1 Wen Ethalaiya det mami blanga King Eihesaiya bin irrim im san bin dai, streidawei imbin wandi kilim ded ola king san en olabat san hubin jidan langa det bigwan haus. Imbin dalim im wekinmen olabat blanga kilim olabat ded. 2 Oni Jowesh det san blanga Eihesaiya nomo bin dai, dumaji im andi Jehosheba bin seibum im. Jehosheba bin det doda blanga King Jehoram en imbin det hafwan sista blanga Eihesaiya. Imbin haidim Jowesh en im wekinmen insaid langa wan rum deya langa det Serramoni Pleis, wulijim Ethalaiya kaan kilim im. 3 Jehosheba bin maindimbat det lilboi Jowesh deya insaid langa det Serramoni Pleis blanga 6 yiya. En det taim na Ethalaiya bin jidan det boswan kwin.

4 Bat langa det namba 7 yiya Jehoiyada det serramonimen bin dalim ola boswan solja blanga ola men hubin maindimbat det kwin en detlot hubin maindimbat det bigwan haus blanga det kwin blanga kaman langa det Serramoni Pleis blanga YAWEI det trubala God. En imbin meigim olabat agri blanga dum wanim imbin plenim. En imbin shoum olabat Jowesh det san blanga King Eihesaiya. 5 Jehoiyada bin gibit olabat oda, “Det Sebathdei wen yumob kaman blanga wek yumob garra kadimat miselp en meigim thribala grup. Wanbala grup garra wotjimbat det bigwan haus blanga det kwin. 6 Det naja grup garra wotjimbat det Sura Geit, en det namba 3 grup garra lukaftumbat det geit blanga det bigwan haus. 7 Det naja dubala grup weya garra binij wek det Sebathdei garra wotjimbat det Serramoni Pleis blanga kipum Jowesh seif. 8 Yumob garra bulurrum Jowesh ebriweya im go en yumob garra abum yumob bigwan naif redibala du blanga kilim enibodi hu trai kaman gulijap langa yumob.”

9 Wal detlot boswan solja bin teiknodis langa wanim Jehoiyada bin dalim olabat, en deibin bringimap langa im detlot men hubin binij wek det Sebathdei en detlot hu garra wek. 10 Imbin gibit detlot boswan solja ola spiya en shild weya bin jidan blanga King Deibid longtaim, en weya deibin kipumbat deya langa det Serramoni Pleis. 11 En imbin abum ola men deya redibala garram ola bigwan naif en deibin jandap olaran lida langa det Serramoni Pleis en det teibul blanga ofring blanga maindim Jowesh.

12 Brom deya Jehoiyada bin lidim Jowesh atsaid en imbin pudum det speshalwan het blanga king ontop langa im hed. En imbin gibit im det peipa blanga meigim im sabi wanim im garra dum wen im jidan king. Brom deya deibin spilim det oliboil ontop langa im hed blanga shoum ola pipul im na det nyuwan king. Ola pipul bin klephen en jingatbat, “Melabat wandim im. Det king garra jidan laibala longtaim.”

13 Wal Ethalaiya det kwin bin irrim ola nois wen ola solja en pipul bin jingatbat en imbin go kwikbala langa det Serramoni Pleis weya ola pipul bin majurrumap. 14 En deya na imbin luk det nyuwan king jandapbat wansaid langa det longwan stonwan pol deya weya yu gowin insaid langa det Serramoni Pleis, dumaji imbin det pleis weya ola nyuwan king garra jandap. Ola boswan solja en ola pipul hubin blowimbat ola longwan wisul bin jandap olaran langa im, en ola pipul deya bin singsing gudbinjiwei en blowimbat ola longwan wisul. Ethalaiya bin brabli nogudbinji. Imbin terrimap im klos en imbin jingat, “Yumob bin trikimbat mi. Mi na det boswan, nomo dijan lilboi. Yumob bin trikimbat mi.”✡ 2 King 23:3

15 Wal Jehoiyada nomo bin wandi kilim Ethalaiya deya insaid langa det Serramoni Pleis en imbin dalim ola boswan solja, “Deigim im atsaid deya langa midul langa detlot men en kilim ded enibodi hu trai blanga seibum im.” 16 Deibin grebum im en deigim im langa im bigwan haus en deibin kilim im deya langa det Hos Geit.

17 Wal Jehoiyada det serramonimen bin dalim King Jowesh en detlot pipul blanga meigim brabli strongwan pramis langa YAWEI det trubala God blanga jidan im ronwan pipul olabat. En Jehoiyada bin dalim King Jowesh blanga lukaftum detlot pipul gudwei en imbin dalim ola pipul blanga dum wanim det king dalim olabat.

18 Brom deya ola pipul bin go en breigimdan det weship pleis blanga det drimin gulum Beil. Deibin breigimap detlot teibul blanga ofring en ol detlot drimin sheip du. En deibin kilim ded Metan det serramonimen blanga Beil deya lida langa ola teibul blanga ofring blanga Beil.

Wal Jehoiyada bin libum sambala solja blanga wotjimbat det Serramoni Pleis blanga YAWEI, 19 en Jehoiyada en ola boswan solja hubin oldei wotjimbat det king en det bigwan haus, bin ol go garram im. Deibin deigim King Jowesh brom det Serramoni Pleis raidap langa det bigwan haus. En ola pipul bin bulurrum olabat. King Jowesh bin gowin langa det Solja Geit en imbin jidan langa det speshalwan tjeya. 20 Ola pipul bin jidan brabli gudbinjiwei na dumaji Ethalaiya bin dai deya langa det bigwan haus.

21 Jowesh bin jidan det nyuwan king blanga Juda wen imbin 7 yiya ol.