Yuda
Yuda ina leta
Livala Aba Vaita
Leta ame Yuda ina leta igini. Nakona ame Yudayana moe Yeisu ana gómana, sinadi tayamo. Tauyana nakona bogomane (Maki 6:3 be Madiu 13:55 kugitedi). Nakona tala 65 ina tala 80 go, nauyayanaidi letayana igini.
Ina letayana unana Yaubada ana totugugunayao asa tayamo goi maniyedi tokapipilova sisiu sivatulukwana polapola. Amo tauyadi idi sinapu aiyuwo. Tayamo moe Yaubada ina matakoi sikaiigavile bego itoboinedi simasisi besobeso go, aiyuwoina moe Yeisu Guyau silawoiiwoiye bego Tauyana Yaubada Natuna geya. Go sinapuyadi aiyuwokova moe nakae Yaubada ina lovina sikapipiilavedi.
Yuda ana masi gagaina moe tomwana 3 goi tababane. Amoko goi kana, ‘Ida numisa ana vatulúkwana kovaboodebōde.’ Go amo ana talígava tomwana 20-23 goi tababane.
Leta Luluna
1. Leta ana togínina be ana tokatuyaivayao 1-2
2. Tonumisayao itoboinedi numisa ana vatulúkwana sivaboodebode 3-4
3. Tokapipilova adi taito aba gita yaida 5-10
4. Tokapipilova adi taito adi liuna aba gita yaida 11-13
5. Enoki ina talavaita tokapipilova adi liuna manuna 14-16
6. Tonumisayao itoboinedi Yaubada ina matakoi siyoisiikavate 17-23
7. Yuda ina yapali Yaubada yaina 24-25
1
Leta ana togínina be ana tokatuyaivayao
1 Komi Yaubada Tamada ina kinavayao bogina imatakoiyemi be nakae iyoisikavatemi ana kadókana Yeisu Guyau ikaluvilamna ikabimi,
Yau Yuda,† Mad 13:55; Mak 6:3. Guyau Yeisu ina pákwana be nakae Yemesa ana gómana toina,‡ Yemesa: Ame nakona Yuda siyana toina; sinadi Meri (Mad 13:55). ame ami leta agini iwo yaimi.
2 Yaubada ina nuwokapisi, ina matakoi be nakae ina tuboina bei ivaituwedi yaimi.
Tonumisayao itoboinedi
numisa ana vatulúkwana sivaboodebode
numisa ana vatulúkwana sivaboodebode
3 Guna kaloyao, latuwogu toina bego ami leta ame goi alatuwokoimi kita tonumisa ada yava tayamo manuna go, geya itoboineguta unana tayamo mou isowóduwo yaimi, tauna itoboine bei leta ame goi akatununuwosimi bego ida numisa ana vatulúkwana kaka kovaboodebode. Ame vatulukwanayana boi Yaubada bogina sivatayamo ivatulukoida kita ina kimasabayao, tauna taabu takaatusāvi o takaaigavīle. 4 Ame moitamo. Maniyena tokapipilova bogina sisiugau imi bodao yaimi goi. Moe tauyadi manudi boi nimatu Yaubada ina tokabivalavala sitalavaita bego tomota amo nakae Yaubada ina lovina moumouna bei sibabane. Tauyadi Yaubada ana tokaoliliwoyao. Ida Yaubada ina vatulúkwana anuwóiya manuna sikaatusavi be nakae sikaiigavile ame nakae: Sidigo kadi,
‘Yaubada ina kanuwóiya goi ida goyo inuwotaoidi, tauna itoboineda sakavaida adi vikaiya owáowana taguuinuwe.’
Aiyuwoina Yeisu Guyau anetava ida Tokalika be ida Tomoya go, tuwo amo silawoiiwoiye!
