Aruachön nöün Paulus Toropwe ngeni ekewe Souläng lon
Korint
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ekewe souläng lon Korint.
III. Itelapemongen ei toropwe: Usun än Paulus mochen awesi ewe osukosuk lon ewe mwichefel lon Korint.
IV. Kapas aüchean ewe toropwe: Än Kot ümöümöch a lingela lon ach apwangapwang.
V. Masouen ei toropwe: Aruachön nöün Paulus toropwe ngeni ekewe souläng lon Korint a mak lon eu fansoun a fis osukosuk lefilan me chon ewe mwichefel lon Korint. Ekoch chon ewe mwichefel ra pöchökül le ü ngeni Paulus. Nge Paulus a pwärätä an ekinlonei an epwe wor chäfengen lefiler o pwäri an watten pwapwa lupwen a fis.
Lon aeuin kinikinin ewe toropwe Paulus a awewei usun an chiechifengen me chon ewe mwichefel lon Korint. A awewei popun an pölüeni fän pöchökül ekewe kapasen esit me kapasen ü ngeni seni chon ewe mwichefel. A pwal pwärätä an pwapwa pwe an kapas pöchökül a afisätä ekieksefäl me chäsefäl. Mürin a tüngor ngeni chon ewe mwichefel pwe repwe kichiöch le asor fän iten ekewe souläng mi mwelele lon Jutea. Iwe, lon ekewe sopolan sopun lon ei toropwe Paulus a peni an angangen soukünö ren an pölüeni ekoch aramas lon Korint mi püsin seikiiretä pwe ir soukünö mi pwüng, nge ra atipisi Paulus pwe i eman soukünö mi chofona.
VI. Tettelin masouen ei toropwe:
Kapas akom 1.1-11
Paulus me chon ewe mwichefel lon Korint 1.12–7.16
Usun ewe asor fän iten ekewe souläng lon Jutea 8.1–9.15
Än Paulus peni an pwüüng pwe i eman soukünö 10.1–13.10
Kapasen lesopolan 13.11-14
1
Kapong
1.1-2
1 Ngang Paulus, eman nöün Kraist Jesus soukünö ren letipen Kot, pwal pwiich ei Timoty, aia kapong ngeni chon ewe mwichefel lon Korint, pwal ngeni ekewe chon pin meinisin lon unusen ewe fanü Akaia. 2 Samach Kot me ach Samol Jesus Kraist epwe ngenikemi ümöümöch me kinamwe.
Paulus a pwärätä an kilisou ngeni Kot
1.3-11
3 Sipwe mwareiti Kot i Semen ach Samol Jesus Kraist, ewe Sam mi eäni tong me ewe Kot mi echipakich lon mettoch meinisin. 4 A akachipakich lon ach riaföü meinisin, pwe pwal kich sipwe tongeni echipa chokewe mi nom lon sokopaten riaföü meinisin ren ewe chip sia püsin angei me ren Kot. 5 Pun usun sia eti Kraist lon an kewe riaföü mi chomong, ina usun sia pwal angei ewe chip mi lapalap me ren Kraist. 6 Are aia küna riaföü, a fis ämi chip me manau ren. Nge are aia küna chip, a pwal fis ämi chip mi pwä lupwen oua mosonotam o engila lon ekewe chök riaföü äm aia fen tolong lon. 7 Iwe, äm apilükülüköch fänäsengesimi a fokun nükücharala, pun aia silei, pwe usun oua etikem lon äm riaföü, ina usun oupwe pwal etikem lon äm küna chip.
8 Ämi pwii kana, aia mochen achema ngenikemi usun ekewe riaföü mi torikem lon ewe fanü Asia. Äm aia nom fän watten me choun ekewe weires mi lap seni äm tongeni, pwe aia apilükingau ngeni äm aipwe chüen manau. 9 Aia fokun mefi pwe aipwele mäla. Nge ei a fis, pwe äm aisap anomu äm apilükülük won püsin äm, pwe won Kot echök mi amanauasefäli ekewe mi mäla. 10 I a angasakem seni ekewe feiengauen mäla, i epwe pwal fokun angasakem. Äm aia anomu äm apilükülük won, pwe epwe sopwela le angasakem, 11 ika ämi oua alisikem lon ämi iotek. Iwe, epwe iei usun pwe ekewe chomong iotek fän item epwe pwönüetä o Kot epwe afeiöchükem, mürin chomong repwe kilisou ngeni fän item.
Paulus a awewei popun an siwili akoten an sai
1.12–2.4
12 Iwe, iei met aia aingaing won, pwe mwelien letipem a pwäri ngenikem pwe manauem won ei fanüfan, pwal fokun äm chiechifengen me ämi a fis fän let me wenechar mi feito seni Kot. Äm aia föri iei usun, sap fän tipachemen fanüfan, nge fän än Kot ümöümöch. 13 Äm aia chök mak ngenikemi met oua tongeni aleani o wewe ren. Iwe, üa apilükülük, 14 pwe usun oua weweitikem eu kinikin chök, iei usun oupwe unusen weweiti, pwe oua tongeni aingaing wom usun chök pwal äm aipwe aingaing womi lon ewe Ränin ach Samol Jesus.
15 Pokiten üa apilükülükü ei, üa akota ai üpwe akomwen churikemi, pwe oupwe küna feiöch fän ruu. 16 Üa fen akota ai üpwe churikemi lon ai sai ngeni Masetonia, pwal lupwen üpwe liwinsefäl ngenikemi seni Masetonia. Mürin oupwe tongeni alisiei lon ai sai ngeni Jutea. ✡ Föf 19.21 17 Lupwen üa akota ei, ifa usun üa siwilikisi ai ekiek, nge esap wor popun? Ika üa föri ai akot lon ekiekin fanüfan, pwe üpwe apasa “Ewer, ewer,” pwal “Apw, apw” lon eu chök otun? 18 Nge usun Kot a enletin allükülük, ai pwon ngenikemi esap “Ewer” me “Apw”. 19 Pun Jesus Kraist ewe Nöün Kot, äm me Silas me Timoty aia afalafala leimi, i sap eman mi apasa, “Ewer” me “Apw” lon eu chök otun, nge lon i Kot a apasa “Ewer” iteiten fansoun. ✡ Föf 18.5 20 Pun än Kot kewe pwon meinisin ra pwönüetä lon Kraist. Iei popun ren Jesus Kraist sia apasa “Amen”, pwe Kot epwe ling ren. 21 Iwe, püsin Kot a anükücharakem me ämi lon Kraist. I a afilikich 22 o pwaunikich pwe sipwe nöün. A fangelong lon lelukach Ngünün pwe allükülükün mettoch meinisin mine a molotä fän itach.
23 Ngang üa köri Kot pwe nei chon pwärätä, i a silei letipei. Iwe, üsap mochen aweiresikemi, iei mine üsap chüen ekiekin feila Korint. 24 Äm aisap mochen pese ngenikemi met oupwe lükü, pun oua nüküchar lon ämi lükülük. Nge sia chök angangfengen fänäsengesin ämi pwapwa.