Da Numba Two Book Bout
Samuel
1
David Find Out Dat Saul Mahke
1 Afta Saul mahke, an afta David win da fight ova da Amalek guys, he stay Ziklag town two day. 2 Day numba three, one young guy show up from da camp wea Saul army guys wen stay. Jus fo show dat he stay sad inside, his clotheses stay rip, an he get dirt on top his head. Wen he come by David, he go down on top da groun fo show David plenny respeck.
3 David aks da guy, “Eh! From wea you come?!”
Da guy tell him, “I wen stay da Israel army camp, but I run away from da Filisha army guys.”
4 David tell, “Tell me, how was ova dea?”
Da guy tell um, “Da Israel guys run away from da fight, an plenny guys mahke. Saul an his boy Jonathan, dey mahke too!”
5 David aks da guy, “How you know dat Saul an his boy Jonathan mahke?”
6 ✡ 1:6: 1Sam 31:1-6; 1Rec 10:1-6Da guy tell, “I jus go Mount Gilboa, an I see Saul ova dea too. Cuz he hurt plenny, he use his spear fo help um stan up. Right den, da Filisha war wagons an da horse rida guys stay come nea. 7 Saul turn aroun an look behind him. He spock me ova dea. He yell to me come by him. An I tell, ‘Shoots! Kay den!’
8 “Saul aks me, ‘Who you?’
“I tell um, ‘I one Amalek guy.’
9 “Den he tell me, ‘Go come ova hea fo kill me! Cuz I hurt real plenny, I almos mahke, but I still stay alive.’
10 “So I go ova dea by him, an kill um, cuz I know fo shua dat wen he fall down, he no goin stay alive. Den I take da crown dat stay on top his head, an da chain bracelet on top his arm, an bring um ova hea by you, my boss. Hea! Take um!”
11 Den David grab his clotheses an rip um fo show he stay sad inside. All da guys wit him, dey do da same ting. 12 Dey stay sad inside, an cry, an skip food till litto mo dark, cuz a Saul an his boy Jonathan, an fo Da One In Charge army, an da Israel ohana, cuz all dose guys get kill wit swords.
13 David tell da young guy dat tell um bout Saul, “Wea you come from?”
Da guy tell, “My faddah guy live inside da Israel land, but he not from hea. I one Amalek guy.”
14 David tell him, “How come you no sked fo kill da king guy dat God wen pick, aah?”
15-16 Den David tell um, “You da guy fo get da blame! Wat you tell, no good fo you, cuz you awready tell me dat you da guy wen kill da king dat God wen pick!”
So David tell one a his young army guys fo come. He tell um, “Go kill dis guy!” So David guy kill da Amalek guy.
David Sing One Sad Song Fo Saul An Jonathan
17 David make one sad song fo him sing bout Saul an his boy Jonathan. 18 ✡ 1:18: Josh 10:13(He call um Da Sad Song Bout Da Bow. He tell da teacha guys fo teach da Judah guys how fo sing dis song. Stay inside da Book Bout Da Peopo Dat Stay Do Wass Right.) Dis da song:
19 “Bummahs! Da mos awesome one
From all da Israel peopo
Stay mahke ova dea, on top da hills!
Sad, cuz yoa bestes guys fo fight,
Dey fall down, mahke awready!
20 “But no tell da Filisha peopo Gat side bout dis!
No say notting to da peopo on da Ashkelon streets!
No good da Filisha wahines feel good inside cuz dey win.
No good da girls from dat ohana dat donno God
Dance an sing cuz dey feel good inside.
21 “Da mountains Gilboa side wea Saul an Jonathan mahke,
I like put kahuna on top dat place!
No good dey get da dew o da rain bumbye.
No good da fields grow da wheat fo da sacrifices.
Ova dea, even da bestes ones fo fight, wen lose dea shield.
Eh, no was olive oil dey wen put on top Saul shield, dat time, fo make um strong—was blood!
22 Was blood from da army guys Saul wen kill,
Da fat from dea mahke bodies!
Erytime he swing his sword, he kill somebody!
Jonathan, same ting,
He no stop shoot wit his bow!
23 “Saul an Jonathan,
Wen dey stay alive, erybody love dem.
Dey nice kine peopo.
Even wen dey mahke dey stick togedda.
Dey run mo fas den da eagles fly.
Dey mo strong den da lions.
24 “You Israel wahines,
Cry fo Saul.
He wen give you nice clotheses, dark red.
He bring gold kine jewelry fo go wit yoa clotheses.
25 “Sad, cuz yoa bestes guys fo fight,
Dey fall down mahke wen dey fight!
“Jonathan, he lay dea mahke on top da hills.
26 I stay all bum out cuz you mahke,
Jonathan my braddah!
You wen make me feel real good inside.
Yoa aloha fo me was awesome!
Mo awesome den da kine love from one wahine!
27 “Sad, how da bestes guys fo fight,
Fall down mahke awready!
Da tings dey use fo fight,
Gone awready!”