A BO NA VARVAI MATAIO I GA TUMU IA
1
Ra niluluk na vuna tarai kai Iesu Kristo
(Luk 3:23-38)
1 A buk ure ra tarai lualua kai Iesu Kristo, natu i David, nina ba natu i Abaraam.
2 Abaraam i ga vangala Isak: Isak i ga vangala Iakob: Iakob i ga vangala Iuda, ma diat bula dia barturana me; 3 Iuda i ga vangala Pares ma Sara bula, na i dir Tamar; Pares i ga vangala Esrom; Esrom i ga vangala Aram; 4 Aram i ga vangala Aminadab; Aminadab i ga vangala Naason; Naason i ga vangala Salmon; 5 Salmon i ga vangala Boas, nana Rakab; ma Boas i ga vangala Obed, nana Rut; Obed i ga vangala Iese; 6 ma Iese i ga vangala David ra king.
David i ga vangala Solomon, dir nana ma nam ra vavina dir ga taulai lua pa ma Uria; 7 Solomon i ga vangala Rekoboam; Rekoboam i ga vangala Abia; Abia i ga vangala Asa; 8 Asa i ga vangala Iosapat; Iosapat i ga vangala Ioram; Ioram i ga vangala Usia; 9 Usia i ga vangala Iotam; Iotam i ga vangala Akas; Akas i ga vangala Esekia; 10 Esekia i ga vangala Manase; Manase i ga vangala Amon; Amon i ga vangala Iosia; 11 Iosia i ga vangala Iekonia, ma diat bula dia barturana me, ta nam ra kilala di ga kinim vakari pa diat i tana uro Babilon. 12 Ma namur ta ra varkinim uro Babilon Iekonia i ga vangala Salatiel; Salatiel i ga vangala Serubabel; 13 Serubabel i ga vangala Abiud; Abiud i ga vangala Eliakim; Eliakim i ga vangala Asor; 14 Asor i ga vangala Sadok; Sadok i ga vangala Akim; Akim i ga vangala Eliud; 15 Eliud i ga vangala Eleasar; Eleasar i ga vangala Matan; Matan i ga vangala Iakob; 16 Iakob i ga vangala Iosep ra tutana kai Maria, nina i ga kava Iesu, di vatang ia ba Kristo
17 Damana a lavur taun tarai papa tai Abaraam tuk tar tai David a vinun ma a ivat diat; ma papa tai David tuk ta ra varkinim uro Babilon a vinun ma a ivat bula; ma papa ta ra varkinim uro Babilon tuk tai Kristo a vinun ma a ivat bula.
Maria i kava Iesu Kristo
(Luk 2:1-7)
18 Di ga kava Iesu dari: Ba Iosep i ga vapopoe bat Maria, na i Iesu, ma pa dir ki guvai boko, di nunure ba i kap bala ta ra Takodo na Tulungen. 19 Ma Iosep, kana tutana, a tena takodo, ma pa i mainge ba na po vanavana, i nuk ia ba na vung ive vue. 20 Ba i nunuk boko ta go ra umana magit, tika na angelo kai ra Luluai i tur kapet pa pirana ta ra ririvon ma i biti: Iosep, natu i David, koko una laingane go ra vavina upi kaum taulai; tago nam i kap bala pa ia i vuna ta ra Takodo na Tulungen. 21 Ma na kava boko natuna, a tutana, ina una tar ra iangina ba Iesu; tago na valaun ra taraina kan kadia lavur varpiam. 22 Ma go parika i dari upi na vardada ma ra tinata kai ra Luluai tai ra propet, i ga biti:
23 “A inip na vavina na kap bala boko, ma na kava natuna a tutana.
Ma da tar ra iangina ba Emanuel;” a kukuraina dari: God pire dat.
24 Ma Iosep i tut kan kana nidiop, ma i pait nam ra angelo i ga ve tana, ma i ben pa kana taulai pirana; 25 ma pa i la tana boko tuk ta ra bung ba i kava ra bul tutana tana, ma i tar ra iangina ba Iesu.