Tokapipilova adi taito
aba gita aito yaida
aba gita aito yaida
5 E Yaubada ina liuna apipilova manuna bogina koyagoidoko go, tuwo latuwogu akavilevile yaimi ame nakae: Boi nimatu Isileli tubunao da Itipita idi kasa goi sikaaiyaka, Yeisu‡ Yeisu: Ame livalayana Yuda ana kopi maniyedi goi kadi, ‘Tomoya’, maniyedi kadi, ‘Yauwe’ go, maniyedi kadi, ‘Yeisu.’ iyavedi† Tat 1—15; Yoy 14:29-30; Ibe 3:17. go, namliyeta avatauwa neta geya sinumiseyeta ikaumatedi. 6 Aneroseyao koonuwēdi. Boi maniyedi toinidi sikilagasidi, e idi kaba lovina geya siyoisikavateyeta, go sem idi kaba kaiyaka dókana sikalave. Tauna aba kaiyaka kokonótuya goi Yaubada iyoisikavateevataedi. Amoko goi sikaaiyaka ana kadókana takínona ana maliyalina gagaina bei lovina moumouna sibabane. 7 Kidi da Sodoma be da Gamora be nakae tomota asayadi kikidi goi sikaaiyaka koonuwēdi. Kidi idi kapipilova amo aneroseyadi nakae. Ame asayadi goi tomota maniyedi latuwodi simasisi goyogoyo vevina taiyao go, maniyedi koroto koroto taiyao. Tauna Yaubada adi liuna ivinidi; liunayana moe yeu sabenínima vaatayaina. Go adi liunayana moe aba gita tayamo kita yaida Yaubada ina lovina moumouna apipilova manuna.† Abv 19:1-24.
8 Amo liunayadi apipilova ana kaba gita sikakaiyaka go, tuwo kidi tokapipilovayadi yaimi goi tauna nakae. Tauyadi sikanamimi go, sinuwonúwana bego idi kanamimiyadi goi Yaubada ivatulukoidi nakonakae siguinuwe, go geya ivatulukoidita. Moe nakae idi nuwonuwanayana, tauna idi kanamimi pasidi idi masisi goyogoyoina goi sakavaidi sikibaibaailidi, Tomoya ina lovina siikatae be nakae yábana osasaina toolagaidi‡ Yábana osasaina toolagaidi: Ame nakona dimoni o anerose o aiyuwokova go, geya tayagoiyeta nako moitamo. Go dogoiyadi madi togaga be madi lovina. sitagiiwoidi. 9 E kina go Maikoro anerose adi toolagaina†a Dan 10:13,21, 12:1; Nuw 12:7. go, tuwo amo nakae geya iguinuweyeta. Boi nimatu Totagíwaya taiyao sikaumakimaki Mosese wowona‡ Mosese wowona: Boi nimatu Isileli tubunao sinuwonúwana bego tutayana Mosese ikámasa, Maikoro be Kaleya taiyao sikaumakimaki bego avatau Mosese wowona ikabi. Moe unana Kaleyayana kana, ‘Mosese tomota tamo iláui ikámasa tauna wowona yau guna kaba lovina ina goyo pasina.’ pasina bego avatau itoboine ikabi.†b Atu 34:6. Go tutayana sikaumaakimaki, kina Maikoroyana geya idigopopoiteta, nakae Kaleyayana geya itakinoeta bego tauyana itoboine liuna ibabane ina tagíwaya pasina. Takínona moe Yaubada anetava ina paisewa. Go sem Maikoroyana idigomo kana,
‘Yauwe bei ibowoim, e liuna ivinim!’†c Sak 3:2.
10 E kidi go tokapipilovayadi, neta kaga kaga geya siyagoidita, e tuwo sitagiiwoidi. E tauyadi idi nanamsa woiwoi nakae unana woiwoi idi sinapu goi sakavaidi adi yala iloviinaedi. Tauna tauyadi idi sinapu nakae. Ago idi yalayadi pasidi bei sivailai.
