1 Da ra madoldol na mavoko ta ra kilala na keake, ma da ra bata ta ra e na varuruai,

Damana ra variru pa i topa ra lunga.

2 Da ra levon i tenten vurvurbit, da ra tamatamele ba i purpururung;

Damana ba di tata kakaina vakuku, pa i pukai.

3 A virvirit ure ra os, a al vakai ure ra as,

Ma ra davai ure ra tamuru i ra umana lunga.

4 Koko una bali ra lunga vardada ma kana tinata na papaua,

Kan u bula amur a varogop me.

5 Una bali ra tinata kai ra lunga varogop ma kana papaua,

Kan i nuk ia ba ia ra tena kabinana.

6 Nina i tulue ra lunga ma ra tinata,

I pakat kutu vue ra kakene iat, ma i vakaina mule ia iat.

7 A ura kak i ra kakak pa dir dekdek,

Damana ra tinata valavalar pa i topa ra ngie i ra lunga.

8 Nina i pite pa ra lunga

I da ra rat na ngatngat na vat ta ra anguvai vat vakuku.

9 Da ra kait i tur ra lima i ra tutana i longlong,

Damana ra tinata valavalar ta ra ngie i ra lunga.

10 Da ra tena pinanak nina i vakinkin ra tarai par,

Damana nina i tokom ra lunga ba i vana alalu.

11 Da ra pap i lilikun tadav ra magit i ga marue,

Damana ra lunga ba i pait mule kana mangamangana papaua.

12 Dave, u gire tikai ba i malamala tena kabinana?

Kan ra lunga na mal kana mangamangana, ma nam pata.

13 A tabauma i biti: A kon aro ra pia!

A leon i ki ta ra nga!

14 Da ra banbanu i pukpukuai ta kana lililikun,

Damana ra tabauma i pukpukuai ta kana vava.

15 A tabauma i vung ra limana ta ra la;

I talanguan, ma pa i tak vaarike mule pi na tulue ta ra ngiene.

16 A tabauma i nuk ia ba i manga kabinana

Ta ra lavurua na tutana nina ba i tale diat ra tinata na minatoto.

17 Nina i maravut ta ra varngangar ba vakir kana,

I da tikai i vatur vake ra talinga i ra pap.

18 Da ra longlong nina ba i vue ra biro na ul,

Ma ra pu, ma ra minat,

19 Damana ra tutana i tuam pa lalaina,

Ma i biti, Iau varvaula ka!

20 Ona pa ta davai, ra iap i mat;

Ma ona pa ta tena varmaianao, ra varngangar i ngo.

21 Da ra pal a kaka ta ra lakit, ma ra davai ta ra iap,

Damana ra tena vartoto i vabirao ra varngangar.

22 A tinata kai ra tena varmaianao i varogop ma ra magit i kalakalami,

Ma i ruk ra bala i ra tarai ara iat.

23 A kalakalami na tinata ma ra kaina nuknuk

Dir varogop ma ra la na pia ba di kola ma ra buabuai na silva.

24 A tena milmilikuan i tavir ma kana tinata,

Ma ta ra balana i vung vake ra vartuam;

25 Ba i marmari kana tinata, koko una nurnur tana;

Ta go lavurua na bilak na magit dia ki ta ra balana;

26 Ma ba i turup kana milmilikuan ma ra vavagu,

Da ga vaarike vakapa boko kana bilak na mangamangana ta ra luaina mata i ra kivung.

27 Nina iat ba i kal ra ubu na bura tar tana,

Ma nina ba i pul ra vat, na lilikun mulai pirana iat.

28 A tena vaongo i milikuane nina ba i tar bereng ia,

Ma ra tena varmananai vakuku i vuna ta ra vinirua.