1 सरदिस सहरता विस्वसिरा मुडादेवतुलतुह्‌क इद्रम रासा: देवुळतग्डाङ एळुङ जीवानु बूममेंड लोहवाल, एळुङ उकान पोयतोग़ु, मीट विस्वसिरिन इनदलाह आतोग़: मीट बेद्रम ताकलाह आतिर इनजोर नना पुतन. मीवा विस्वस जीवात मन्ह्‌ता इनजोर लोकुर इन्ह्‌तोर; मति निटम ऊळतेके, अद डोललाह आता. 2 मीवा ताकमुळि देवुळ विचर कीतप दिसो. अदिनेनाह्‌क उसरते मन्ह्‌टु. इंजेके मीवा पिसतद इचुटा विस्वस डोलनामुनेन, तान बोल्गिह कीम्ह्‌टु. 3 मुने मीट बेद्रम देवुळता पोल्‍लोतुन केंजिसि तान मीवा जीवातगा तासतिर, इदिन सीता कीस ऊळाट. सीता कीसि ताना लेह्‌का पिसाट. पापमता अग़दाहि मल्मटु. मीट उसरते मनवेक अचोन कले वायना लेह्‌कान नना मियगा दोम्ह्‌क्ने वायकन. नना बेद वेलाते वायकन इदिन मीट मुर्तिय पुनविर आयकिर.

4 मति सरदिस सहरतगा उच्‍वुर विस्वसिर मन्ह्‌तोर. तमाङ गेंदेन कळ्न्जवप तासना लेह्‌कान, तमा ताकमुळतुन वने बेस-नेह्‌ना तासतोर. ओर पांड्रि गेंदेङ केग़्तपु सेतेमते नावा ऐंगे-ऐंगे ताकनुर; ओर अद्रम ताकना लायके मन्ह्‌तोर. 5 बोर-बोर लाग्वाङ पोल्‍लोन गेल्सनुर, ओर वने इद्रमे पांड्रि गेंदेङ उहतनुर. ओराङ पेदिर्क देवुळतगा मनदनद अमेसातुह्‌क पिसवालोरा पुस्तकतगा रासतव मन्ह्‌ताङ, तानग्डाहि ओराङ पेदिर्किन उम्ह्‌चोन आयकन. वेर नावा मन्कलोर इनजोर बाबाना मुनेह ओसो तानाङ देवतुल्कना मुनेह वेहतकन. 6 देवुळता जीवा विस्वसिरा मुडुन वेहतनद पोल्‍लोतुन पुनवालोर, बेस-नेह्‌ना केंजिसि विचर कीस ऊळिर.

7 पिलदिलपिया सहरता विस्वसिरा मुडा देवतुलतुह्‌क इद्रम रासा: पवित्र मनवाल, निटम वळ्ह्‌कवाल, तालाम (कुलुप) कय्क तासतप लेह्‌कान दाविद राजाना पटटगा अदिकर तासवाल, बोग़े केहता पग़वाह तेग़्यवाल, बोग़े तेग़्य पग़वाह केहवाल, मीट विस्वसिरिन इनदलाह आतोग़: 8 मीट बेद्रम ताकलाह आतिर, इदिन नना पुतन. मीट उच्वुरे विस्वसिरिर मह्‌निर, मति मीट नावा पोल्‍लोतुन केंजतिर. येसु किर्स्तुन पुनोम इनजोर इनविर. अदिनेनाह्‌क ऊळाट, मीट ओळियलाह नना अग़ तेग़्यतन, तान बोग़े केहता पग़वोग़.

9 केंजाट! उच्‍वुर देयह्‌कना मुक्यानग्डोर मन्कलोर यहुदिर आयोर मति तम्क यहुदिरोम इनजोर नाळेह कीस्तोर; ओर जोल कीस्तोर. ऊळाट, ओर मन्कलोर वासि मीवाङ काल्किन मोळ्कनुर, अद्रम नना कीकन. अस्के नना मीक जीवा कीतन इनजोर ओर पुनदनुर. 10 मीट तिपल आयह्‌पा, नना मीक वेहतद पोल्‍लोतुन केंजिसि तिपलते दीरा पोस मतिर. अदिनेनाह्‌क पूरा बूमते मनवालोरा पट ऊळलाहि इंजेके बूमतगा तिपल वायलाह आता. अद तिपलताहि नना मीक पिसिह कीस तासकन. 11 ऊळाट! नना चट्‌पिटे वायना मन्ह्‌ता. वातस्के मीट गेल्सतिर इनजि देवुळता पिसमुळतुन इनम इनजोर ईकन. तान बोग़े ऊंदना आयो इनजि, मीवा विस्वसतुन पका पोस मन्ह्‌टु. 12 बोर-बोर लाग्वाङ पोल्‍लोन गेल्सनुर, ओरिन नावा देवुळता मंदिरतगा रायि मुंडाता लेह्‌कान निल्पिह कीकन. बोग़े ओरिन अग्डाहि जर्गिह केवोग़ आयनोग़. ओरा पोग़ोन नावा देवुळता पेदिरतुन रासकन. अहे नावा देवुळता सहर पूना येरुसलेम, नावा देवुळता जागातग्डाहि वायना मन्ह्‌ता, ताना पेदिरतुन ओरा पोग़ोन रासकन. ओसो नावाय पूना पेदिरतुन वने ओरा पोग़ोन रासकन. 13 देवुळता जीवा विस्वसिरा मुडुन वेहतनद पोल्‍लोतुन पुनवालोर, बेस-नेह्‌ना केंजिसि विचर कीस ऊळिर.

