Roh Kudus Nin
Honowok Nair
Lolo Hophopon Ma Nodi Yesus Lirnenihe
Horok Lirna La'an
Lolo horok eniyeni Lukas konohi maika hi'ihewi Roh Kudus nala molollo hophopon ma nodi Yesus Lirnenihe, leke hir loikaru Makromod Yesus Lirna Wawa'an lolo kota Yerusalem, noho Yudea, noho Samaria, noro idewe noho pa'i'ik rai pakakar (1:8).
Lere Yesus nakinikanedi laa a'am raram, Makromod Lalap nala Roh Kudus ri ma akin naili'il Yesus enihe, penia hi ka ramka'uk loikaru Yesus Lirna Wawa'an lolo ewi-ewi. Ende akilere man lernohi Yesus eren nammomori.
Ler onne Yahudi ma akin naili'il Yesus heruwali ra'ahenia Makromod Lalap kan kokala ri ma kan sunat makun. Ende hir hopon ri ma ka namwali Yahudi enihe lar sunate nanu leke Makromod kokala hi noro wawa'an, maa lolo horok eniyeni Makromod Lalap kukunohi ri nahenia Ai namre'e namharu inhoi-inhoi man herre nin morimori, la akin naili'il Yesus. Inhoi akin naili'il Yesus, Ai nala Roh Kudus naikoro ai honorok akin leke nodi molollo ai. Ende nano horok eniyeni ik kauroin Ai kan hopon ika sunat nanu leke kamwali Ai anan.
Horok eniyeni konohi maika hi'ihewi ma akin naili'il Yesus enihe rodi Makromod Lalap Lirna Wawa'an laa ri ma ka namwali Yahudi. Pilipus lan loikaru Horok Lap Lirna Wawa'an lolo Samaria (8:7-25). Petrus lan loikaru Makromod Lalap Lirna Wawa'an laa Cornelius, manin Roma (10:3-35). Paulus lan konohi ri lolo noho-noho ma kan derne Makromod Lalapa Lirna Wawa'an makun (13-28).
Horok eniyeni konohi inhawa ma namwali Paulus nano lere dedesne an pakromo Yesus lolo kalla man laa Damsyik, rakan lere ma nasala ke'urauk radiyaka ai lolo Roma. Roh Kudus nala molollo leke an loikaru Yesus Lirna Wawa'an laa ri na'akeme, ri Yahudi wa'ane, ri ma ka namwali Yahudi wa'ane.
Roh Kudus nodi molollo hophopon ma nodi Yesus Lirnenihe leke hir hi'i ha man ri kan dodo'onnala makun, la Ai nala molollo hi leke yon ramka'uk loikaru Makromod Yesus Lirna Wawa'an lolo ewi-ewi.
Horok Ihin
1. Hophopon ma nodi Yesus Lirnenihe loikaru Yesus Lirna Wawa'an lolo Yerusalem (1:1-8:3).
2. Hophopon ma nodi Yesus Lirnenihe loikaru Yesus Lirna Wawa'an lolo Yudea noro Samaria (8:4-12:25).
3. Paulus laa noho-noho namehin lolo kalla dedesne nina leke loikaru Yesus Lirna Wawa'an ri (13:1-14:28).
4. Man panulu lolo kerei hopun pepen lolo Yerusalem (15:1-15:35).
5. Paulus laa noho-noho namehin lolo kalla rewro'o nina leke loikaru Yesus Lirna Wawa'an ri (15:36-18:22).
6. Paulus laa noho-noho namehin lolo kalla rewkelu nina leke loikaru Yesus Lirna Wawa'an ri (18:23-21:16).
7. Rin kele Paulus lolo Yerusalem, Kaisarea, noro Roma (21:17-28:31).
1
Yesus nakinikan laa a'am raram
1 Konohiyala i makrom'u Teopilus,
Lolo ainu'u horok dedesne ihin,* Horok dedesne onneni horok ‘Lukas’. ya'u konohiyedi papa ha wo'ira man Yesus hi'i la wakuku nano lere dedesne An howok, * Luk. 1:1-4 2 rakan lere alam Ai nakinikan laa a'am raram. Lere Ai kan ha'a laa a'am raram makun, Ai nodi Roh Kudus Nin molollo kuku kalla Nina hophopon man An niliyedi nonolu enihe leke hi rodi Lirna Wawa'an loikaru ri. 3 Enla An maki, maa mori wali'ur, la alam weli'akka raram Ai nalhari kemen idewe-idewe pakromo noro Nin ri enihe, leke hi rauroin kokkoo An mori wali'uredi me'e, la An wakuku hi hi'ihewi Makromod Lalap nodi molollo Nin ri mormori.
4 Lerida Ai noro hi maha ra'ak ne, An hopon hi, “Yon pelekleke mamhara Yerusalem, maa mamkene lolo koteni newek Ya Am'u nala Roh Kudus ki mi lernohi Nin nou man Ya'u konohiyedi mi lere man laedi me'e. * Luk. 24:49 5 Nonolu eni Yohanis nodi oir ulutada mi, maa ka nalo'ol me'e Makromod Lalap nodi Roh Kudus ulutade mi.”
