EBBALUWA ESOOKA OPAWULO EGIYAWANDIKIIRE
OTEMUSEEWO
Enyanjula
Ebbaluwa eenu esooka eeri oTemuseewo, omutume oPawulo niiye eyagiwandikiire omwegiwe oTemuseewo. Kyezyeka okubba kiti yagiwandiikire ooti akati wʼomwanka 62-64 nga bamalire okubyala oKurisito. Iye yabbaire nʼenkolagana ino nʼoTemuseewo era ngʼemirundi egyeraku amweta mwanawe (Baf 2:22; 1Te 1:2; 1Te 1:18). Yamuwandikiire ebbaluwa eenu nga iye oPawulo ali kumpi ku nkomerero yʼobwomibwe.
Eenu moiza oku bbaluwa eina oPawulo egiyawandikiire bantu neye nga tikanisa. Ebbaluwa egindi eisatu niigyo ginu: Temuseewo eyokubiri, nʼoTito, nʼoFirimooni.
Ebbaluwa eenu erimu endagirira nyingi oku kusinza okwʼekanisa (2:1-15), nʼebisaanizo byʼabeekubbemberi bʼekanisa (3:1-13), nʼokulabula oku beegesi bʼobubbeyi (1:3-11; 4:1-5; 6:2-5). Era eraga engeri oPawulo egiyabbaire ayegesya oTemuseewo okubba omwekubbemberi wa makanisa. Ebbaluwa eenu era erimu amateeka mangi ageezya okubbeera abeekubbemberi bʼamakanisa omu naku gyaiswe ginu okukola obuweererya obwʼekanisa.
Engeri egibyecaanamu
1. OPawulo asugirya oTemuseewo 1:1-2.
2. OPawulo alabula oTemuseewo oku beegesi bʼobubbeyi 1:3-11.
3. OPawulo yeebalya oKurisito olwʼekisaakye egyali 1:12-19.
4. OPawulo asisiitira oTemuseewo ebikwata oku kusinza nʼebisaanizo byʼabeekubbemberi bʼekanisa 2-3.
5. Ebibono ebisembayo 4-6.
1
Obusugirye
1 Nze oPawulo omutume wa Kurisito oYesu okusinzirira oku kiragiro kya Kibbumba eyatulokoire, nʼoKurisito oYesu omututeekere eisuubi lyaiswe, 2 nkuwandiikira iwe oTemuseewo, eyasuukiire nakimo omwana owange onanyerenyeere omu kwikirirya oKurisito Yesu. OKibbumba oItewaiswe nʼoKurisito Yesu oMusengwa waiswe bakukwatire ekisa, bakusaasire, era bakuwe eidembe. 1:2 Bik 16:1
Okwekuuma enjegesya etali ntuuce
3 Ntaka osigale omu kibuga Efeeso, ngʼowenakusabire nga njaba omu kitundu kyʼe Makedooniya, olagire abantu badi ababbibabbi tibairayo okwegesya enjegesya egya bubbeyi. 4 Obakobe balekeraawo okusiisira oku bisimo, nʼomu kunonenkererya enyiriri empanvu egya maliina ga bazeiza baabwe. Ebyo byongera kuleeta kwakana omu kifo kyʼokwegesya abantu ebya Kibbumba nga babita omu kwikirirya. 5 Ekyagirire ni nkukoba okusigala aawo kyabbaire nti oleetewo omu baikirirya okutaka okuzwera nakimo omu myoyo emirongoole, nʼenseega ensa, era nʼokwikirirya okunambulamu bubbeyi. 6 Ebyo abantu abamo babizwireku, ni baira mu kwakana okubulamu na mugaso. 7 Beesuuca okubba abakugu omu byʼaMateeka ga Musa, neye tibategeera aMateeka ebigakoba, nʼebyo ibo abananyere ebibeegesya.
8 Tumaite ngʼaMateeka masa singa omuntu agakolesya omu ngeri entuuce. 9 Tusaaniire tumanye tuti, aMateeka tibagateekeirewo bantu abatuukiriire, bbe. Neye bagateekeirewo bavuni ba Mateeka nʼabajeemu, abo abakola ebibbibibbi era abatatya oKibbumba, abo abatatuukiriire era abazumirira ebya Kibbumba, era abo abaita abaitewaabwe nʼabamawaabwe aamo nʼabaiti bonabona. 10 Bagateekeirewo bantu abalendi nʼabalya ebisiyaga,* 1:10 Abalya ebisiyaga niibo abasaiza abagona nʼabasaiza abanaabwe. abo abasuubuula abantu abo ababbeyi nʼabalayirira obwereere, nʼabo bonabona abakola ebyakanisya enjegesya entuuce. 11 Enjegesya entuuce ebba niiyo eyo eyabirana okusani nʼaMawuliro aMasa agʼekitiisya aga Kibbumba ogubawuuja, era ageyankwatisirye okulaabba.
Okwebalya oKibbumba olwʼekisaakye
12 Neebalya oKurisito oYesu oMusengwa waiswe, omu mwoyo gwange, eyampaire amaani agʼokumuweererya, era eyaboine nga ndi mwesigwa, nʼantuma omulimogwe. 13 Newankubbaire ngʼeira nʼamutumulangaku bundi, ni muzumiriranga, era ni njigaanianga abamwikirirya nʼobukambwe obungi, obone owansaasira. Yansasiire lwakubba ebyo nʼabikoleranga mu butamanya, nga nkaali kumwikirirya. 1:13 Bik 8:3; 9:4-5 14 OMusengwa waiswe yankwatiire ekisa kinene ino, nʼampa okwikirirya era nʼokutaka, ebyo oKurisito oYesu ebyatuwa owetumwikiririryamu.
15 Ekibono kituuce ino era kisaaniire okukiikiririrya nakimo, ekikoba kiti, “OKurisito oYesu yaizire omu kyalo kulokola bantu abakola ebibbibibbi.” Mwibo abekitumulaku ninze nsingiramu nakimo okubba akola ebibbibibbi. 16 Neye oKibbumba yankwatiire ekisa, nze akirira nakimo okubba akola ebibbibibbi, kaisi oKurisito oYesu ninze ogwabba alagiraku okuguminkirizakwe okutakoma, era ninze mbe ekyokuboneraku eeri abo abalimwikiriryamu era ni basuna obwomi obutawaawo. 17 OKabaka owʼebiseera byonabyona atafa era ataboneka, oKibbumba omoiza yenkani, tumuwuujenge era tumuwenge ekitiisya emirembe nʼemirembe. Amiina.
18 Temuseewo mwana wange, ndi kukuwanga ekiragiro ekiikirizagana nʼobunaabbi obukukwataku obwawulukire eira. Ntaka okulungamya kunu kukubbeere okulwanirira kusani amazima gʼokwikirirya ooti mwisulukale omusa alwana okuwangula olutalo. 19 Era nkukoba nti weekwate oku kwikiriryakwo omu Kurisito, era weekuumenge okubona oti okola bintu ebituuce. Ekyo kityo olwakubba abantu abandi bagaine okukola ebintu ebituuce, kale ni kizweramu okwikirirya kwabwe okuteeyongera, ni kubba ooti meeri etubiire. 20 Mwabo niimwo omuli oKaimenaayo nʼErigizanda abenawaireyo eeri oSitaani kaisi balekeraawo okuzumisyanga eriina lya Kibbumba.