1 Iau ra tutana ba i tar kairane ra kinadik ta ra vivirit kai kana kankan.

2 I tar agur pa iau, ma i tar ben pa iau upi ina vana ta ra bobotoi, ma vakir ta ra kapa.

3 A dovotina i tar tur bat vatikene iau ra bungbung parika.

4 I tar vabibian ra vio na pakagu ma ra pal a pakagu; i tar bubur ra umana urugu.

5 I tar papait bat iau, ma i tar vaki ra magit i mapak tuna kikil iau, ma ra kinadik i tup iau.

6 I tar vaki iau ta ra umana gunan na bobotoi, da diat dia tar mat amana tana.

7 I tar liplip bat iau upi koko ina irop; i tar vamamat ra agu vinau na palariam.

8 Maia, ba iau oro ma iau kail upi na maramaravut iau, i banu bat vue kaugu niaring.

9 I tar pore kaugu nga ma ra vat di ga mut ia, i tar vagene kaugu lavur nga.

10 I da ra bear* A bear, tika na mangana leing, a tena varkarat, ma i ngala ra dekdekina. piragu ba i kiki uai, da ra leon ta ra lokor.

11 I tar varara iau na nga, ma i tar kadal iau; i tar valingling iau.

12 I tar lale kana panak, ma i valabat upi iau ma ra pu.

13 I tar go ra balagu ma ra umana pu ta kana popopoi.

14 Iau ra magit na varkulumai pire kaugu tarai par; ma dia varvaula ure iau ra bungbung par.

15 I tar vabuka iau ma ra magit i mapak, i tar tabar vamaur iau ma ra kini na malari.

16 I tar bubur ra pal a ngiegu ma ra raga, i tar tuba iau ma ra kabu na iap.

17 Ma u tar kari vavailik vue ra balagu kan ra malmal; iau ga valubane ra bo na kini.

18 Ma iau ga biti: A dekdekigu i tar panie, ma pa iau nuk upi mule ta magit tai ra Luluai.

19 Una nuk pa kaugu kinadik ma kaugu kini na malari, ra magit i mapak ma ra tava i mapak.

20 A balagu pa i valubane dir boko, ma i ki na niligur.

21 Iau nuk pa go, kari iau papait na nurnur.

22 A varmari kai ra Luluai i vuna tago pa da tar imur, tago kana varmar i tur tukum.

23 I kalamana vatikai ta ra bungbung na malana; ma u dovot tuna.

24 A tulungeagu i biti: A Luluai kaugu tiniba, kari ina nurnur tana.

25 A Luluai i mari diat dia nurnur tana, i mari nina i tikatikan upi ia.

26 I topa ia ba ra tutana na ki nunur ma na ki vovovon upi ra valavalaun kai ra Luluai.

27 I topa ra tutana ba na. puak pa ra kip ba i barmana boko.

28 Boina ba na ki varkolono ma na ki mut uka, tago i tar vung tar ia.

29 Boina ba na vung ra ngiene ta ra tobon; ona damana kan na boina mulai.

30 Boina ba na pukue tar ra pagupagu na ngiene ta nina i par ia; boina ba na tup ia ra varvul pirana.

31 Tago ra Luluai pa na varvarokoloi pa na mutu.

32 Tago ba i varvatakunuan, namur i varmari mulai varogop ma kana ngala na varmari.

33 Tago vakir i gugu pi na vakadik ra tarai, ba upi na vatakunuan ra bala i diat.

34 Ba di rua bereng ra umana vilavilau ta ra rakarakan a gunagunan,

35 Ba di kure varara ra takodo na magit kai ta tikai ta ra luaina mata i ra Ngala Kakit,

36 Ba di pukue varara ra varkurai ure tika na tutana, ra Luluai pa i manane nam.

37 To ia i tatike ra tinata ba da pait ot pa ia, ona ra Luluai pa i vartuluai tana?

38 Dave, ra boina ma ra kaina pa i vana rikai ta ra ngie i ra Ngala Kakit vang?

39 Ta ra ava ra tutana a launa i tata na urur, ra tutana di bali kana varpiam pirana?

40 Boina dat a tikatikan ta kada lavur mangamangana, ma dat a valar ia, ma dat a vana tapuku tadav ra Luluai.

41 Boina ba ra nuknuk i dat ma ra lima i dat na araring tadav God arama ra bala na bakut.

42 Ave tar varpiam, ma ave tar tut na varpiam; ma pa u ga nuk vue.

43 U tar punang taun avet ma ra kankan, ma u tar korot mur avet; u tar vardodoko, ma pa u ga varmari.

44 U tar pulu mule u ma ra bakut upi koko kaveve niaring na ruk piram.

45 U tar vaki avet da ra magit i kerek, ma da ra puta livuan ta ra umana Tematana.

46 Kaveve lavur ebar par dia tar manga panganga tadav avet.

47 A bunurut ma ra tung dir tadav avet, a nila ma ra vinirua.

48 A lur na matagu i varababakai da ra tava i alir ure ra vinirua i tadav kaugu tarai.

49 A matagu i manga lur vatikai, ma pa i ngo pit,

50 Tuk tar ta ra bung ra Luluai i gigira ba, ma i bobe marama ra bala na bakut.

51 I kadik ra balagu ta ra magit iau gire ba i tadav ra vaden ta kaugu pia na pal.

52 Diat dia ebar vakuku tadav iau dia tar korot vakaina iau da di korot vakaina ra beo.

53 Dia tar vamutue kaugu nilaun ta ra pal na banubat, dia tar tupar iau ma ra vat.

54 A ulugu i dudu ta ra lubu; iau ga biti dari: Iau tar virua.

55 Iau ga kail upi ra iangim, Luluai, mara iat ra tung.

56 U tar valongore ra nilaigu; koko una ang bat ra talingam ba iau kakail upi ra maramaravut.

57 U ga kakari maravai ta ra bung iau ga kail u; u ga biti: Koko u burut.

58 Luluai, u ga varkurai maravut iau; u ga valaun iau.

59 Luluai, u tar gire ra kaina magit di pait ia tagu; una varkurai ure iau.

60 U tar gire kadia varobo par ma kadia lavur varpit upi iau.

61 U tar valongore kadia varvul; Luluai, ma kadia lavur varpit upi iau;

62 Ra tinata kadiat dia tut na vinarubu ure iau, ma ra magit di nuk vakuku pa ia ure iau ta ra bung parika.

63 Una gire ba dia kiki ma ba dia tut; dia kakailai na varkulumai ure iau.

64 Luluai, una babali pire diat varogop ma ra papalum na lima i diat.

65 Una valeo ra bala i diat; kaum varvabilak na tadav diat.

66 Una korot diat ma ra kankan, ma una ga vamutue diat kan ra vavai ra bala na bakut kai ra Luluai.