1 Luluai, una nuk pa ra magit i tar tadav avet;

Boina una gire kaveve kini na vavirvir.

2 A gunan nina ave ga kale pa ia di tul tar ia ta ra umana vaira,

A kubakuba i vevet ta ra umana Tematana.

3 A umana nat na ling avet, pa ta tama i vevet,

A umana na i vevet dia da ra umana ua na vavina.

4 Ave tar kia kaveve mani upi ta tava na nimomo;

Di ivure kaveve davai pire vevet.

5 Diat dia korot mur avet dia ki taun ra inoa i vevet;

Ave tar talanguan, ma pa ave ngo ta ik.

6 Ave tar lulul ma ra tarai Aigipto.

Ma damana ma ra tarai Asiria, upi avat a en ta magit.

7 A umana tama i vevet dia tar varpiam, ma dia tar panie;

Ma ave kairane ra balbali ure kadia varpiam.

8 A umana tultul uka dia kure avet,

Ma pa ta na akari ba na valaun avet kan ra lima i diat.

9 Ave varurue ra aveve magit, ma ave to na virua tana,

Ure ra pakat na vinarubu arima ra pupui.

10 A pal a paka i vevet i avian da ra ubu

Ure ra ngala na oao ta ra mulmulum.

11 Dia ga vakaina ra vaden Sion,

Ma ra umana inip na vavina ta ra lavur pia na pal Iuda.

12 Di tar al vatokobe ra umana luluai ta ra lima i diat;

Pa di ru ra mata i ra umana patuana.

13 A umana barmana dia puapuak ra vat na uduudu;

Ma ra umana bul dia burabura ba dia kakave ra davai.

14 A umana patuana pa dia ki mulai ta ra mataniolo.

Ma ra umana barmana dia tar ngo ta ra malagene.

15 A gugu ta ra bala i vevet i tar par;

Di tar pukue kaveve malamalagene pi na varogop ma ra tinangi.

16 A kere na luluai i tar bura kan ra ulu i vevet;

A umana biaui avet! Tago ave tar varpiam.

17 Ure go, ra nuknuk i vevet i tar bilua;

Ure go ra lavur magit, ra mata i vevet i tar gamgavul;

18 Ure ra luana Sion nina i tar lingling;

A umana kuabar na pap dia limlibur tana.

19 U Luluai, u kiki vatikai,

Kaum kiki na king i tur vatikai ta ra lavur taun tarai pa na mutu.

20 Ta ra ava u valubane vatikene avet,

Ma u ki kan avet mangoro na kilakilala?

21 Luluai, una valilikun avet piram, ma avet a lilikun;

Una vakalamane kaveve kini da amana.

22 Ba kan u tar okole vakakit vue avet,

Ma u kankanuane tuna avet bar?