1 Luluai, u ra God na varobo,

U ra God na varobo, una pupua rikai!

2 Una tut, u ra tena varkurai kai ra rakarakan a gunagunan,

Una tul tar ra balbali ta diat i kolakolo ra nuknuk i diat.

3 Luluai, aivia ra bung boko,

Aivia ra bung a umana tena varpiam diat a gugu mat?

4 Dia malamala tene ta kadia peal tinata;

Diat par a umana tena pait ra kaina dia tibuna vavagia pa diat mulai.

5 Dia pamar gigi kaum tarai, Luluai,

Dia vakadik kaum tiniba.

6 Dia ubu ra ua na vavina ma ra vaira,

Dia doko ra umana nat na ling.

7 Ma dia biti: Ra Luluai pa na gire,

Ma ra God kai Iakob pa na nuk pa ia.

8 Avat a umana koloata, avat a nuk pa ia,

Ma avat a umana lunga, vingaia avat a matoto?

9 Nina i ga pait ra tatalinga pa na valavalongor vang?

Nina i mal ra kiau na mata, pa na gigira bar?

10 Nina i vateten ra umana Tematana pa na varpit laka?

Nina i vaminana ra tarai,

11 Ra Luluai, i matoto ta ra lavur nuknuk i ra tarai,

Ba a magit vakuku.

12 Luluai, i ti doan nam ra tutana ba u vateten ia,

Nina u tova ta kaum tinata na vartovo,

13 Upi na ki mamal ta ra kaina bung,

Tuk tar ta ra bung ba di kal pa ra tung tana ure ra tena varpiam.

14 Tago ra Luluai pa na vung vue kana tarai,

Ma pa na vana kan kana tiniba.

15 Tago a takodo na varkurai na vana rikai tai ra tena takodo,

Ma diat par i dovot ra bala i diat. diat a mur ia.

16 To ia na tur maravut iau ure ra umana tena varpiam?

To ia amir, upi amir a tur bat ra umana tena pait ra kaina?

17 Gala ra Luluai pa na ga maravut iau,

Gala ra tulungeagu na ga ki lulut ta ra gunan na minat.

18 Ba iau ga biti: A kaugu i tagalir,

Kaum varmari, Luluai, i ga vatur vapadikat iau.

19 Ba i alaala ma i ngarao ra nuknukigu,

Kaum lavur tinata na varmaram dia vagagane iau.

20 Amur a talaina dave ma ra varkurai kai ra umana tena varpiam,

Nina dia pait vaarike ra bilak na mangamangana ma ra varkurai?

21 Dia vana varurung upi diat a tur bat ra nilaun kai ra tena takodo,

Ma dia kure vakaina nina pa i rara.

22 Ma ra Luluai i da ra dekdek na pal na bakbakit piragu;

Ma kaugu God i da ra vat ki iau rivarivan tana.

23 Ma na vatalil kadia varpiam upi na ki ta diat iat;

Ma na vamutue diat ure kadia kaina papait.

Ra Luluai kada God na vamutue diat.