6 Ler namehin hi rore pakromo wali'ur ne, hi ra'ukanie, “Makrom'u, Num panaeku lere eni ma'akeperedi Romawi la ma'ariri noho Israel wali'ur leke mamwali Rai?” 7 Yesus walhe, “Makromod Lalap mehe Nin molollo nala alam la nala leken. Ai kan huri mi mauroin onne, 8 maa ka nalo'ol me'e, Makromod Lalap nala Roh Kudus naikoro mi honorok akin, de mim lernala Nin molollo mamwali Ainu'u man kuku maka lolo Yerusalem, lolo noho Yudea noro Samaria ne'en raram na'akeme, rakan noho pa'i'ik rai pakakar.”
9 Ai na'aheniyedi eni horu, hir po'onala Ai nakinikan laa lanik hehen nanumene noho ha'aha'a pupinedie. 10 Hi maha rahehe po'on Yesus ha'a laa lanik makun, ramlilinnohi mo'oni woro'o man nair nainair wawarhe ramririri kan ko'u hi. 11 Woro'ohe ra'ahenia, “Heih, ri Galilea mie! Alhi'ihepenia mamriri lolo eni po'opo'on lanik enie? Yesus eniyeni man idedi eni mim po'on nakinikan, laedi a'am raram me'e. Lere man mai An wali mai wali'ur naise idedi mim popo'on An ha'a laa a'am raram eni.”
Nili Matias Herre Yudas
12 Ler onne hir minle wo'or Au Zaitun de hir wali wali'ur laa Yerusalem. Wo'or onne lo'o kilu ida nano Yerusalem.† Ri Yahudi rira holoor halauk kan huri ri nala'a ko'u rehi kilu ida Alam Renren Warwarna. 13 Hir rakanedi Yerusalem ne, laa nakar mene ha'a laa wawan laa kamar man hir miminle. Hi onnenihe:
Petrus noro Yohanis,
Yakobus noro Andreas,
Pilipus noro Tomas,
Bartolomeus noro Matius,
Yakobus (Alfeus anan),
Simon (ri ma namhene hair namehin nodi molollo hair Israel),
noro Yudas (Yakobus anan).
14 Akilere hi na'ahoru lawuku aki mahaku hi'i lir napanak roro idewe maeke ida woro'o. Yesus inne Maria aile haenhi roro wewerre Yesus mo'oniwalinhe.
15 Lerida Petrus namriri lolo walinhe toro (hi na'akeme lo'o ri rahu ida werro'o.) Enla ai na'ahenia,
16 “I wal'u na'ahoru! Nonolu eni Roh Kudus konohiyedi lolo Daud inhawa ma namwali noro Yudas na'ahenia ai onne namwali ma norkaru ri man kele Yesus wukue. Ha na'akeme ma aile Horok Lap eni peni namwali, de lere eniyeni Daud nin horok onne namwaliyedi me'e. 17 Nonolu eni Yudas onne namwali mahaku noro maika, la Yesus mehen nili ai leke lernohi maika kamwali Nin man lernohi pakunohi.”
18 Nano Yudas nin ailanne lere ai na'olu Yesus onneni, an lernala kupan rodi weli lari ipida. Lolo nin lari ip onne ai nediyawa la konoin napriki penia konoin romok maiyedi paharne idewe makiyedi. 19 Yudas nina makimaki eni pe'eredi ri manina Yerusalem na'akeme penia hi rodi rira wanakunu waki kirna onne naranne Akaldama, ma napa'ahne, ‘Lari Ip Rare’.
20 Petrus na'aheni wali'ur na'ahenia, “Panaeku eniyeni horokedi aile horok Mazmur me'e na'ahenia,
‘Na'amoliyedi nina nakar mamue,
yon ri mahaku minle nakar onne.’ * Mzm. 69:25
La horok aile haenhi ma na'ahenia,
‘Enla na'amoli man panulu nala nin honowok ri namehin hi'ie.’ * Mzm. 109:8
21-22 Ende lere eni wa'an rehi ika nili ri ida herre Yudas, leke namwali man kuku maka na'aheni Makromod Lalap na'amoriyedi Yesus wali'ur nano Nin makimaki. Wa'an rehi ik nili ri ma nadedem lernohi ika mamani lere Makromod Yesus noro ika min wewerre, nano lere Yohanis nodi oir ulutade ri rakan lere Yesus nakinikan laa a'am raram nano ika kalarna.”
23 Ende hir nili ri woro'o: Yusup Barsabas (rapolu Yustus haenhi) noro Matias.
24 Onne horu, hi na'akeme hi'i lir napanak ra'ahenia, “Makromod, O penia mauroin ri mormori akin, de kukul mayai nano ri woro'enihe inhoi Makromod nili, 25 leke herre Yudas howok honowok eni, ono Yudas eni hoikaruwedi honowok eniyeni la lernaledi nina hunukum me'e.” 26 Hir hi'i lir napanak horu ne, rala ri woro'enihe naran leke nili. Matias penia ma naran namhara. Ende kikan ai namwali man howok wewerre noro hophopon idaweli ida ma nodi Yesus Lirna enihe.