Na Mamfaruy Chamag Wi Inyug-is
Lucas
1
Surat Lucas An Teofilo
1 Apu Teofilo, akammuta wi achun nangip-ippong wi nangiyug-is mipangkop ta iningwan Jesus ta iningkawanad asnay luta. 2 Inyug-ischan chingngorcha ta inug-ugkud chachi nangiila ta nànàwa nanipud ta lukina, wi chichan nangisursuru ta Mamfaruy Chamag an chitau. 3 Siyan, Apu, kapu ta ninarmà inachar losan na anchanayay nàwa nanipud ta nilukiyancha, simsimmòuy mamfaru nu narmà wi mangisurat an sia, 4 à mangakammuwam ta katuttuwaan na nitudtuchun sia. Ad amasnan nàwaana.
Na Nipaakammuwan Na Miyanaan Juan Wi Mamfufunyag
5 Na timpun na manturayan Ali Herod ad Judea, iningkaw na osay pachin na Judio wi nangngachan à Zacarias, wi kanà Abias wi miyawaruy sùnub wi pachi. Na asawanay Elisabet, kanà Aaron wi ap-apun na papachi. 6 Na anchanay man-asawa, mamfarucha an Apudyus tan tinungparcha losan na lintogna ya tudtuchuna. 7 Ngim maid pu anàcha tan fasig à Elisabet, ya narakarakaycha.
8-9 Na osay padchay nan-iwaaran Zacarias wi pachi ta Templo, namfinfinnunut na papachi tan sachin ukalichà mangil-ancha nu sinun lumnò ta charom na Templon Apudyus ta timpun na malluwaruwan. Ad Zacarias na nafunut, siyan linumnò à siyà mam-u ta insenso. 10 Ad na nam-uwana ta insenso, iningkaw na takuy ad-adchuwan ta lasin wi malluwaru.
11 Sachi ad, nampailan Zacarias na osay anghel Apudyus, wi ummagsad ta apot ta machiwawan ta pupùwan à insenso. 12 Ad nataag à Zacarias ta nangil-ana ta anghel, ad naosyawan. 13 Ngim kummingan sachi anghel, wi anana, “Zacarias, achia umogyat! Tan chingngor Apudyus na luwaruyu. Umanà na asawam wi Elisabet à larai, ad ngachananyù siyà Juan. 14 Lumagsak-ayu mipakapun siya, ya uray na achuy taku! 15 Ad à Apudyus, ifilangnà siyà nangatu. Manipud ta mifùnakana, makarong-ag na Ispiritun Apudyus an siya. Ad masapur achi pu uminum à isun na fayas winnu sinumani sumalimong. 16 Ad mipakapun siya, mansakung na achuy kanà Israel an Apudyus ta umapuchan siya. 17 Ad sakanaonan chumatngan na Aputau, wi na oyyoona, isun na sachi profeta wi Elias ta awi, wi isun akon karobfongana. Tan mantitimpuyukonan somsomò na man-aama, ad faliwanan somsomò na takuy achi pu mamati, ta miyisun somsomòcha ta somsomò na mamfaruy taku. Sachin mangisakanaana ta takù mangngorancha ta Apucha nu umali.”
18 Ngim anan Zacarias ta sachi anghel, “Sinun manuttuwaà wi màwan sanati ifagfakam? Tan narakarakay-ani wi man-asawa.”
19 Ad anan na anghel, “Saon à Gabriel wi ingkaw ta sangwanan Apudyus. Ad imfaunà an siya wi umali mangifakan sia ta annayay mamfaruy chamag. 20 Ngim kapu ta achim pu tinuttuwan imfakà, achia pu makakinga ingkanà màwaan na annay imfakà. Tan tuttuway chumatong na ustuy timpuy màwaana.”
21 Na takuy nanguullay an Zacarias, naschaawcha tan nafayag ad charom na Templo. 22 Ngim lummawa pù Zacarias, naawatancha wi awad na impailan Apudyus an siya ad charom, tan achi pu makakinga, wi imana kan insingsingyarna.
