1 A tutana nina ba ra vavina i kava,

Pa i lolokon kana nilaun, ma ra do na niligur i nunure tana.

2 I da ra pupu na davai i gol rikai ma di doko mule;

I da ra malur na bakut i vana lulut ma pa i ki vatikai ta ra kopono pakana.

3 Ta ra ava u mono bat ta tikai damana,

Ma u ben ia pi una ki na varkurai pirana?

4 To ia bar na mal pukue ra magit i dur pi na gomgom?

Pa ta tikai.

5 Di ga luk value kana umana bung, ma ra niluluk i kana umana gai i ki piram,

U ga tar vakilang ra langun ta kana nilaun, ma pa i tale ba na bolo lake tana;

6 Una lingan irai kan ia pi na ngo,

Tuk tar na pait ot pa kana bung da ra tena papalum di kul ia.

7 Tago i tale ra davai ba di mut vue pi na gol mulai,

Ma ra golina tana pa na maranga;

8 A dovotina ra okor i ra davai i ki vavuan ta ra pia,

Ma ra paina nina ba ra golina i arikai tana i maroto; 9 la kaka ra golina na ibul ba i kap ra polo,

Ma na vung ra umana ingaingarina da ra davai.

10 Ma ra tutana iat i mat ma i vana;

I vung vue ra tulungeana, ma i ki ave?

11 Da ra polo ta ra tava kikil i panie,

Da ra tava alir i mama ma i ge;

12 Damana ra tarai dia va ma pa dia tut rikai mulai,

Ma gala ra bala na bakut i panie diat a va mat boko,

Ma pa diat a tavangun mulai.

13 Ea, boina ba una ive iau ta ra ruarua na tulungen,

Ma una vaparau iau tuk tar kaum kankan na ngo,

Ma ba na ot muka kaugu e, una nuk pa mule iau!

14 Dave, ra tutana na laun mulai ba i tar mat?

Gala damana, ina tur padikat ta kaugu tiniba

Tuk tar di valangalanga iau.

15 Una oro upi iau, ma ina bali u;

Ma una anan upi ra papalum na limam.

16 Una balaure bat kaugu vinavana,

Ma una nuk vue kaugu varpiam.

17 Kaugu varpiam una ang bat ia ta ra popopoi,

Ma una vi vake kaugu nirara.

18 Ia kaka ra lualuana dia bura tagigi,

Ma ra vat i tapulpul,

19 A tava alir i vaduladula ra umana vat,

Ma ra lovon i kal vue ra pia;

Damana u nila vue ra ninunuk ung kai ra tutana.

20 A dekdekim i uvia pa ia, ma i panie;

U vaenana pa ra pal a matana, ma u tul vue.

21 Di ru ra umana natuna, ma ia iat pa i nunure;

Dia vavirvir, ma pa i kapa tana.

22 I kairane ke ra kinadik ta ra pakana iat,

Ma i tabun uka ure ia iat mulai.