1 I̱ Tobidi kogo i̱na i̱ henego ogodagua bialu haruli lalu te lolebero. I̱ aba Tobiele howa Tobiele aba Ananiele howa Ananiele aba Aduele hene. Aduele aba Gabaele halu Gabaele aba Labaele howa Labaele aba Laguele hene. Laguele ibu Asiele mbira henego aria howa Asiele ibu Nabadali hameigini hearu aria mbirago hene. 2 Kini Salamanese ibu Asiria wali agalinaga kini heangi tigua i̱ aba dindi Tisibeni I̱ garabaya helaya. Dindi ogoni Galili dindinaga abene uyurahayagi nga. Gendese tano ngagonaga abene unurahayagi wialu dindi ogoni Nabadali hameigini dindiha wini. Ani bialu tano kira Haso Pogosala kawereni nga.

3 I̱ Tobidi kogo i̱na mana bayale tigabiore ngago bialu haabo holenaga bialu haga kogoni. I̱na i̱ dameneru muni mbirale burupale howa tubagi ho karuhondo tale bu miruli. Ani bialu wali agali maru i̱ni heba mandagi garabaya Asiria dindiha tano timbuni Niniba ngagoria bu karuhondobi nde talebu mia dege biruli.

4 Ngode Datagaliwabe ibunime Isaraele dindiha tano maru wiaru ngelowa Yarusaleme tano wali agalime ibunaga loma anda ogoriani bilonaga dabene. Loma anda ogoni Ngode Datagaliwabe ibuni andagaore haabo helonaga ani bini. Isaraele wali agali tigua anda ogoniha pialu Anduane Homogohondo lomaru bu migi bialu helonaga anda ogoni Ngode Datagaliwabe ibunioreme dabo helene. Ani buwa i̱ igiri emene hewangi i̱ mamalinaga dindini hewagola Nabadali hameigini bibahendeoreme Yarusaleme erembira mialu Debidi igini aguaneru kini hearubi erembira mialu bini. 5 Anidagua bialu Isaraele hameigini bibahendemebi i̱ aba ai̱ya hamene mbalini bibahendeme bi pupu wulenaga gime wabini nogo bulumaganaga bigiya mbira mini Bala laga wiago yu tiga bialu ogonihondo bi pupu wialu hene.✡ 1 Kin 12.26-32

6 Mosesenaga mana lowini ngagome lalu mana ogo wiaabo helo ledagome Ngode Datagaliwabehondo bi lolene horo timbuni tagira ibirangi Isaraele wali agalime Yarusaleme dege piai holene nga lalu lo winigo nga. I̱ damene bu hearu aria mbiraore i̱ni hangume mana ogoni taluwa bialu haruli. Horo bibahendengi i̱na Yarusaleme puabo halu Ngode Datagaliwabehondo lomaru mialu haruli. I̱ mabuha tomo pigane boga biragobi maruale ngaru pihalu tale buwa pinigo Anduane Homogohondo loma bu migi biruli.✡ Man 16.16 7 Mbirale uruni yalu Yarusaleme puwa loma uruni Arono aguane agali loma binigo mo miagaru Anduane Homogonaga lomabu delaga dabu kago kawareni karuhondo miruli. I̱na horo bibahendengi widi lini mbirale maru tale binirubi waini ibabi olibe lini ibanebi ira lini tara tarabi yalu puwa Libai hameigini Yarusalemeni howa Anduane Homogonaga biabe bialu haga bu karu migi biruli. Ani bialu mbirale uruni aria halu mbira talebu bagi henego muni muwa muni uruni yalu turu howa Yarusaleme pialu tomo nolene ngago nalu haruli.✡ Man 14.22-29 8 Ani bialu halu mbira talebu bagi henego i̱ aguane Deborahanda biawai henedagua yagibano karu migi biruli.

