25
Guyau Mosese i iyaviya be nogonogo tunisitunisi nenesiyai namoḡa sina kavenenakaoḡowa ebe ina ovivita Guyau yana Vada Tafutafuna kana kiyona nenei.
Guyau Yana Vada Tafutafuna
8 Yave Mosese i nusifufuwiya i bwaduwa, “Namoḡa yaku Vada Tafutafuna sina yoniya ebe kasi kawasasai ana fakwa. 9 Vada Tafutafuna kwana yoniya na kana nogonogo matatafuna yaku nuwanuwai ana visawaveniwa maise.”
Dedeni Kana Koni
Yauna 37:1-9
10 Yota Yave yana sifufu i nusaviya i bwaduwa, “Namoḡa koni sina fufuniya kai kana wava akasiya nenei. Kana fwafwa kana nubwayou kana niva o 110 senitimita, kana nafanafa kana niva o 66 senitimita eketa yana vivivane kana niva o 66 senitimita. 11 Gonudi-keyakeyana nenei sinena be kwauna kuna vitauniya eketa gonudi nenei kuna okanikanibubuna-fanakwaniuwiya. 12 Nowanowa nufunina vigonudisi kuna fufunisiya keta koni kaenei nuwesi nowanowa fafaninei yota nuwesi fafaninei kuna vikanafwatafwataoḡonisiya. 13 Akasiya kai nenei kewa kuna tasisiya keta gonudi nenei kuna vitaunisiya. 14 Nowanowa koni kafakainei kewa kuna ketokwanisiya ebe nenesiyai kwana uniiya. 15 Kewa o nowanowa sinesiyai sina fakwa eatu muka kwana nusoniyagina. 16 Tovanama gabana nuwesi beyabeyasi nenesiyai yaku visime 10 viviginiwisi ana veniwa, koninama nenei kuna totoisiya.
17 Ibeniu 9:5Koni kana gudu gonudi-keyakeyana nenei kuna fufuniya kana fwafwa kana nubwayou kana niva o 110 senitimita keta kana nafanafa kana niva 66 senitimita. 18-19 Eketa kifukifufuna nuwesi na fefesi kasi wava senabimu, gonudi nenei kuna tutuvikuvikukunisiya eketa kuna givifotisiya kana gudu nenei ebe kuna nutamokisiya. Gudu bwatanei bwatanei senabimu nuwesi kuna tenisiya. 20 Fefesi sina katataḡa kunausi eketa gudu sina nukovataniya. Gudu bwatasiyai sina vikasaḡasaḡa ebe sina kitasobuwa gudu kuweyaina. 21 Eketa koni etanei gudunama kuna teniya eatu sinenei o gabanisima beyabeyasi nenesiyai yaku visime 10 viviginiwisi ana veniwa, kuna totoisiya. 22 Dedeni kana koni kana gudu etanei eatu senabimu kasi sinefouwai, nokomai ana nisaiwa eketa yaku visime matatafuna Isineni fasisiyai ana veniwa.”
Guyau yota Mosese i iyaviya namaise sonama tunimokena kana kiyona fasinei, be kafa guvimamadi kana didiḡa gonudi nenei ina fufuniya, eketa kimayeta yana kafa misini vigonudina vinaḡanaḡanina ina fufuniya be kimayeta 7 kasi kafa dawana fasinei. Yota i iyaviya Mosese namaise Vada Tafutafuna ina vimisiniyei keta sinenei nuya nenei ina sifaonosiya ebe totomu nuwesi eyo ina kanififiniya. Yota i iyaviya be yomuyomu kasi kafa vikanakooḡa bwanaosena kana didiḡa ina fufuniya kainumu kana wava bononisi nenei yota kaboma nakasina kafa katumimi.