1  * Hib 11.17-19 Iwoi ii kolooro kambaŋ tosia tegoro Anutunoŋ Aabraham aŋgotete meŋ muro. Qata “Aabraham!” qaro iinoŋ “Nii koi nanjeŋ,” jeŋ meleeno.

2  * 2 Kor 3.1 Kaeŋ meleeno kokaeŋ ijoro: “Motooŋ mera soroga Aisak uuganoŋ jopagoŋ muŋkejaŋi, ii mono wama Mooria balonoŋ kema baaŋa moŋ qendeema gomaŋati, iikanoŋ uma ii noo siimoloŋ oowa.”

3 Kaeŋ ijoro Aabrahamnoŋ eŋ gomaamba totooŋanoŋ waama doŋgi qaganoŋ duŋ raraya meagoŋ weleŋqeqeya woi ano meria Aisak uŋuano. Siimolombaa geria soyanoŋ kondaboroŋ boraŋgoŋ ama uŋuama Anutunoŋ baloŋ ijoroti, iikanoŋ keno. 4 Kema laligoŋ weemboria karooŋa kanoŋ jaayanoŋ uuŋ waama baloŋ ii iiro koriganoŋ ero. 5 Ii iima weleŋqeqewoita ii kokaeŋ irijoro: “Oro doŋgiwo koi rari nii ano mera noronoŋ endu kema Anutu waeya meŋ mepeseeŋ mombo eleema oroonoŋ kawota.”

6 Aabrahamnoŋ kaeŋ irijoŋ siimoloŋ ooŋoombaa gere boraŋawo meŋ meria Aisakwaa sawiŋanoŋ ano uro aŋo gere jo ano soo mero. Kaeŋ mero motooŋgara keni. 7 Kaeŋ kema Aisaknoŋ doroŋ ama maŋa Aabraham kokaeŋ ijoro: “Ama!” Kaeŋ ijoro kokaeŋ meleeno: “Wae, merana naama?” Kaeŋ meleeno kokaeŋ qisiro: “Gere jeta ano gere ii koi meŋ kajoto, siimoloŋ ooŋoombaa lamaya ii dakanoŋ?”

8 Kaeŋ qisiro maŋanoŋ kokaeŋ meleeno: “Merana, Anutu aŋo mono siimoloŋ ooŋoombaa lamaya moŋ mokolooŋ norombaa.” Kaeŋ meleeno toroqeŋ motooŋgara keni.

9  * Jei 2.21 Kema Anutunoŋ baloŋ jeroti, iikanoŋ keuma nama siimoloŋ ooŋoombaa alataya moŋ meŋ gere iikawaa qaganoŋ ama areŋgoro. Areŋgoŋ meria Aisak somoŋgoŋ alatanoŋ gere qaganoŋ ano. 10 Ama meria uumambaajoŋ boria boraama soo kopiŋanoŋa horomambaajoŋ ano. 11 Soo horomambaajoŋ ano iikanondeeŋ Pombaa gajobanoŋ Siwenoŋa Aabrahambaajoŋ kokaeŋ qaro: “Aabraham, Aabraham!” Kaeŋ qaro “Nii koi nanjeŋ,” jeŋ meleeno.

12 Kaeŋ meleeno kokaeŋ ijoro: “Boroga mono merawaa qaganoŋ mende amba. Iwaa qaganoŋ iwoi moŋ mende amba. Giinoŋ meraga motooŋgo soro ii noojoŋ mende aŋgoŋ konjaŋiwaajoŋ kanaga kete kokaeŋ moma yagojeŋ: Gii Anutuwaa qaa jeta uuguwabotiwaajoŋ keega momakejaŋ.”

13 Kaeŋ ijoro iikanondeeŋ ataama uuŋ iiro lama ejia moŋ ilianoŋ gere bambaŋawonoŋ giliro kemero nano. Ii iima kema meŋ kaŋ meriaa kitianoŋ lama iikanoŋ siimoloŋ ooro. 14 Kawaajoŋ Aabrahamnoŋ baloŋ iikawaa qata ii ‘Poŋnoŋ mokolooŋ norombaa,’ jeŋ qaro. Kambaŋ kokaamba kaaŋiadeeŋ qaa kokaeŋ qamakeju: “Poŋnoŋ ii baaŋanoŋ mokolooŋ norombaa.”

15 Pombaa gajobanoŋ Aabrahambaajoŋ Siwenoŋa mombo kokaeŋ qaro indiŋa woi kolooro: 16  * Hib 6.13-14 “Poŋ niinoŋ kokaeŋ jejeŋ: Neeno neenaa qananoŋ qama jojopaŋ qaa kokaeŋ jeŋgo jeŋ kotiijeŋ: Giinoŋ sili koi ama meraga motoondago ii noojoŋ mende aŋgoŋ konjaŋi, 17  * Hib 11.12 iikawaajoŋ niinoŋ oŋanoŋ gii kotuegoŋ goma kolooŋseisei gombe gbiliuruga yoŋonoŋ honombonoŋa qaa seiwuya. Seigi jaŋgogianoŋ mono sombiŋ kanakeewambaa seŋgelaoya kaaŋa koloowaa ano kowe goraayanoŋ sakasiŋ eŋ kenjuti, iikawaa so koloowaa. Goo gbiliuruga yoŋonoŋ mono kotiiŋ kereurugia uŋuŋ haamo ama siti baloŋgia uŋuama aŋgoŋ koma laligowuya. 18  * Apo 3.25 Giinoŋ noo qaana teŋ konjaŋi, iikawaajoŋ goo gbiliuruga yoŋoonoŋga mombaajoŋ ama noo kotumotuenanoŋ mono namowaa kanageso tuuŋ kuuya yoŋoo qagianoŋ uro oyaŋboyaŋ mokoloowuya.”

19 Pombaa gajobanoŋ kaeŋ ijoro Aabraham meriawo eleema weleŋqeqewoita yoroonoŋ kema aitoŋgoŋ motooŋ Beerseba gomanoŋ keŋgi. Aabrahamnoŋ Beerseba gomaŋ kanoŋ opo sel kuuŋa mororoŋgoŋ laligoro. Kiaŋ.

20 Kambaŋ tosia tegoro buzu qaa moŋ kokaeŋ aŋgi Aabrahambaanoŋ karo: “Milkanoŋ kaaŋiadeeŋ nemuŋga kolooja. Iinoŋ koga Naahorwaa merauruta tosaaŋa oŋono.” 21 Meria mutuyaa qata ii Uz, iwaa koga Buz ano iwaa kanianoŋ Kemuel, Arambaa maŋa. 22 Kemuelwaa kanianoŋ Kesed, Hazo, Pildas, Jidlaf ano Betuel. 23 Betuelnoŋ Rebekawaa maŋaga kolooro. Milkanoŋ Aabrahambaa koga Naahorwaa merauruta 8 ii oŋono. 24 Naahorwaa embia sewaŋa mende memeta qata Reuma iinoŋ kaaŋiadeeŋ merauruta tosaaŋa oŋono. Yoŋoo qagia ii Tebe, Gaham, Tahas ano Maaka. Kiaŋ.