8
Bildad Tell, God Do Wass Right
1 Den Bildad from Shuh tell Job:
2 “How long you goin talk lidat?
Wat you tell, jalike one storm wind dat jam up eryting.
3 You tink Da God Dat Get All Da Powa, jam up how he judge peopo,
Fo him judge um crooked kine, o wat?
You tink he make wass right, come wrong?! No ways!
4 Gotta be, yoa kids wen do bad kine tings God tell um not fo do!
Az why he punish dem fo da bad kine stuff dey wen do.
5 But maybe you go all out fo know God,
An beg da One Dat Get All Da Powa fo help you!
6 Maybe you come clean inside an do da right kine stuff.
Even now he goin start fo do tings fo help you.
He goin give you back wat you wen get befo time,
Cuz you stay do da right ting.
7 Den, you know, da way you wen start
Goin look jalike you neva have notting,
Cuz bumbye you goin get plenny stuffs.
8 “Try aks da peopo dat wen live befo time.
Make shua you know wat dea faddahs wen learn.
9 Cuz us guys wen born ony yestaday.
Us donno notting.
Oua time on dis earth pau quick, jalike one shadow.
10 Fo shua, yoa ancesta guys goin teach you an tell you.
Dey goin give you words bout da tings dey undastan.
11 Da papyrus plant no can grow tall
If no mo marsh.
Da reeds no can grow big
If no mo watta.
12 Wen da small reeds stay grow
Even if nobody pull um up yet,
Dey come dry mo fas den da grass.
13 Az wat happen to da peopo dat no tink bout God.
Az how da peopo stay dat ack jalike God no matta.
Eryting dey wait fo, come wipe out.
14 Wateva dey tink az good fo dem, goin broke real easy.
Wateva dey trus, jalike one spida web.
15 Da peopo dat no tink bout God lean on top da stuff dey get,
But jalike da spida web, no hold dem up.
Dey try fo make um solid, but no can.
16 Da peopo dat no tink bout God,
Dey jalike one plant dat get plenny watta wen da sun shine.
Az jalike da new branches dat come out all ova da garden.
17 Jalike one plant dat twis dea roots all ova da small stones,
An look fo one place fo hang on to da rocks.
18 But wen somebody pull up da plant from wea he grow,
Az jalike da garden tell da plant, ‘I donno you, I neva even see you!’
19 Dat plant jalike one picha,
Da peopo dat no tink bout God,
Dea life gone awready!
An den, odda peopo come
Jalike dey good plants dat can grow from da same dirt!
20 “Fo shua, God no throw out da peopo dat no mo blame.
But he no help da bad guys come strong.
21 Bumbye, he goin make you laugh plenny one mo time
Cuz you stay good inside.
22 Da peopo dat hate you goin come shame.
Da tents wea da bad kine guys live, no mo awready.”