1 Kɛ̀ Kuyie nní nyóó yɑ́ɑ́kɛ́ Abɑrɑhɑmmu kɛ dɔ̀: Abɑrɑhɑmmu! Kòò dɔ̀: Ntɛ mí. 2 Kɛ̀ kù dɔ̀: Túótɛ́ ɑ birɛ Isɑki dɛ̀ɛ̀ bo dɛmɑ́ɑ̀, kɑ̀ɑ dɛ̀ dɔ́, kɛ́kɔtɛnɛ̀ Mɔdiyɑɑ kó dihɛì, ditɑ̃rì n yóó dɑ bɛnkɛ dì ĩ́nkɛ̀ kɛ́ dɛ̀ nni féútɛ́ kɛ́tuɔ.

3 Kɛ̀ dɛ̀ɛ wentɛ́, dikṹnweńnì sɛ̀ì, kɛ̀ Abɑrɑhɑmmuu ítɛ́ kɛ́yɑrí idɛí, kɛ́ɑ̃nnɛ́ sɑ̃mmɑrímú tinɛntì, kɛ́túótɛ́ o tɔ̃mbɛ̀ bɛ̀dɛ́bɛ̀ nɛ̀ o birɛ Isɑki, kɛ̀ bɛ̀ɛ kétɛ́ kɛ́nkɔri Kuyie nhò bɛnkɛ dɛ̀. 4 Diyiè tɑ̃ɑ̃́nnì yiè, kòo wéntɛ́ mɛdɛ́timɛ̀ kɛ́yɑ̀ ditɑ̃rì bɛ̀ kɔ̀ri dì, 5 kɛ́nɑ́kɛ́ o tɔ̃mbɛ̀ kɛ dɔ̀: Nkpɑɑ́nɛ̀ diɛ nnɛ̀ sɑ̃mmɑrímú, mí nnɛ̀ odɑpɑ̀ɑ̀ nkɛ̀ tí dekɛ ditɑ̃rì kɛ́bɑ́ntɛ̀ Kuyie nkɛ́wɛ̃tɛní di borɛ̀.

6 Kòo toú nho birɛ Isɑki idɛí kɛ́ntɔ muhɑ̃ɑ̃́ nnɛ̀ disiè, kɛ̀ bɛ̀ nkérí bɛdɛ́. 7 Kɛ̀ Isɑkii yú o cicɛ kɛ dɔ̀: N cicɛ! Kòò dɔ̀: Ntɛ mí. Kɛ̀ Isɑki dɔ̀: Ti tɔ muhɑ̃ɑ̃́ nnɛ̀ idɛí, yé fɛpìèfɛ̀ ti yóó kuɔ fɛ̀? 8 Kɛ̀ Abɑrɑhɑmmu dɔ̀: M birɛ Kuyie nkuù yóó ti duɔ́ nfɛpìèfɛ̀.

Mɛm̀mɛ kɛ̀ bɛ nnɛí, kɛ kérí bɛdɛ́. 9 Bɛ̀ tùɔ̀kɛ dìì mɔ̀nnì Kuyie nhò bɛnkɛ dɛ̀, kɛ̀ Abɑrɑhɑmmuu mɑɑ́ diwũɔ̃tɔ̀nnì, kɛ́dɔɔ̀ idɛí kɛ́dɑɑ́ nkɛ́boú o birɛ Isɑki kɛ́nɔ́ɔ́, 10 kɛ́túótɛ́ disiè kɛ bo dɛ̀ fèútɛ́. 11 Kɛ̀ ti Yiɛ̀ nKuyie ntɔ̃nnìi yúní Abɑrɑhɑmmu kɛĩ́nkɛ̀ kɛ dɔ̀: Abɑrɑhɑmmu! Abɑrɑhɑmmu! Kòò dɔ̀: Ntɛ mí. 12 Kɛ̀ dì dɔ̀: Kuyie ntu, ɑ bɑ́ɑ́ dɔɔ̀ dɛbirɛ mɛyɛi mmɑmɛ̀, kù bɑntɛ́mu di mmɔ̀nnì ɑ kù démɛ̀ kɛ í kù yetɛnɛ̀ ɑ birɛ dɛ̀ɛ̀ bo dɛmɑ́ɑ̀.

13 Kɛ̀ Abɑrɑhɑmmuu wéntɛ́ kɛ́yɑ̀ dipedɑɑ̀, kɛ̀ dì còḿmú kɛ̀ di yìè nsɑ̀kɛ difɑ̃pèù, kòo dì dɛ̀tɛ kɛ́kuɔ o birɛ Isɑki kó difɔ̃̀tìrì, 14 kɛ́yú dɛ kó dibòrì kɛ dɔ̀ Kuyie nduɔ́. Dɛɛ̀ te kɛ̀ bɛ̀ yu dɛ kó ditɑ̃rì nɛ̀ yíenní kɛ tú: Ti Yiɛ̀ nKuyie nduɔ́.

15 Kɛ̀ ti Yiɛ̀ nKuyie ntɔ̃nnìi yúní Abɑrɑhɑmmu kɛĩ́nkɛ̀ kucɛ mɛdɛ́rímɛ̀ 16 kɛ dɔ̀: Kuyie ntu kuù bɛ́i nkɛ tú ɑ í mɛ̀ nkù yetɛ́nɛ̀mɛ̀ ɑ birɛ dɛ̀ɛ̀ bo dɛmɑ́ɑ̀. 17 Kù bo dɑ dɔɔ̀ mɛsɑ̀ɑ̀ nkɑ̀ɑ yɑɑ̀bíi sṹṹ nsiwɑ̃̀ɑ̃ kɔ̃mɛ, kɛ́ndònnɛ̀ dɑ̀mɛ́ɛ̀rì nùù kó mubirímú, kɛ́tiekɛ i dootitɔbɛ̀ ɛkɛ̀, 18 nɛ̀ iì borɛ̀ ndɛ kù yóó dɔɔ̀mɛ̀ ibotí imɔu mɛsɑ̀ɑ̀, nhɑ yie mmɛ̀ɛ̀ kpɛ́í nku kpɛti.

19 Kɛ̀ Abɑrɑhɑmmuu wɛ̃tɛní o tɔ̃mbɛ̀ borɛ̀, kɛ̀ bɛ̀ɛ kò mBɛɛrisebɑɑ Abɑrɑhɑmmu ciɛ kɛ́mbo.

20 Dɛ kó difɔ̃nkúò, kɛ̀ Abɑrɑhɑmmuu keè o nɑntɛ̀ Nɑɔɔ pokù Midikɑɑ ò piɛ́mɛ̀ ibí, 21-22 Uusi, weè do tú Mpo kɛ́nɑntɛ Buusi, nɛ̀ Kemmuyɛɛdi Arɑmu cicɛ nɛ̀ Kesɛdi, nɛ̀ Asoo nɛ̀ Pididɑɑsi nɛ̀ Idudɑfu nɛ̀ Betuyɛɛdi. 23 Kɛ̀ Betuyɛɛdi pɛitɛ́ Debekɑɑ, Midikɑɑ bí nyi ò pɛitɛ́nɛ̀ ì Nɑɔɔ Abɑrɑhɑmmu nɑntɛ̀. 24 Kòo pocɛ̃nnì Deyumɑɑ múnkɛɛ ò piɛ́ ibí. Tebɑɑ nɛ̀ Kɑɑmmu nɛ̀ Tɑɑsi nɛ̀ Mɑɑkɑ.