1 Anutunoŋ wala eeŋanoŋ niniima kobooŋ nunuuguroti, iikawaa kiaŋkomu kendoŋanoŋ toriŋ weeŋ 6 tegoro kanoŋ kaŋ kuumambaajoŋ ano. Jiisasnoŋ kambaŋ kanoŋ gomaŋ qata Betani kanoŋ keno. Wala eja qata Lazarus meŋ gbiliro koomunoŋga waama laligoroti, mono iwaa mirinoŋ keuro. 2 Iikanoŋ keuro Jiisas goda qeŋ mubombaajoŋ miri moŋnoŋ nene ooŋ mozozoŋgogi. Martanoŋ ooŋ rindeema koma oŋonoto, eja Jiisaswo motooŋ rama nene negiti, Lazarusnoŋ iyoŋoo batugianoŋ raro.

3  * Luuk 7.37-38; Dut 15.11Kaeŋ ragi Marianoŋ kele kaaro moŋ biŋa 500 gram ii meŋ Jiisaswaanoŋ karo. Kaaro ii apu uŋkoowagawo hoŋa qata naad sewaŋa uuta somataga iikanoŋ saa qeqetaga. Iinoŋ ii meŋ kaŋ simiŋ kuma Jiisas kanianoŋ qibibiriŋ moriŋ waŋ juyanoŋ motoro toboriro. Kaeŋ kolooro miri uutanoŋ ragiti, ii apuwaa moroŋanoŋ pumpuŋgoŋ sokoma ero mogi.

4 Kaeŋ kolooro Jiisaswaa gowokouruta yoŋoonoŋga moŋ qata Juudas Iskariot, kanageŋ Jiisas memelolo meroti, eja iikanoŋ qotogoŋ muŋ kokaeŋ jero, 5 “Apu uŋkoowagawo ii mono naambaajoŋ sewaŋa mewutiwaajoŋ mende anja? Yei, maŋgaa siita! Ii anagati eeŋ, mono weeŋ 300:waa tawaya (Kina 6,000) kawaa so kitonaga. Ii ejemba wanaya oŋoniŋ sokonaga.” 6 Kaeŋ jeroto, qaa ii ejemba wanaya yoŋoojoŋ majakaka morotiwaajoŋ ama mende jero. Yoŋoojoŋ ama qaagoto, yoŋgoro meme ejaga laligoŋ kulukululuu moneŋ gesogia galeŋ kono moneŋ aŋgi kemero iikanoŋa kitia iyaŋaajoŋ meŋ laligoro. Mono kawaajoŋ ama ii jero.

7 Kaeŋ jero Jiisasnoŋ iŋijoro, “Oŋo emba koi mono mende jeŋ mubu. Niinoŋ komuwe roŋ koma nombutiwaa kambaŋa torijiwaajoŋ saanoŋ selena apu uŋkoowayawonoŋ nomorija. 8 Ejemba wanaya ii mono kambaŋ so batugianoŋ laligoŋkejuto, niinoŋ oŋowo kambaŋa kambaŋa mende laligomaŋa.” Kiaŋ.

9 Jiisasnoŋ Betani gomanoŋ laligoroti, ii Juuda ejemba tuuŋ mamaganoŋ moma kanoŋ kagi. Jiisaswaajoŋgadeeŋ mende kagito, Lazarus koomunoŋga meŋ gbiliro waaroti, ii motooŋ iibombaajoŋ leelee mujoŋ horoŋ kougi. 10 Kaeŋ kougito, jigo gawoŋ galeŋ yoŋonoŋ “Lazarus kaaŋagadeeŋ qeniŋ komuwa,” jeŋ qaa somoŋgogi. 11 Juuda ejemba mamaganoŋ Lazaruswaajoŋ ama Betani kema uugia meleema Jiisas moma laarigi. Kawaajoŋ qaa kaeŋ somoŋgogi. Kiaŋ.

