29
Jeikob bin kamat langa Leiban kemp
1 Brom deya Jeikob bin kipgon sanraiswei.
2-3 Bambai na imbin kamat langa wan wel weya ola stakmen bin oldei wodarimbat ola ship. Deibin abum wanbala bigwan ston deya blanga jadimap det wel, en wen ola stakmen bin oldei bringimap olabat ship, deibin oldei rolimwei det ston en wodarim detlot ship en gout seimtaim. En wen ola ship bin binij dringgimbat woda, ola stakmen bin oldei rolimbek det ston igin en jadimap det wel.
Wal wen Jeikob bin kamat langa det wel, imbin luk thribala grup garram ship bin leidanbat deya weidabat blanga woda, 4 en Jeikob bin tok langa detlot stakmen hubin jidanbat deya, “Gudei! Brom weya yumob bin kaman?”
En deibin tok, “Melabat brom det pleis gulum Heran.”
5 Wal Jeikob bin tok, “Yumob sabi det grensan blanga Neihowa neim Leiban?”
En detlot stakmen bin tok, “Yuwai, melabat sabi im.”
6 En Jeikob bin tok, “Wal hau im? Im orait?”
En deibin tok, “Yuwai, im rait. Yu luk det gel deya kaminap garram ol detlot ship? Ol detlot ship blanga det olmen na, en det gel im blanga det olmen doda. Im neim Reitjul.”
7 Wal Jeikob bin tok, “Im nomo taim yet blanga meigim ola ship leidan. Im oni dinataim. Yumob gibit woda langa ola ship en deigimbek olabat blanga fidabat.”
8 Bat detlot stakmen bin tok, “Melabat garra weidabat iya blanga ola najalot stakmen. Wen olabat kaman, melabat garra rolimwei det ston, dumaji wantaim melabat oldei wodarim ola ship blanga melabat.”
9 Wal wen Jeikob en detlot stakmen bin stil toktok yet, Reitjul bin kamat deya garram ola ship blanga im dedi, 10 en wen Jeikob bin luk Reitjul garram ola ship blanga im anggul Leiban, imbin go en rolimwei det ston na streidawei, en imbin wodarim detlot ship.
11 Afta na Jeikob bin kis langa Reitjul, en imbin krai detmatj, dumaji imbin brabli gudbinji, 12 en imbin dalim Reitjul, “Mi kantrimen blanga yu dedi. Mi na det boi blanga Rabeka.”
Brom deya Reitjul bin ranbek langa im kemp, en imbin dalim im dedi, “Jeikob im jidanbat deya langa det wel.”
13 Wal wen Leiban bin irrim det wed blanga im sista san Jeikob, en streidawei imbin go kwikbala blanga midim im, en wen imbin kamat langa im, imbin kis langa im, en imbin pudumran im am langa im, en imbin bringimbek im langa im kemp.
Wal Jeikob bin dalim Leiban ola nyus na, 14 en afta Leiban bin tok, “Trubala yu na main ronwan biginini, dumaji minbala yu mami garram wanbala mami en dedi.”
Wal Jeikob bin jidan deya garram im anggul na.
Jeikob bin merrit langa Liya en Reitjul
15 Wal Jeikob bin wek blanga im anggul wan manth, en afta Leiban bin tok langa im, “Yu main ful femili. Wal yu kaan wek blanga mi nomo garram pei. Wanim yu wandim mi blanga peiyim yu?”
16-17 Wal Jeikob bin jinggabat na, en imbin tok miselp, “Leiban garram dubala doda. Det eldiswan Liya im purdiwan, bat det yangiswan Reitjul im brabli purdiwan. 18 Tharran na mi laigim.”
Wal Jeikob bin tok langa im anggul na, “Orait. Ai wandim Reitjul det doda blanga yu. Blanga im na ai garra wek blanga yu 7 yiya.”
19 Wal Leiban bin tok, “Im rait. Mobeda mi gibit det gel langa yu, nomo langa najawan men. Wal yu garra jidan iya garram mi na.”
20 Brom deya Jeikob bin wek 7 yiya blanga det gel. Imbin laigim det gel detmatj, en det 7 yiya bin jis laik dubala o thribala dei langa im.
21 Bambai na wen det 7 yiya bin binij, Jeikob bin askim Leiban blanga larram im merrit langa Reitjul na.
22 Wal Leiban bin majurrumap ola pipul blanga abum bigwan padi weya dubala garra merrit, 23 en wen det san bin godan en imbin dakbala, Leiban bin trikim Jeikob. Imbin gibit im Liya det eldiswan doda blanga im. 24 En Leiban bin gibit det wekingel blanga im neim Silpa langa Liya.
Afta na Jeikob bin silip garram Liya, 25 en wen imbin sanrais, Jeikob bin tok, “Alo! Dijan im Liya!”
Brom deya imbin agamin langa Leiban na. Imbin tok, “Aibin wek blanga yu fo 7 yiya blanga gedim Reitjul. Bat yubin trikim mi. Wotfo yubin dum lagijat langa mi?”
26 Wal Leiban bin tok, “Det lowa blanga melabat tok det yangiswan gel kaan merrit bifo det eldiswan gel. 27 Wal nekswik dijan padi garra binij, en afta ai garra gibit Reitjul langa yu. Bat yu garra wek 7 mowa yiya blanga mi.”
28 Wal wen det wik bin binij en det padi bin binij, Leiban bin gibit Reitjul langa Jeikob blanga merrit. 29 En imbin gibit det najawan wekingel blanga im neim Bila langa Reitjul.
30 Wal Jeikob bin silip garram Reitjul na. En imbin laigim im brabliwei. Bat im nomo bin laigim Liya.
Wal Jeikob bin kipgon wek naja 7 yiya igin blanga Leiban.
Ola biginini blanga Jeikob
31 Bambai na YAWEI det trubala God bin nodisim Jeikob nomo bin laigim Liya, en imbin meigim Reitjul jidan weya im kaan abum eni beibi. Bat imbin album Liya, 32 en wen dubala Jeikob bin silip, bambai na Liya bin abum lilboi blanga Jeikob.
Wal Liya bin tok, “YAWEI na bin album mi, dumaji aibin abum det trabul weya Jeikob nomo bin laigim mi bifo. Bat tudei ai garram lilboi blanga im, en im garra laigim mi na.” En imbin gulum neim blanga det feswan lilboi Rubin.
33 Brom deya dubala bin silip wanmo igin, en bambai Liya bin abum najawan lilboi, en imbin tok, “YAWEI bin gibit mi najawan lilboi, dumaji Jeikob nomo bin laigim mi bifo.” En imbin gulum neim blanga det lilboi Simiyan.
34 Brom deya mowa igin Liya en Jeikob bin silip, en bambai imbin abum najawan lilboi, en Liya bin tok, “Tudei na main hasbin garra laigim mi detmatj, dumaji aibin abum thribala lilboi blanga im na.” En imbin gulum neim blanga det lilboi Libai.
35 Brom deya dubala bin silip igin, en Liya bin abum najawan lilboi. Distaim imbin theingkyu langa God, en imbin gulum neim blanga det lilboi Juda.
Wal Liya bin stap abumbat biginini na.