9 Ani bialu i̱ anda howa wali mbira i̱ni aria dege mini Ana berenego dabu biru. Ani bialu iya igini mbira mini Tobaiasa hene. 10-11 Ani bialu henego horo mbiru hayagola i̱bi i̱ damene bu hearubi wali agali maru hearubi bibahende minu yalu Niniba piya. I̱na Niniba pu howa tomo ina Isaraele wali agalime nanagane ale wiaru Isaraele wali agalime ta nabi nai halu hene. Ani biragola i̱ dege nane haruli. Ani berodagoni irane 12 i̱na Ngode Datagaliwabe daligaore kago mitangi hongoheore bialu ibugua mana lowini ngago mitangi bialu nanaruli. 13 Ani bialu hewagola Ngode Datagaliwabehanda Kini Salamanesenaga bu mo dambola hayagola ibugua i̱ mo turu halu ibu one waneiginirunaga tomo yolo biaganeru handaya howa haru haga holiya dabo helaya. 14 Ani bialu i̱na Media dindiha pialu kininaga mbirale tara tara ngaru muni yalu yolo bule piruli. Horo mbiru lene Media dindiha tano timbuni Lagese wiagoria pu haru. Tano ogoriani howa muni siliba genda kilogarama handari tebira (300) nuha honowa agali mbira Gabariasa hamene mini Gabaele heago ibugua muni uruni mo wia howa handaya ho helo ibuhondo miru. 15 Salamanese ibu homayagola ibu igini Senageribihanda ibu abanaga henge mialu ibuni kini aribia haya. Ani biyangi agali pagebibi Media dindiha hariga wiaru bibahendeha hai heagola i̱na dindi ogoniha lone pobe nahe haru.

16 Ai Kini Salamanese heangi wali agali i̱ dameneruha genda wiaru i̱nime handaruli. 17 Ti tomo nane garibilo kagola ina ti tomo nelo miruli. Ti aga nabi kagola i̱ninaga aga ti karulelo golo miruli. I̱ hame waneigini mbirago homaragola tingini Niniba tano tagirahayagi mo batagi haragola i̱nime mo yalu puwa baya hangu hora haruli.✡ Yob 31.16-20, Ais 58.7, Ese 18.7, Md 25.35-36

18 Senageribi ibu Yuda dindiha wai bu puwa ai ibida Media dindi dai bialu howa harigani Isaraele wali agali bu hearu bo wahai haga bima dai biyiya. Ani biyagola i̱na homene uruninaga tingini mo yalu pu do howa hora haga biru. Mani Senageribihanda homene tingini biaru ngabe hondole pialu hearia nawiyane hendene.

19 Mani howa Niniba agali mbirame ohowa kini lamialu i̱na agali tingini uruni mo hora haya lalu lamini. Abaleore handalu hewaria kinihanda i̱ bo wahole taya bialu hearia handa walia haru. Ani handa walia halu ai gi timbuni biyagola i̱ ibida puwa mbiraha ha do haru. 20 Kini ibugua i̱naga dabudabu wiwaru damene bibahende mo yai halu ibu andaga yu piyaya. I̱ one Ana i̱ igini Tobaiasala hangu bereneya.

21 Horo karia agima howa Kini Senageribi igini kiralime libu aba homelo bo wahaya. Ani bo wahalu libuni hari mini Ararada weagoha ibida puwa ha do hene. Ani biyagola kini igini mbira mini Esahadono ibu kini aribia hene. Ani howa ibugua igiri mbira i̱ hamene Anaele heago igini mini Ahiga ibugua kininaga gabumane biabe bulene wiarubi gabumanenaga muni wiarubi bibahende handame ho howa haru helo dabo helene. 22 Abale howabi nde Ahiga ibugua kininaga tomo iba wainiru bibahendebi muni dabudabu bibahendebi ibugua handaya ho haga hene. Ai áyubi nde Kini Esahadono ibugua Ahiga ibu biabe ogoni bialu helo helene. Ainde Ahiga ibu i̱ hamene igini howa ibu kini hendore lamiyagola nde kini ibugua i̱ Niniba daibu habe laya.