27
God Help Me Plenny
One David kine song
1 Da One In Charge, he help me,
An he get me outa trouble,
Jalike he da light fo me.
No need fo me stay sked nobody!
Da One In Charge, he goin make shua nobody kill me,
Jalike he one strong wall fo me,
I no need come sked an shaking.
2 Weneva da bad kine peopo attack me
Jalike fo eat me up,
Dey da ones dat goin come tired an fall down, not me.
3 No matta one whole army put up dea tents fo go agains me,
I not goin come sked.
No matta dey make war fo bus me up,
Fo shua, I no goin worry.
4 Ony get one ting I like tell Da One In Charge fo do fo me.
Dass da ony ting I stay wait fo:
I like stay inside Da One In Charge house
Till I mahke!
I like hang out inside his Temple an feel good inside dea
Fo see how Da One In Charge all da time make good to peopo!
5 Da One In Charge, weneva get hard time,
He goin put me inside his place fo nobody hurt me.
He goin let me stay inside his tent
Fo nobody find me.
He goin put me up high on top one big rock
Fo nobody reach me.
6 So now, I goin be da winna
Ova da guys dat stay agains me,
Dat stay all aroun me.
Weneva I bring animals to God tent fo make sacrifice,
I goin sing cuz I feel good inside,
An make music fo Da One In Charge.
Wen Get Plenny Presha
7 Eh! You Da One In Charge! Try lissen, wen I yell fo you help me.
Make good kine to me, an try do someting fo me.
8 Fo real kine, I like come close to you.
Eh! You Da One In Charge! Dass wat I like fo do,
Go in front you.
9 No hide from me!
No come huhu an tell me fo go way,
Cuz I yoa worka guy,
An you, you da One dat erytime help me.
Eh God! You da One dat erytime get me outa trouble!
No bag from me, no leave me hea lidis!
10 Cuz maybe my faddah an my muddah goin leave me, you know.
But you, Da One In Charge, you goin take kea me.
11 Eh! You Da One In Charge! Teach me how fo live yoa way!
Show me da bestes way fo do da right ting,
Cuz get plenny peopo dat stay agains me,
An dey stay watch me.
12 No let da guys dat stay agains me
Make any kine to me.
Dey make jalike dey tell da trut bout me,
But dey ony bulai.
Ova an ova, dey tell dey goin bus me up.
13 If I neva trus God, den I no goin see
How good Da One In Charge stay.
But fo shua, I know
How good Da One In Charge stay,
An fo shua I goin stay alive.
14 Eh erybody! Try wait!
Da One In Charge goin take kea you!
No lose fight, an no come sked notting!
Wait fo Da One In Charge take kea you!