1 Pakai in ka o eingai peh eikhoto dia katao na eisan peh jeh in keiman Pakai kangailui. 2 Aman eihin ang ngat a kataona eingaipeh’in kahaithei laisea keima katao jing jingding ahi. 3 Thinan apon in eihin tomkhum e; lhankhuh gimneitah chun eihin lonvuh e. Keiman lungkhamna leh lunggimna ngen kamu e. 4 hiteng chuleh keiman Pakai min kakoujin, “Pakai lungset’in neihuhdoh’in!” katijin ahi. 5 Pakai hi itobang tah’a milungsetthem hitam! Chuleh itobang tah’a pha a hitam! Ipathen’u hi ichangei a mikhoto them hitam! 6 Pakai in chapang lungthengtah atahsanna neijachu ahahsatna’a ahoidoh jin ahi. Keima thina toh kimaitoa kaum laitah’in aman eihuhdoh’in ahi. 7 Kalhagao, nacholdo namun hinjon kittan ajeh chu Pakai hi keidingin aphalheh jenge. 8 Aman kathina dinga kon in eihuhdoh’in kamitna mitlhi lonlouna dingle kakeng hi kakiselhuh louna dingin eiveng jenge. 9 Hiche leisetna kahin laisen Pakai masanga kavahle jengin ahi. 10 Pakai keima kagenthei behseh jengtai katiteng jongleh nangma katahsan jing nalai e. ✡ 2 Crth 4:13 11 Kahahsat teng jongleh nangma kahin koujin ahi, ajeh chu hiche mitehi tahsan thei ahipouve. 12 Thilpha simjoulou eibolpeh jeh’a hi Pakai chu ipi kapehding ham? 13 Keiman huhhingna khon hi domsang’in tin eihuhhing jeh’a amin kathangvah ding ahi. 14 Keiman amite ho jouse masangah Pakai ah kakitepna nitjing ing kate. 15 Pakai in angailut mite ahitengleh alainatpi lheh jengjin ahi. 16 O Pakai keima nasoh kahi, nangin kasoh channa’a kon in neihuhdoh tai. 17 Keiman thangvahna hi kilhaina ganthan napengting Pakai min’in tao vinge. 18 Keiman Pakai a kakitepna chu amite jouse masangah, 19 Pakai houin ah Jerusalem lailungah subulhit’ing kate. Pakai chu thangvah’in umhen!