1 येरूब-बाल आ तौ अबीमेलेक आ ममा आ खिं ङा मुर आन बाक्‍तीक शेकेम सहरमी लमाक्‍त। मेकोमी आ मामा आन खिं ङा मुर मौली नेल्‍ल आन कली न्‍यायाधीस ८:३१ 2 “शेकेम सहर ङा मुर नेल्‍ल कली लोव़ का हिल्‍लो पन। मार लोव़ हिल्‍लो पन देंशा हना ‘येरूब-बाल आ ७० जना तौ नेल्‍लेमी इन कली सासन पशो रिम्‍शो दय गोम इन कली सासन पशो रिम्‍शो?’ गो इन हुश बाक्‍नुङ, दे मिम्‍तीन” देंमाक्‍त। न्‍यायाधीस ९:१८ 3 मिनु आ मामापुकीमी मेको शेकेम ङा मुर आन कली मेको लोव़ शोव़ङमे बाक्‍त। मिनु मुर नेल्‍लेमी “मेको आंइ लोक्‍ब बाक्‍ब” दे अबीमेलेक आ नोले खोइक्‍चा थुं पामे बाक्‍त। 4 मिनु मेकोपुकीमी अबीमेलेक कली बाल-बेरीत आ मन्‍दीर रे पा ७० शेकेल चांदी के क्‍येट गेमे बाक्‍त। मिनु मेकोमी मेको क्‍येट लाइश्‍शा, मरिम्‍शो पाइब मुर आन कली गेवा बाक्‍त। मिनु मेकोपुकी मेको आ नोले खोदमे बाक्‍त। न्‍यायाधीस ८:३३ 5 मिनु मेको नेल्‍ल आ आफ आ खिं ओफ्रामी लमा बाक्‍त। मेकेर येरूब-बाल आ तौ नेल्‍ल आन कली फुल्‍लु का तारी क्‍योरशा सदमे बाक्‍त। तन्‍न येरूब-बाल आ कान्‍छा तौ योथाम ख्रुइश्‍शा ब्रोंइमाक्‍त। 6 मिनु शेकेम नु बेथ-मिल्‍लो ङा ठेयब मुर नेल्‍ल खुम्‍सीशा, शेकेममी बाक्‍शो ठेयब थाम आ नेक्‍था बाक्‍शो ठेयब रवा आ पुंमी अबीमेलेक कली पिप सेल्‍मे बाक्‍त। उत्‍पत्ती ३५:४; यहोसु २४:२६

