1 Koko una ki mut, u ra God ba iau pite pa ia.

2 Tago ra tena varpiam ma ra tena vavagu dir tak ngia ure iau.

Dir tar vavaongo pa iau.

3 Maia, dia vila babat iau ma ra tinata na vargegelenai,

Ma dia varubu ure iau, ma pa ta vuna.

4 Dia bali kaugu varmari ma ra mangamangana ebar;

Ma iau, iau tar araring.

5 Ma dia bali ra boina ma ra kaina piragu,

Ma dia bali ra varmari ma ra milmilikuan.

6 Una tibe ra tena varpiam upi na kure;

Ma ra tena vartakun na tur pirana ta ra papar a lima tuna.

7 Ba di varvarkurai ure, boina ba da takun ot pa ia;

Ma kana niaring na da ra varpiam.

8 Boina ba na laun a paupau bung uka,

Ma ta ra tikai na kia vue ta kana kiki.

9 Boina ba ra umana natuna diat a varogop ma ra umana nat na ling,

Ma kana taulai a ua na vavina ka.

10 Boina ba ra umana natuna diat a va nangananga ka, ma diat a lulul uka,

Ma boina ba da korot vue diat kan ra kuba i diat i uliran.

11 A tena piapie mani na vatur vake kana tabarikik par,

Ma ra umana vaira diat a long kana papalum.

12 Koko ta tikai na mari mule,

Ma koko ta tikai na vamel ra umana natuna, a umana nat na ling.

13 Boina ba ra umana bul mur tana diat a virua;

Ma da pun vue ra iang i diat ta ra taun tarai namur.

14 Boina ba ra Luluai na nuk pa ra varpiam kai ra umana tamana;

Ma koko da pun vue ra varpiam kai nana.

15 Ra Luluai na nuk vatikene pa diat,

Upi na vamutue ra ninunuk uraure diat ati ra pia.

16 Tago pa i ga pait ra varmari,

I vakavakaina ka ra luveana, ma nina i ki na niiba,

Ma nina i takunuan ra balana, upi na ubu diat.

17 A lup tinata kakaina ma kana kaina tinata na lilikun mulai pirana,

Ma pa i gugu ta ra varvadoan, ma na ki vailik kan ia.

18 I vavauluvai ma ra tinata kakaina da ma ra mal,

Ma i ruk ta ra balana da ra tava,

Ma da ra dangi ta ra uruna.

19 Boina ba na da ra mal pirana, nina i turturup me,

Ma da ra vipit, nina i vala vi pit me.

20 Go ra vapuak ba ra Luluai na tul tar ia ta kaugu umana ebar,

Ma ta diat dia tata vakaina iau.

21 Luluai, God, una mari maravut iau ure ra iangim,

Una valaun iau, tago i kat kaum varmari.

22 Tago iau ki na malari ma iau luveana,

Ma i takunuan ra balagu.

23 Iau tar panie da ra malur,

Di kap vue iau da ra kubau.

24 A malmalikun na kaugu i malmalu ta ra vinevel,

Ma ra pal a pakagu i palaur.

25 Ma iau, iau da ra magit na varkulumai pire diat,

Ba dia gire iau dia loloe ra ulu i diat.

26 Una maravut iau, Luluai kaugu God,

Una valaun iau varogop ma kaum varmari;

27 Upi diat a nunure ba a limam iat,

Ba u, Luluai, u ga pait ia.

28 Kan diat a tata kakaina, ma u, una ga tata na varvadoan;

Dia tut, ma di varuva diat, ma kaum tultul na gugu.

29 Kaugu umana ebar diat a vavauluvai ma ra niruva,

Ma diat a pulu mule diat ma kadia vavirvir iat da ma ra olovoi.

30 Ina pite pa tuna ra Luluai ma ra ngiegu;

Maia, ina pite pa ia livuan ta ra ngala na kor.

31 Tago na tur na maramaravut ta ra papar a lima tuna pire ra luveana,

Upi na valaun ia kan diat dia kure vakaina.