14 “लोदिकिया सहरता विस्वसिरा मुडा देवतुलतुह्‌क इद्रम रासा: आमेन इनदनद पेदिरतोग़, बर्वस लायकतोग़ निटम साक्सि एवाल, देवुळि पुटिह कीतव सबेटविना मोदुलतोग़, मीट विस्वसिरिन इनदलाह आतोग़: 15 मीट बेद्रम ताकलाह आतिर, इदिन नना पुतन. मीट विस्वसता लोप्‍पा किर्ङविर वने, कासविर वने; किर्ङिसाय मनदना, इलवेके कासिसाय मनदना, अस्के नाक बेस ओप्पग़ा.* 3:15लोदिकिया सहरतोर विस्वसिर पूरा येसु किर्स्तुना विचर मतप लेह्‌का वने पिसवा मंदुर ओसो पूरा विस्वसतुन वने विळ्सिस एवा मंदुर. अदिनेनाह्‌क येसु ओरिन किर्ङविर वने; कासविर वने इनजोर इनदलाह आतोग़. 16 मीट मलमल आतप लेह्‌कान आतिर; किर्ङविर वने, कासविर वने. अदिनेनाह्‌क मीक नावा तोडटाहि उळसीयलाह आतन. 17 विस्वसता लोप्‍पा मीट नसिब लेवोरिर आतिर; दुस्रोर मीक ऊळिस जीवा नोयना लेह्‌का आतिर; गति लेवोरिर आतिर; विस्वसता लोप्‍पा गुडिरिर आतिर, कूळल आतिर; मति तान पुनवा, विस्वसते मता मन्कलोरोम आतोम. पिसनाह-मयनाह माक मन्ह्‌ता. माक बेदिनाय गर्ज इले इह्‌निर. 18 अदिनेनाह्‌क नना मीक बुद काग़्हतह्‌नन, केंजाट: मीट विस्वसता लोप्‍पा निटम मता मन्कलोरिर आयलाहि, किसते कारियिह कीसि जूत कीतद बेसता बंगारतुन नयग्डाहि असाट. कूळल आसि लजा अरस मनदनदिन दुस्रोर ऊळवाह, उहतलाह पांड्रि गेंदेङ† 3:18 गेंदेङ इतेके सेतेम. असाट. मीवा कोंडानगा ओकलाह मत असाट, अस्के तोवयकिर! 19 बोरिन-बोरिन नना जीवा कीतन, ओरिन दगाङ ईकन ओसो सुद्रे कीकन. अदिनेनाह्‌क बेसता विचरते गिर्दा आसि, पापमता अग़दाहि मल्मटु. 20 केजाट! नना दारावंडटगा निच केयलाह आतन. बोर-बोर नावा लेङतुन केंजिसि अग़दुन तेग़ियनुर, ओरगा निटम ओळियकन ओसो ओरा संगे गाटो तिनदकन; ओर वने नावा संगे गाटो तिनदनुर. 21 बोर-बोर लाग्वाङ पोल्‍लोन गेल्सनुर, ओरिनु नना उदिस राजेम ताकिह कीयनद राजकुर्सितगा, नावा संगे उदिह कीकन. बेद्रम नना लाग्वाङ पोल्‍लोन गेल्सिसि, नावा बाबाल उदिस ताकिह कीयनद राजकुर्सितगा ओना संगे उद्‌तन, अद्रम ओरिन उदिह कीकन. 22 देवुळता जीवा विस्वसिरा मुडुन वेहतनद पोल्‍लोतुन पुनवालोर, बेस-नेह्‌ना केंजिसि विचर कीस ऊळिर,” इनजोर वेहतोग़.