1 Qinée Pauroosa Ánutuna íriranannai ásauku mundírana Yísunaindi máridaqa, mifá diqiqoo fásiqausa máridaqa. Ánutuna maqásaa fasiqa anaasee Eefeesusa máqusai máriasa ásauku mundírana Yísuna ufamau andeeqásee maqee maqee fímariasa ínni maa-akarána rúmannimaqaidaqa.

2 Maasá qíkoofa Ánutufa faqa maasá karaambáiqa ásauku mundírafa Yísufa faqa narí áfaarirana faqa narí asooárana faqa ínni nímiani.

3 Maasá dúfi dúfi qírana maasá qíkoona Ánutuna faqa maasá karaambáiqa Yísuna faqa nímiaqa. Maasá ásauku mundíranaki kéeqafufanoo miná ákoofa Ánutufa ámiqi ámiqirana maasá Yísuna namufaqa qíminau. Mifá innaarúnaindaraa ámiqira dadaaqirana qimaqaifanoo miqóo innaarúnai máridanoo, minára maasá dúfi dúfi qímamaqaidaqa. 4 Óoqai maa-maqa maaqána sía áuqu kamuqoo faiqí faqa sía máru kamuqoo Ánutufa moómoosa kambíaqa márifandínausakinaana maasá rusandeesámumandee márararee qímaqoosa maraqaisá máridaqa. Narí ásauku mundírana Yísunannai maasá maraqoosá sía áaqarausa máriaqeera nóori kándamasee andeeqárausa máriaqee qímasee maasá rusandeesámumasee maraqoosá máridaqa. 5 Sía faiqí máru kamuqoo Ánutufa narí áidiranannai maasára maaqímminau, qeeqá qísauku mundíranannai misá qiní faiqi námu qíraamuqmaakai kámmambifaqa qeeqá únnannai misá mara quqáanauree qinau. Ánutuna áidirafa fúaninnana miqíminoo máridanoo. 6 Ánutufa narí káaqa qara areenara áfaarirana narí ámuqusira ámaaku káqi nímimari ainainnara foora káqi níminau. Minára maasá qímuqusa óokiqari idaaqíra áinaina uqannée qiaqéera káqi níminau.

7 Ánutufa narí ásauku mundírana kúqiranannai maasá mandáinainakinaana idukúqiseenoo maasá mandóosana ákiaqara minníqisainaqa márianaura. Maasá minára irisée Ánutuna firaa afaariranara akooqóo uqanna márifaqa qáfamasee irisée náqimasee máraanauree minára rufíaida fúrufaridaqa. 8-9 Ánutufa narí írirana firaaná faqa qáfeemariana faqa maraséenoo minánnai óoqai márararee qímaqoona maraséenoo narí kukéeqara írirana ásauku mundíranannai aiqáma qímaqoo ainaina ánoonaikianifeera qímasee miná maa-kamúqoo kooroomásee narí faiqi námu áraamummaakaikíranara maasá qímaqiminau. 10 Ánutufa narí kai írinoo andeeqára áukuanee qímasee narí óoqai kambíqaaninna ainainara qímarufa taikáannoo minára qímarufa maaqímmiannoo Ánutufa aiqáma ainainna áuquqoo áinainafa innaarúnai mári ainaina faqa maaqóo mári ainaina faqa óonu maree ani máreeqeenoo moodáanaki quqáseenoo ásauku mundírafa misá níkiaqasaa máriannoo.

11 Ánutufa mi-aiqama ainainná narí óoqai fuanée qímaqoomau fídanoo miqídanoo. Ánutufa narí óoqai fuanée qímaqoomau fídanoo maasá narí áiku ásauku máriaqee qímasee faiqí ánaaseeki rusandeesámumandee maasá máranau. Sía káqi miqínau, ásauku mundíranannai kai miná áiku ásauku máriafanausa máridaqa. Óoqai indaarú óosana ároo aukuanna mi-irirána maraqoomáu fídanoo ásauku mundíranannai maasá máraidanoo. 12 Maasá ásauku mundírana írirana náaree indaarú irisée minára áfeesimariasa maasá Ánutuna káaqa aréenaranara dúfi dúfi qídaqa.