Tokapipilova adi taito
adi liuna aba gita yaida
adi liuna aba gita yaida
11 O tauyadi! Liuna bei sibabane idi kapipilova pasina unana Keni ana kenao goi siiketoiya†a Abv 4:1-15. be toinidi sitaagonedi simaatapógana esaesa manuna, moe Balam ina bágala nakae.†b Yoy 22:1-35; 2Pi 2:1; Nuw 2:14. Aiyuwoina lovina totoomoidi sikapipiilavedi moe boi Kora ina sinapu nakae, tauna Kora nakae bei sivailai.†c Yoy 16:1-35.
12 Amo tokapipilovayadi imi kabivekoveko aikanina‡ Imi kabivekoveko aikanina: Áika ame tonumisayao siguinuwe go, aikayana goi Yeisu ina kámasa sinuwokavate; tauna oine be beredi sikáika.† Mad 26:26-30; Mak 14:22-26; Luk 22:19-20; 1Ko 10:15-16, 11:23-26. goi sisiu sikáika komi taiyao go, geya idi wowoinamo Yeisu manuna, go sem sikaikapopóita. Aiyuwoina aikayana goi tauyadi lai poiina nakae. Laiyana geya tagiteyeta, e oga isaiko bogina igoyo, tauna ami dodōkana, govila bei tauyadi pasidi imi numisa itomava. Tauyadi bego Yaubada ana totugugunayao adi tomatakavatayao go, toinidi simatakavatedimo.
E amo tauyadi adi kaigigita nakae losiye goi bou ilabakóluma go, kúwana geya, go sem yágira iyawoisavedimo. Kidi nakae. Sidigodigo bego idi vatulúkwana dedevina go, geya tayaamo kaga dedevina yaidi goi iisowóduwo.
E adi kaigigita alova adi tuta kéuwo nakae go, geya keuwoidimo, tuwo silabudi, sigabudi, tauna sikámasa toina. Tauna amo tokapipilovayadi nakae. Tagitedi kada, ‘Dedevidi’ go, yaidi goi geya kada tayaamo keuwoina dedevina isowóduwo geya. 13 Amo tauyadi aivaya gagaidi siitalasa nakae go, mosamosa silaseseli. E kidi nakae, unana idi sinapu goi mosamosa kaka sisowóduwo.
Adi kaigigita súluwo nakae. Suluwoyadi silokoina besobeso go, kidi nakae enao totoomoina bogina sivasulaigi, tauna geya itoboinedeta idi vatulúkwana tanumise. Ago idi kasa Yaubada bogina ikatubayasi go, asayana kokonótuya toina. Amoko goi bei sikaiyako vata.
Enoki ina talavaita
tokapipilova adi liuna manuna
tokapipilova adi liuna manuna
14 Boi nimatu amo tokapipilovayadi manudi Enoki† Abv 5:18,21-24. itaalavaita. Enokiyana tubuna moe Adama. Ago Adama ina nunu isou ina Enoki ina nunu moe nunu ana badabada ainima tayamo.‡ Ame nakae Adama ivenátuna Seti. Niga Seti ivenátuna, natuna koroto. Amo tauyana ivenátuna nakae nakae ana kadókana Enoki isowóduwo. E ina talavaitayana goi idigo kana,
‘Gwa! Yauwe imamaima ina aneroseyao kimaasabaidi badabadaidi taiyao 15 bego boda madabokidi itakinoidi. Go Yaubada ana tokaoliliwoyao moe toogoyoidi liliudi ikamamaetalidi idi goyo badabadaidi pasidi be nakae idi livala tagíwaya madabokina Yauwe yaina pasidi.’
16 Ame tokaoliliwoyadi kuuluidi. Tuwaina toinidi adi yalagau sisabokuuliyedi be nakae toinidi sikilagalaagasidi. E aiyuwoina idi katunuwanuwa goi sediyao sikatutaoidi kónana manudi.