23 Narpas pun na iwaar Zacarias ta Templo, nangulin ad ilicha. 24 Ad naarkawanan ad, nangngilin à Elisabet, siyan iniingkaw ad foroychà limay furan. 25 Ad anana, “Tuttuway inachakuwanà an Apudyus, tan inaannan mifafainà tan annan anàu!”
Na Nipaakammuwan Na Miyanaan Jesu Cristu
26 Na miyanomi furan ta fukin Elisabet, imfaun Apudyus na anghel wi Gabriel wi umoy ad Nazaret wi osay ilid Galilea. 27 Iningkaw na umoyna ifaka ta osay fafarasang wi nangngachan Maria. À Maria, nipagta ta osay larai wi nangngachan Jose, wi osay kanà Ali David. 28 Nampaila pun na anghel an Maria, anana, “Lumagsak-a! Annat à Apudyus an sia ad fininchisyunanà sia!”
29 Naos-osyawan à Maria ta nangngorana ta imfakan na anghel, ad som-osom-ona nu sinun mining na inukudna. 30 Ad anan na anghel an siya, “Achia umogyat, Maria! Annayan mangichayawan Apudyus an sia: 31 Mafukia, ad umanàà larai, ad ngachananyù siyà Jesus. 32 Mapatog à siya ya maawakan à Anà Apudyus wi Angatuwan, ya ipatawid Apudyus an siyan kinaalin David wi apuna ta awi. 33 Siyan man-Ali ta losani kanà Jacob à ing-ingkana, wi maid pu mapagpakan na manturayana!”
34 Ad anan Maria ta sachi anghel, “Ngim fafarasangà, ya maid pu nakasuyop an saon à larai. In-inon na màwaan na ug-ugkuchom?”
35 Ad summongfat na anghel, anana, “Umalin Ispiritun Apudyus an sia, ad mafukia kapu ta karobfongan Apudyus. Siyan na anà wi iyanànu, maakammuwan wi maid pu fasurna, ad maawakan à Anà Apudyus. 36 Somsom-om à Elisabet, wi akim, wi ananchay fasig. Ngim uray nu amaschi, onom furan na fukina ta sana, uray narakay. 37 Sachin mail-ana wi maid achi mafalin an Apudyus.”
38 Ad anan ako Maria, “Saniluwà an Apudyus. Siyan màwa losan na imfakam an saon.” Sachi ad lummayaw na anghel.
Ummoy Maria Finisità Elisabet
39 Naarkawanan ad, lummigwat à Maria ad kinankanasnay ummoy ta osay ili ta filfilig ta provinsiya wi Judea. 40 Chummatong pun, linumnò ta foroycha Zacarias ad finagfakanà Elisabet. 41 Chingngor pun Elisabet na kingan Maria, nan-isin fukina. Ad impaspasmò na Ispiritun Apudyus an Elisabet, 42 ad chinakornan kinganay mangwanan an Maria, “Ta losani fufai, sian chinutukan Apudyus wi mangadchanà afaruwan, ad machaychayaw na anà wi iyanànu!” 43 Ad anana ko, “Sinun kinatatakù wi annay umali fumisitan saon na inan na Aputau? 44 Tan chingngor-u pun na kingam, nan-isin fukì ta tottoròna. 45 Ad maragsak-a ko, tan pinatim wi tumuttuwan losani imfakan Apudyus an sia!”
Na Manayawan Maria An Apudyus
46 Sachi ad anan Maria,
“Chaychayawò à Apudyus,
47 ya naragsakà ako mipakapun siyay Manaraknib an saon,
48 tan simsimmoà an siya wi kafafaan ta takuna!
Siyan manipud ta sana, anan na losani taku wi nakasatà,
49 tan à Apudyus wi Mannakafalin, kaskaschaaw na iningwanan saon.
Tuttuway machaychayaw à siya wi maid fasurna.
50 Achakuwana losan na takuy mangiyafain an siya ta arunarunap nanipud ta chamchamu
ya ingkanà anungus na lufung.
51 Na iningwana, sachin mangipail-ana ta karobfongana.
Ad kinassawnan puranun na losani mamàpail-on.