12 Kaeŋ aŋgi eŋ waama iikanoŋ ejemba tuuŋlelembenoŋ kiaŋkomu kendombaajoŋ Jerusalem sitinoŋ kouma laligogiti, iyoŋonoŋ buju qaa kokaeŋ mogi, “Jiisasnoŋ Jerusalem kamambaajoŋ kananoŋ kaja.” 13  * Ond 118.25, 26; Zek 9.9Qaa kaeŋ moma tombi boria seŋawo meŋ kananoŋ mokolooŋ iibombaajoŋ kema kokaeŋ jeŋ qagi,

14 Jiisasnoŋ doŋgi melaa moŋ mokolooŋ kawaa qaganoŋ uma raro. Ii gejatootoo qaa moŋ kokaeŋ oogita ejiwaa so kolooro,

16 Jiisaswaa gowokourutanoŋ iwoi kolooroti, iikawaa kania wala mende moma kotogito, kanageŋ saanoŋ moma asarigi. Jiisasnoŋ Siwenoŋ uma asamararaŋawo laligoroti, qaa ii kambaŋ iikanoŋ romoŋgoŋ kokaeŋ jegi, “Ahaa! Qaa ii mono Jiisaswaajoŋa oogita eja ano ejembanoŋ qaa iikawaa so ama mugi hoŋawo kolooro.”

17 Ejemba Jiisaswo Betani laligogiti, iyoŋonoŋ daŋgunu kaaŋa nama bujuya jeŋ seigi. Jiisasnoŋ Lazarus qaro koomunoŋga gbiliŋ waama qasiriwaa jamo kobaa mesaoŋ kouro ejemba tuuŋnoŋ iigiti, iyoŋonoŋ Jiisaswaa kania naŋgoŋ jeŋ jeŋ asarigi. 18 Jiisasnoŋ aŋgoleto ii meroti, qaa ii mogitiwaajoŋ ama ejemba tuuŋ somatanoŋ luluuma koma horoŋ mubombaajoŋ keŋgi.

19 Kaeŋ keŋgi Farisii (Kana qaawaa kaparaŋkoŋkoŋ) yoŋonoŋ iyaŋgiodeeŋ amiŋ moma kokaeŋ jegi, “Mobu. Baloŋa baloŋa ejemba yoŋonoŋ mono luluuma horoŋ iwaa gematanoŋ kemakeju ano nono qaa gawoŋ iikayadeeŋ meŋ bimbimgoniŋ hoŋa moŋ mende kolooja.” Kiaŋ.

20 Juuda ejemba kiaŋkomu kendombaajoŋ Jerusalem sitinoŋ uma Anutu waeya meŋ mepeseegiti, iyoŋoo batugianoŋ Griik ejemba tosaaŋa motooŋ laligogi. 21 Yoŋonoŋ gowoko qata Filip iwaanoŋ kagi. Filipnoŋ Galili prowinswaa taoŋ qata Betsaida kawaa ejaga laligoro. Griik yoŋonoŋ iwaanoŋ kaŋ qisiŋ kokaeŋ ijogi moro, “Somatanana, nono aiŋnananoŋ Jiisas iibombaajoŋ mojoŋ.”

22 Kaeŋ ijogi moma Andruuwaanoŋ kema qaa ii ijoro. Jero moma motooŋ kema Jiisas jeri moro. 23 Qaa ii moma meleema kokaeŋ jero, “Siwewaa asamararaŋanoŋ Siwe gomambaa Eja Hoŋa iwaanoŋ mombo asugiŋ kotoro asariwaati, iikawaa kambaŋanoŋ mono torija. 24 Niinoŋ koomunaa sare qaa hoŋa tooŋ moŋ kokaeŋ iŋijowe mobu: Yagoŋ kota namonoŋ mende kemeŋ jumbaati eeŋ, mono eeŋ iikayadeeŋ ewaa. Kaeŋ eeŋ ewaato, kemeŋ jumbaati eeŋ, kuragayanoŋ mono juma ondoŋbondoŋ waaro hoŋa mamaga sogowaa.

25  * Mat 10.39; 16.25; Maak 8.35; Luuk 9.24; 17.33“Kawaa so daeŋ yoŋonoŋ laaligogia iyaŋgiaajoŋ aŋgoŋ koma iyaŋgiaa jaajaa siiseweweya qaa laligowombaajoŋ siiŋa momakeji, iyoŋoo laaligogianoŋ mono soowaa. Kaeŋ soowaato, moŋnoŋ moŋ iyaŋaa laaligoya goragora ama niijegeŋa ama nombaati, iinoŋ mono laaligo hoŋa ondoŋbondoŋawo mokolooŋ tetegoya qaa kotiiŋ laligoŋ ubaa. 26 Moŋnoŋ nii weleŋ qeŋ nomambaajoŋ jeji, iinoŋ mono nii notaaŋ laligoro sokombaa. Welena qeŋkeji, mono nii kema kaŋ laligomaŋati, iikanoŋ kaaŋagadeeŋ niwo laligowaa. Moŋnoŋ niwo laligoŋ welena qeŋ nomakeji, Amanoŋ mono ii goda qeŋ muro laligowaa.” Kiaŋ.