Tonumisayao itoboinedi
Yaubada ina matakoi siyoisiikavate
Yaubada ina matakoi siyoisiikavate
17 E guna kaloyao, komi sem ida Tomoya Yeisu Guyau ina vamoleyanayao idi livala konuwokaavatēdi. 18 Boi sidigo kadi,
‘Tuta ana kaba lukavava goi maniyena tomota bei sima komi be Yaubada sikaiwotetemi† 2Pi 3:3. unana kidi Yaubada sikaolilive; latuwodi toinidi adi yalagau goyoogoyoidi sisabokuliyedi.’
19 Amo tokapipilovayadi moe Yaubada ana totugugunayao adi tolivisiyao, sakava tomotaidi go, Baloma Kimaasabaina kidi yaidi geya ikaiyaketa.
20 E komi go guna kaloyao, semiyao kokitoogagēdi, bei vatulúkwana kimaasabaina toina koonumise goi sitogaga. Go Baloma Kimaasabaina kootagōne ivaakedemi imi kawanoi goi. 21 Ago Yaubada ina matakoi koyoisiikavāte go, ida Tomoya Yeisu Guyau ina nuwokapisi kotuuyaōsi. Nuwokapisiyana goi yawoimi vata bei kobabane. 22 E avatauwa neta sinaanayuwo, konuwokapiisiyēdi. 23 Ago avatauwa neta asagabugabu kikina goi sikaaiyaka kobuvilēdi be koyavēdi. Ago maniyena tomota konuwokapiisiyēdi go, mami matōita, govila bei sibiumi idi goyo goi komi nakae kokapusi. Kidi adi goyo ivakaigaga masisi goyogoyoina ana dadava goi, tauna idi sinapu goyogoyoidi kokaoliilivēdi go, kidi tuwo konuwokapiisiyēdi.
Yuda ina yapali Yaubada yaina
24 E Yaubada itoboine iyoisikavatemi, e bei goyo goi geya kokapusita. Nakae itoboine geya ami pikwanamo imemi ana káeyana tomoeeyalina goi mami uyáwana ivataoemi. 25 Tauyana anetava Yaubada ada Toyava ida Tomoya Yeisu Guyau ina guinuwa goi. Yaubadayana aba taimámina, Tokanayatanatoina, Tokalika be nakae Tokalibúbuna toogagaina!
E nakae!
Yau Yuda
‡1:1 Yemesa: Ame nakona Yuda siyana toina; sinadi Meri (Mad 13:55).
‡1:5 Yeisu: Ame livalayana Yuda ana kopi maniyedi goi kadi, ‘Tomoya’, maniyedi kadi, ‘Yauwe’ go, maniyedi kadi, ‘Yeisu.’
†1:5 Tat 1—15; Yoy 14:29-30; Ibe 3:17.
‡1:8 Yábana osasaina toolagaidi: Ame nakona dimoni o anerose o aiyuwokova go, geya tayagoiyeta nako moitamo. Go dogoiyadi madi togaga be madi lovina.
†a1:9 Dan 10:13,21, 12:1; Nuw 12:7.
‡1:9 Mosese wowona: Boi nimatu Isileli tubunao sinuwonúwana bego tutayana Mosese ikámasa, Maikoro be Kaleya taiyao sikaumakimaki bego avatau Mosese wowona ikabi. Moe unana Kaleyayana kana, ‘Mosese tomota tamo iláui ikámasa tauna wowona yau guna kaba lovina ina goyo pasina.’
†b1:9 Atu 34:6.
†c1:9 Sak 3:2.
†a1:11 Abv 4:1-15.
†b1:11 Yoy 22:1-35; 2Pi 2:1; Nuw 2:14.
†c1:11 Yoy 16:1-35.
‡1:12 Imi kabivekoveko aikanina: Áika ame tonumisayao siguinuwe go, aikayana goi Yeisu ina kámasa sinuwokavate; tauna oine be beredi sikáika.
†1:12 Mad 26:26-30; Mak 14:22-26; Luk 22:19-20; 1Ko 10:15-16, 11:23-26.
‡1:14 Ame nakae Adama ivenátuna Seti. Niga Seti ivenátuna, natuna koroto. Amo tauyana ivenátuna nakae nakae ana kadókana Enoki isowóduwo.