52 Impafafanan nangangatuy ali,
ad impangatunan nafafa.
53 Chachi manchawat à fachang, achun inadchonay mamfaru an chicha.
Ngim chachi nanat-op ta kinafarucha, imparyawnà chicha wi maid inadchona.
54 Tinungparnan sachi impustana ta aapputau ta awi,
ad fafadngan chitauy kanà Israel.
55 Foon à maliwatanan sachi impustanan Abraham ya losani kanàna,
tan achakuwan chitaù ing-ingkana.”
56 Ummoy à turuy furan na iningkawan Maria an Elisabet achiyot lumayaw.
Na Niyanaan Juan Wi Mamfufunyag
57 Nachauman pun na umanaan Elisabet, inyanànan larai. 58 Ad chingngor pun na charchar-agna ya aagkina wi inachakuwan Apudyus à siya, nakaragsakchan siya.
59 Na awarun padchan na anà, ummoycha impasingyar à manungparancha ta Lintog. Ad na uchum, pionchay ingachan à Zacarias wi ngachan na amana, 60 ngim anan na inana, “Foon, Juan na mangngachanna.”
61 Ad anancha, “Tamako, tan maid pu akiyù nginngachan à Juan!” 62 Sachi ad insingyarchay mangimus an amana nu sinun pionay ipangachan ta anàna.
63 Ad insingyarnay mampaarà mangug-isana, ad inyug-isna, “Na ngachanna, Juan.” Ad naschaawcha losan! 64 Ad na sachi, nakakingà Zacarias, ad nan-ukud wi nanaychayaw an Apudyus. 65 Ad naschaaw losan na charchar-agcha. Ad losan na taku ta filfilig ad Judea, chinamagcha kon losani nàwa. 66 Ad losan chachi nangngor, som-osom-oncha nu, “Sinu nin na mamfalinan na sanati anà nu chumakor?” Amaschin somsomòcha tan narawag wi annan karobfongan Apudyus an siya.
Na Nangifag-an Zacarias Ta Impaspasmò Apudyus
67 Ad naatod na Ispiritun Apudyus nakarong-ag an Zacarias wi aman Juan, ad imfakanan impaakammun Apudyus, anana,
68 “Chayawontaù Apudyus wi Aputauy kanà Israel,
tan annay ummali wi mamachang an chitauy takuna ad sinaraknifanà chitau.
69 Tan imparoswanan osay mannakafalin à manaraknib an chitau,
wi kanà na sanilunay Ali David.
70 Ad impaakammuna ta chachi naapudyusani profetasna ta awi na impustana.
71 Na osay impustana, saraknifanà chitau
ta afusurtau ya karobfongan na losani mallawing an chitau.
72 Na osa koy impustana ta aapputau, achakuwanà chicha
ad sosom-onan inturagnan chicha.
73-74 Na impustanan Abraham wi aputau,
insapatana wi saraknifanà chitau losan ta afusurtau
ta maid umogyatantauy mangwa ta piona,
75 tapnu maid makafasurantau ya miyustuustun oyyoontau,
ta sanay atattakutau.”
76 Ad nan-ukud akò Zacarias ta anàna, wi anana,
“Siay anàu, maawakan-à osay profetan Apudyus wi Angatuwan.
Ad sian paunaon Apudyus mampasakanaon ta taku ta chumatngan na Aputau.
77 Ad sian mangipaakammu ta taku wi masaraknifancha
nu ipakawanchan fasurchan siya.
78 Tan à Apudyus, masayaaw ya isag naanus,
ad na manaraknifanan chitau, isun na sumingitan na init.
79 Isù iingkawtau ta pangot tan amod na ogyattau wi matoy.
Ngim nu chumatong na Aputau, lawakanà chitau ad pafaruwonan somsomòtau ta mitimpuyugtaun Apudyus.”
80 Ad chummakor na anàcha, ad pummigsan somsomònan Apudyus. Ad ummoy iningkaw ta ikaw wi maid pu umili ingkana ta timpun na mangilukiyanay mantudtuchu ta chachi kanà Israel.