27 Jiisasnoŋ jero, “Wosona keteda koi kouma gojono bana kuuro laligojeŋ. Mono nomaeŋ jewenaga? Qaa moŋganjeŋ. Oo Ama, gii saanoŋ konjiliŋ aua kambaŋ kokanoŋa metogoŋ nomba. Kileŋ kokaembaajoŋ kaeŋ mende qama koolimaŋa: Aua koi kawaa siimboboloya ii mokosiŋgoŋ bosimaŋiwaajoŋ ama geeŋgo qananoŋ anjaŋ. 28 Oo Ama, gii mono geeŋgaa akadamuga ama noma qabuŋaga meŋ somariiwa.” Kaeŋ qama kooliro Siwenoŋga qaa kokaeŋ kolooro, “Niinoŋ akadamuna ama goma kanoŋ qabuŋana meŋ somariiwe ano toroqeŋ meŋ somariiwe seiŋ kembaa.”

29 Qaa ii kolooro ejemba tuuŋ naŋgi yoŋonoŋ ii moma jegi, “Pilisik qendaŋ qaja.” Tosianoŋ jegi, “Siwe gajoba moŋnoŋ iwaajoŋ qaa ijoro otoŋa mojoŋ.”

30 Kaeŋ kaeŋ jegi kokaeŋ iŋijoro, “Otoŋ ii noojoŋ ama mende koloojato, ii oŋoojoŋ ama kolooja. 31 Kambaŋ kokaamba gomaŋa gomaŋa ejemba nanamemeŋ bologa otaaŋkejuti, iyoŋoo gosigosi kambaŋgianoŋ mono ba koma oŋonja. Anutunoŋ yoŋoo qaagia jeŋ tegoŋ iroŋa meleema oŋono qagianoŋ ubaatiwaajoŋ anja. Kambaŋ kokaamba Anutunoŋ Kileŋaa Poŋa gomaŋ so galeŋ koma oŋomakeji, mono ii konjono seleeŋgeŋ kamaawaatiwaajoŋ anja. 32 Iinoŋ kamaawaato, noojoŋa kokaeŋ koloowaa: Ejembanoŋ balonoŋga noma kanakeewaŋ kosigogi uma nambe kana kolooro ejemba gomaŋ so horoŋ oŋombe luluuma noonoŋ kaŋ tuuŋ meŋ nambuya.” 33 Ii koomu nomaaŋa komuwaati, iikawaa qaa saaŋa kaeŋ iŋijoro mogi.

34  * Ond 110.4; Ais 9.7; Eze 37.25; Dan 7.14Ejemba tuuŋ yoŋonoŋ ii moma kokaeŋ ijogi, “Nono Kana qaa weeŋgoŋ kokaeŋ mojoŋ, ‘Kraistnoŋ mende komuŋ tetegoya qaa laligoŋ uma laligowaa.’ Giinoŋ naambaajoŋa kokaeŋ ninijojaŋ, ‘Siwe gomambaa Eja Hoŋa namonoŋga meŋ kosigogi kanakeewaŋ uma nambaa.’ Siwe gomambaa Eja Hoŋa ii moronoŋ?”

35 Ii moma meleema oŋono, “Asasaganoŋ kambaŋ torodaamoŋ mombo batugianoŋ asariŋ laligowaa. Paŋgamanoŋ qagianoŋ uma turuŋ oŋono kawaa buŋa koloowubotiwaajoŋ mono asasaganoŋ kema kaŋ laligowu. Asasaganoŋ eŋ oŋombaatiwaa so mono asasaganoŋ laligowuya. Moronoŋ paŋgamanoŋ jibujabu kema kaŋkeji, mono dakanoŋ keubaati, ii mende moja. 36 Kawaajoŋ asasaganoŋ kambaŋ dawi oŋowo laligowaati, kambaŋ iikanoŋ ii mono uutanoŋ moma aŋgoŋ koma laligowu. Asasagaa kanageso kolooŋ laligowutiwaajoŋ mono asasaga ii moma laariŋ laligowu.” Jiisasnoŋ qaa kaeŋ jeŋ oŋomesaoŋ asaŋgoŋ keno. Kiaŋ.

