ASEE
Sɑɑ Bɑbilonin diyɑ Asee u wurɑmɑ yorun di Yerusɑlɛmuɔ kɑ Yudɑ gɑbu sɑnnu. Sɑɑ ye Yudɑ be, bɑ wurɑmɑ bɑ wɑ̃ɑ Yerusɑlɛmuɔ, yerɑ bɑ Yinni Gusunɔn sɑ̃ɑ yee ten bɑnɑ seewɑ. Adɑmɑ ben hɑniɑ ye, yɑ rɑ yɛmiɑ mɑ bɑ sɑ̃ɑ yee ten bɑnɑ deri wɑhɑlɑ ye bɑ wɑɑmɔn sɔ̃ sɑɑ Sɑmɑrigibun min di kɑ sere mɑɑ gɔ̃ɔ te tɑ duɑ ben suunu sɔɔn sɔ̃. Yerɑ be bɑ dukiɑ mɔ, bɑ tii dii geenu bɑniɑmmɛ. Sɑɑ ye sɔɔ, ben goo kun mɑɑ kĩru mɔ u kɑ Yinni Gusunɔn sɔmburu ko. Mɑ Asee u seewɑ u Yudɑbɑ gerusi.
Yen biru u bu dɑm kɛ̃mɔ bu kɑ bɑnɑ ye se. Win gɑri yi sɔɔ, u nɛɛ, bu Gusunɔ mɛm nɔɔwɔ kpɑ bu win sɔmburu nɔni doke. Yerɑ yɑ burɑm bo n kere bɑ n ben tiin ɑrufɑɑni kɑsu.
Tire ten kpunɑɑ
1. Sɑ̃ɑ yerun bɑnɑ, wiru 1.
2. Sɑ̃ɑ yee kpɑɑ ten girimɑ, wiru 2.
1
Sɑ̃ɑ yerun bɑnɑ
1 Dɑrusi Pɛɛsibɑn sinɑ bokon bɑndun wɔ̃ɔ yirusen suru nɔɔbɑ tiɑsen tɔ̃ɔ gbiikiru sɔɔrɑ Gusunɔ wɔllu kɑ tem Yinni u kɑ Sorobɑbɛli Seɑlitiɛlin bii, Yudɑbɑn kpɑro kɑ yɑ̃ku kowo tɔnwero Yosue, Yosɑdɑkin bii gɑri kuɑ sɑɑ win sɔmɔ Aseen nɔɔn di u nɛɛ, 2 bɛɛ Isirelibɑ i mɔ̀, sɑɑ kun turɑ i kɑ nɛn sɑ̃ɑ yeru bɑni. 3 Yen sɔ̃nɑ nɑ bɛɛ gɑri yini sɔ̃ɔmɔ nɑ nɛɛ, 4 n bɛɛ wɛ̃re i n wɑ̃ɑ dii burɑnu sɔɔ ni bɑ sɔmɑ kuɑ, kpɑ nɛn sɑ̃ɑ yeru tɑ n bɑnsu sɑ̃ɑ? 5 Yen sɔ̃nɑ nɛ, wɔllu kɑ tem Yinni nɑ nɛɛ, i bwisikuo bɛɛn dɑɑ ye i mɔ̀n sɔ̃. 6 Wee i dĩɑnu duurumɔ too, ɑdɑmɑ fiikowɑ i gɛ̃ɛmɔ. I dimɔ, ɑdɑmɑ i ǹ debumɔ. I nɔrumɔ, ɑdɑmɑ bɛɛn nɔru kun kpeemɔ. I yɑ̃nu dokemɔ, ɑdɑmɑ nu ǹ bɛɛ wooru girɑmmɛ. Ì n bɛɛn kɔsiɑru mwɑ, tɑ rɑ doonɛwɑ nge te bɑ doke bɔɔ gɛ̃ɛre sɔɔ. 7 Yen sɔ̃, nɛ, Gusunɔ wɔllu kɑ tem Yinni nɑ nɛɛ, i bwisikuo bɛɛn dɑɑ ye i mɔ̀n sɔ̃. 8 I seewo i dɑ guurɔ i dɑ̃ɑ kɑsumɑ i kɑ nɛn sɑ̃ɑ yee te bɑni, kpɑ i mɑn bɛɛrɛ wɛ̃. Ye sɔɔrɑ ko nɑ n nuku dobu mɔ. Nɛ, Yinni Gusunɔwɑ nɑ yeni geruɑ. 9 I tɑmɑɑ i ko i dĩɑnu wɑwɑ too bɛɛn gbeɑn di. Adɑmɑ wee fiikowɑ i wɑ. Fiiko ye i wɑ i kɑ dɑ yɛnuɔ mi, mɑ nɑ ye wom wure nɑ yɑrinɑsiɑ. Mbɑn sɔ̃. Yèn sɔ̃ i nɛn sɑ̃ɑ yeru deri tɑ kuɑ bɑnsu. Mɑ bɑɑwure u sɛnde u kɑ win tiin diru bɑni. Nɛ, Gusunɔ wɔllu kɑ tem Yinniwɑ nɑ yeni geruɑ. 10 Yen sɔ̃nɑ gurɑ kun mɑɑ nɛmɔ. Mɛyɑ tem kun mɑɑ bɛɛ dĩɑnu wɛ̃ɛmɔ nge mɛ n weenɛ. 11 Nɑ derɑ gbeburɑ kuɑ bɛɛn tem kpuro sɔɔ kɑ guunɔ. Mɑ ɑlikɑmɑ kɑ resɛm kɑ olifi kpuro yɑ gberɑ. Dĩɑ ni tem mu rɑ kpiisie gesi kpuro, nu gberɑwɑ. Mɑ tɔmbu kɑ yɑɑ sɑbenu nɔni sɔ̃ɔre. Mɑ bɛɛn sɔmɑ ye i mɔ̀ kpuro yɑ kuɑ kɑm.
12 Yerɑ Sorobɑbɛli, Seɑlitiɛlin bii, kɑ yɑ̃ku kowo tɔnwero Yosue, Yosɑdɑkin bii, kɑ Isireli be bɑ tie kpuro, bɑ Gusunɔ ben Yinnin gɑri yi mɛm nɔɔwɑ nge mɛ Gusunɔ u win sɔmɔ Asee sɔ̃ɔwɑ u bu sɔ̃. Mɑ bɑ nɑndɑ wi, Yinni Gusunɔn wuswɑɑɔ.
13 Asee, Yinni Gusunɔn gɔro u bu sɔ̃ɔwɑ ye Yinni Gusunɔ u nùn sɔ̃ɔwɑ. U nɛɛ, Yinni Gusunɔ u wɑ̃ɑ kɑ bɛɛ.
14 Mɑ u Sorobɑbɛli, Yudɑbɑn kpɑro kɑ Yosue, yɑ̃ku kowo tɔnwero kɑ sere Isireli be bɑ tie dom yɑmiɑ. Bɑ nɑ bɑ ben Yinni wi u wɔllu kɑ tem mɔn sɑ̃ɑ yee ten sɔmburu toruɑ, 15 Dɑrusin bɑndun wɔ̃ɔ yirusen suru nɔɔbɑ tiɑsen sɔ̃ɔ yɛndɑ nnɛse sɔɔ.