13 Ínnee Eefeesusa máqannaasa faqa miqíkai íqa máriafanoo. Ámiqira fasaasa ufa innaarúna ásumu márirana ními maría ufana ínnee iriséeqa kúqaa ánoonufee qufanoo Ánutufa narí náaquqara máraquna nímiani qímasoofa ínni níminoo minánnai naríara útaaqanau. 14 Ánutuna maraquna nímirafa Ánutufa innaarúnai qímianinna ainainnara qíma afeekaikámma útaaqamáqoofa máridanoo, mifá Ánutufa kúqaa mandáinaina ákiaqara rumbáranakinaana idukírana qímiannoo fee qímarifa máridanoo, maasá minára irisée Ánutuna kúqaa aréenaranara dúfi dúfi qídaqa.

15-16 Qinée Pauroosa minára iriséeqa ínnee Eefeesusa máqannaasa Karaambáiqa Yísuna saqárikiranara irisée faiqí ánaaseera Ánutuna ufa írimariasara rídaqa dadaaqídaqa minára iriséeqa íriafannaqooqari qinée Pauroosa ínniara Ánutufinnai dúfi dúfi qídaqa. Qinée maqee maqee ínniara innaaru qídaqa, maasá karaambáiqa ásauku mundírana Yísuna káaqa aréenarana ákoofa 17 Ánutufa narí maraquna ínni níminanoo mifá írirana faqa Ánutuna óosana faqa kooroománnimaqáinaqa ínnee minára íriaqeera innaaru qídaqa.

18 Ánutufa ínni náaramásee narí aréenaranara áfeesiaqee qímarianara ínnee íriaqee qímasee ínniara innaaru qímasaanaqa ínni nífu nitikúra quandásainaqa aréenarana nímianinnanara áfeesiaqeera innaaru qídaqa. Náaquqara ámiqi ámiqirafa idaaqírafa moómoo uqanna narí maqásaa fasiqa anaasee innaarúnai nímirara qíma afeekaikídanoo nímiannoo mináuqara faqa ínniara íriaqeera innaaru qídaqa. 19-20 Maasáki miná ufasaa írirana rusímariaqooqari Ánutuna afeeka fannoo maasáki aináini marínara faqa ínnee íriaqeera qinée Pauroosa ínniara innaaru qídaqa. Ánutufa ásauku mundírana kúqiranakinaana uqéerasee innaarúnai narí aaqá narí ásauku uqannái óoqumaruqoo firaa afeeka faqa maasáki aináinimárifa faqa amana amana kái moodáa firaa afeeka máridanoo.

21 Miqóo innaarúnai ásauku mundírafa aiqáma ainainasaa úriqaramáfi rakísidanoo, aiqáma innaarúnai úriqararausa faqa faiqí firaasá faqa afeekafaqáasa faqa karaambáiqauqa faqa misáuqa faqa úrinaaqaramáfi rakísidanoo. Mifá aiqáma afeeka nuqu faqáasa maa-maqa maaqánaki máriasa faqa innaarúnai máriasa faqa úrinaaqaramáfi rakísidanoo. 22 Ánutufa aiqáma ainaina maréeqeenoo ásauku mundírana áramandunnai quqáseenoo miná maréeqeenoo Yísuna ufara suqímariasa níkiaqasaa quqásaifanoo aiqáma ainaina úriqarara karaambaiqa máridanoo. 23 Yísuna ufara suqímariasa Yísuna adakára foora máridaqa, aiqámai máriainainafa qumbiqéemarifa narí adakáki Yísuna ufara suqímaríasaki firaaqóo máridanoo.