37 Jiisasnoŋ aŋgoleto mamaga meŋ laligoro Juuda galeŋ yoŋonoŋ ii jaagianoŋ iigito, kileŋ ii mende moma laariŋ muŋ silemale laligogi. 38  * Ais 53.1; 6.10Kaeŋ laligogi gejatootoo eja Aisaiawaanoŋ qaa moŋ ii hoŋawo kolooro. Iinoŋ qaa ii kokaeŋ oorota eja,

39 Hamoqeqe Toya moma laariŋ mubombaajoŋ bimooŋ amamaagiti, Aisaianoŋ iikawaa kania moma qaa moŋ waladeeŋ kokaeŋ jeŋ oorota eja,

41 Jiisasnoŋ Siwewaa asamararanoŋ asariŋ laligoro Aisaianoŋ kaeŋ iima kania jeŋ asariŋ qaa ii jero.

42 Jotamemeya ano galeŋkoŋkoŋ eja yoŋoonoŋga mamaganoŋ kaaŋagadeeŋ Jiisas moma laarigito, Farisii (Kana qaawaa kaparaŋkoŋkoŋ) yoŋonoŋ qamakooli miri tuuŋnoŋga konjoma oŋombubotiwaajoŋ ii asuganoŋ mende jokoloogi. 43 Ejembanoŋ mepeseeŋ oŋombutiwaajoŋ kaparaŋ koŋgito, Anutunoŋ mepeseeŋ oŋombaatiwaajoŋ ii qemasologeŋ aŋgi. Kiaŋ.

44 Tosianoŋ kaeŋ aŋgito, Jiisasnoŋ qama kokaeŋ jero, “Moŋnoŋ moma laariŋ nonji, iinoŋ niigadeeŋ mende moma laariŋ nonjato, moronoŋ wasiŋ nonoti, ii kaaŋagadeeŋ moma laariŋ muja. 45 Moŋnoŋ nii niima mono wasiŋ nonoti, ii kaaŋagadeeŋ iimakeja. 46 Ejemba moŋ nii moma laariŋ nonji, iinoŋ mono paŋgamanoŋ qokotaaŋ laligowabo. Kawaajoŋ niinoŋ kamaaŋ asugiŋ gomaŋa gomaŋa oŋoo asasagagiaga kolooweta laligojeŋ.

47 “Niinoŋ kamaaŋ asugiŋ gomaŋa gomaŋa oŋoo qaagia jeŋ tegomambaajoŋ ama mende kaweto, ejemba baloŋ so hamo qeŋ oŋombe kambaŋ kokaamba letoma Siwewaa buŋa koloowuti-waajoŋ ama kaweta laligojeŋ. Kawaajoŋ ejemba noo Buŋa qaana moma mende teŋ koma otaaŋkejuti eeŋ, niinoŋ iyoŋoo qaagia mende jeŋ tegomaŋa. 48 Daeŋ yoŋonoŋ jejewili ama noma Buŋa qaana mende moma aŋgoŋ konjuti, iyoŋoo jeŋ teegogianoŋ mono kokaeŋ koloowaa: Niinoŋ Buŋa qaa jewe mogiti, qaa iikanoŋ mono kambaŋ somatanoŋ qaagia jeŋ tegoro siimbobolo iikawaa so mobuya.

49 “Kania kokaembaajoŋ kaeŋ koloowaa: Niinoŋ Buŋa qaa jeŋ laligoweti, ii qaa omaya qaagoto, ii neenaa ainanoŋga mende kolooro jeŋ laligoŋ koube. Kaeŋ qaagoto, Ama wasiŋ nonoti, ii aŋo qaa je nomaeŋ jemaŋati, iikawaa jeŋ kotoŋ nono jeŋ laligoŋ koujeŋ. 50 Amawaanoŋ jeŋkooto iikanoŋ mono oŋo laaligo kotakotanoŋ ama oŋomakeja, ii mojeŋ. Kawaajoŋ Amananoŋ ii jemaŋatiwaajoŋ jeŋ kotoŋ nonoti, mono iikawaa so Buŋa qaa jeŋkejeŋ.” Kiaŋ.