabat?
Wotfo yu haidim miselp wen melabat garram trabul?
2 Ola nogudbala pipul oldei dum nogud ting langa ola powan pipul,
dumaji olabat praudbala.
Detlot nogudbala pipul oldei meigimbat ola trep en dei oldei gedimbat powan pipul,
jis laik wen enimul git trep.
3 Detlot nogudbala pipul dei oldei reken miselp wen dei dumbat ola nogud ting.
Det gridibalawan pipul oldei tok nogudwei en gibit bekboun langa YAWEI.
4 Detlot nogudbala pipul nomo oldei jinggabat blanga YAWEI,
dumaji olabat praudbala pipul hu reken God im oni najing langa olabat.
5 Detlot nogudbala pipul oldei abum ebrijing.
Dei kaan sabi blanga Godwei en hau im garra jadjim olabat.
Olabat enamimob jis laik najing langa olabat.
6 Detlot pipul oldei tok miselp, “Im rait! Najing kaan go rong! Ebrijing rait!”
7 Dei garram brabli dardiwan mawus,
en dei oldei tok blanga dum nogud ting langa pipul.
Dei nomo holdimbek miselp mawus blanga tok brabli nogudwei.✡ Rom 3:14
8 Detlot pipul oldei haidim miselp ebriweya langa kemp,
weidabat blanga grebum en kilimbat ola gudwan pipul hu nomo sabi.
Dei weidabat en lukinatbat sigridwei blanga gedimbat pipul.
9 Dei haidim miselp en weidabat jis laik laiyan weya im weit blanga gedim im daga.
Dei weidabat deya blanga ola powan pipul.
Wen dei gedim olabat langa det trep dei dregim olawei langa olabat,
jis laik det laiyan wen im dregim det daga.
10 Detlot powan pipul nomo garram enibodi blanga album olabat,
dumaji detlot krulbala pipul bin strongbalawan en bin bidim olabat.
11 Detlot nogudbala pipul oldei tok miselp, “God bin fogedabat wi na!
Imbin tenim miselp hed en im kaan luk na.”
12 YAWEI, gidap na.
Yu strongwan.
Panishim detlot nogudbala pipul.
Nomo fogedabat detlot hu abumbat adtaim.
13 Detlot nogudbala pipul heidim God brabliwei.
Dei oldei tok miselp, “God kaan panishim wi.”
Wotfo God larram olabat tok lagijat?
14 Bat God, yu oldei luk en teiknodis blanga melabat ola trabul en adtaim,
en yu oldei redi blanga albumbat melabat.
Detlot pipul weya dei nomo garram enibodi blanga albumbat olabat,
dei gibit miselp langa yu.
Yu oldei albumbat detlot pipul hu nomo garram enibodi blanga maindimbat olabat.
15 YAWEI, deigidawei det strongwan pawa blanga detlot nogudwan pipul.
Panishim olabat blanga detlot nogudwan ting deibin oldei dumbat,
en bambai dei gin sabi na nomo blanga dum igin.
16 YAWEI det trubala God im jidan bos olagijawan.
Detlot hu weship najalot drimin, im garra meigim olabat gowei brom im kantri.
17 YAWEI, yu lisin langa ola powan pipul wen dei prei.
Yu meigim olabat strongbalawan.
18 Yu lisin langa detlot pipul hu nomo garram enibodi blanga maindimbat olabat,
en langa detlot pipul hu abumbat adtaim.
Wal yu teiknodis en album olabat,
en nomo larram enibodi dum eni nogudbala ting igin blanga meigim olabat brabli bradin.