7 मिनु ठेयब मुरपुकीमी मेको लोव़ योथाम कली नेंपदमे बाक्‍त। मेको लशा गेरीजीम डांडामी राम्‍माक्‍त। मिनु ठेयब सेंदामी “शेकेम सहरम बाक्‍ब ठेयब मुर नेल्‍ल, गे आं लोव़ नेंतीनी हना, परमप्रभुमी इन लोव़ नेंब। 8 काबु रवा नेल्‍ल खुम्‍सीशा, आंम कली पिप सेल्चा, दे लोव़ पमुमा बाक्‍त। मिनु मेकोपुकीमी तेल रवा कली ‘आंइ पिप दुमीन’ देंमा बाक्‍त। 9 तन्‍न तेल रवामी ‘मार, देवी देवता नु मुर आन कली ठेयब सेल्‍पाइक्‍ब आंम के रिम्‍शो तेल सेल्‍चा प्रोंइशा, गो रवा आन कली सासन पाइनुङा?’ देंमाक्‍त। 10 मिनु रवापुकीमी फोव़शी रवा कली ‘गे आंइ पिप दुमीन’ देंमा बाक्‍त। 11 मिनु फोव़शी रवामी ‘मार, आंम के रिम्‍शो जिज नु ब्रोव़शो फल सेल्‍चा प्रोंइशा, गो रवा आन कली सासन पाइनुङा?’ देंमाक्‍त। 12 मिनु रवापुकीमी अङगुर बोट कली ‘गे आंइ पिप दुमीन’ देंमा बाक्‍त। 13 मिनु अङगुर बोटमी ‘मार, देवी देवता नु मुर आन कली ग्‍येरपाइक्‍ब आं के अङगुर शांबु सेल्‍चा प्रोंइशा, गो रवा आन कली सासन पाइनुङा?’ देंमाक्‍त। 14 मिनु नोले रवापुकीमी चू रवा कली ‘गे आंइ पिप दुमीन’ देंमा बाक्‍त। २राजा १४:९ 15 मिनु चू रवामी ‘गेपुकीमी थमा पा, आं कली इन पिप सेल्‍चा दाक्‍नीनी हना, आं नेक्‍था जाक्‍शा, आं पुंम बाक्‍कीन। मबाक्‍तीनी हना, चू रवा रे पा मी ग्रूशा लेबानोन ङा ठेयब रवा नेल्‍ल आन कली खतम सेल्‍ब’ देंमाक्‍त” दे कथा सेल्‍शा ठेयब सेंदा पा देंमाक्‍त। 16 मिनु योथाममी “मुल नेनीन, गे अबीमेलेक कली थमा सुइश्‍शा नु रिम्‍शो थुंमी पिप सेल्‍तीनी हना, दुम्‍ब। मिनु येरूब-बाल नु आ खिं ङा मुरुम इन कली रिम्‍शो पशो खोदेंशो पा, गेमी यो मेको आन कली रिम्‍शो पाइतीनी हना, दुम्‍ब। 17 आं आफोमी बेक्‍नुङ, दे महिंथु, लडाइ पा इं कली मिदयानी रे पा प्रोंइतु। 18 तन्‍न मुलाक्‍त आं आफ आ खिं ङा मुर आन कली थम मरिम्‍शो पाइतीनी। मेको आ ७० जना तौ आन कली फुल्‍लु तारी क्‍योरशा साइक्‍तीनी। मेको आ वाइलीम आ तौ अबीमेलेक कली शेकेम ङा पिप सेल्‍तीनी। मारदे हना मेको इन लोक्‍ब बाक्‍ब। 19 मिनु मुलाक्‍त गेपुकीमी येरूब-बाल नु आ खिं ङा मुर आन कली रिम्‍शो पा मान पशो बाक्‍तीनी हना, गे अबीमेलेक नु ग्‍येरसीन। मिनु अबीमेलेक यो गेपुकी नु ग्‍येरसेक्‍ल। 20 तन्‍न मोदेंशो मदुम्‍त हना, अबीमेलेक रे मी ग्रूशा, शेकेम नु बेथ-मिल्‍लो ङा मुर आन कली खतम पोक्‍गल। मिनु शेकेम नु बेथ-मिल्‍लो ङा मुर रे मी ग्रूशा अबीमेलेक कली खतम पोक्‍गल” देंमाक्‍त। न्‍यायाधीस ९:५७ 21 मिनु योथाम मेकेर रे प्रोक्‍शा, बेयर माइश्‍शो सहरमी जाक्‍दीम्‍माक्‍त। मिनु मेको आ लोक्‍ब अबीमेलेक तशा हिंशा, मेकेरेन बाक्‍माक्‍त।

22 अबीमेलेकमी इस्राएली आन कली बर्स सां सासन पवा बाक्‍त। 23 मेना परमप्रभुमी अबीमेलेक नु शेकेम ङा ठेयब मुर आन दातेमी जिपाइक्‍चा कली मरिम्‍शो जि‍पाइक्‍ब वोल का सोइक्‍ता बाक्‍त। मिनु शेकेम ङा ठेयब मुरपुकीमी मेको कली जोल पा मरिम्‍शो पामे बाक्‍त। १सामुएल १६:१४; १सामुएल १८:१०; १सामुएल १९:९ 24 मिनु परमप्रभुमी येरूब-बाल आ ७० जना तौ आन कली हुश ख्राक्‍श पोक्‍तीके, अबीमेलेक नु मेको कली वारच पाइब शेकेम ङा ठेयब मुर आन कली क्‍येक्‍क लेत्‍चा कली मोदेंशो जिप्‍पाइक्‍ब वोल का सोइश्‍‍शो बाक्माक्‍त। उत्‍पत्ती ९:६ 25 मिनु शेकेम ङा ठेयब मुरपुकीमी अबीमेलेक कली काइ मदाक्‍थु, साइक्चा, दे डांडाम बाप्‍चा कली मुर सोइक्‍तमे बाक्‍त। मेकोपुकीमी लांम गाक्‍ब आन मारेइ मारेइ रोइक्‍तमे बाक्‍त। मिनु लांम बाप्‍शो बाक्‍नीम, दे अबीमेलेक कली तुइक्‍पदमे बाक्‍त।

26 मिनु एबेद आ तौ गाल नु आ खिं खिं ङा मुर शेकेममी बाक्‍चा कली जाक्‍मा बाक्‍त। मिनु शेकेम ङा ठेयब मुरपुकीमी गाल कली थमा सुइश्‍शा, दाक्‍चा गोव़मे बाक्‍त। 27 शेकेम ङा मुर आन अङगुर रूमी लशा, अङगुर सेक्‍शा कोलमी ख्राक्‍गमे बाक्‍त। मिनु आन देवता आ मन्‍दीरमी चाड मानेचा कली लमा बाक्‍त। मिनु मेकेर जशा तूशा अबीमेलेक आ पर्बम शुक्‍शी लोव़ पामे बाक्‍त। 28 मिनु एबेद आ तौ गालमी “अबीमेलेक सु बाक्‍बा ङा? मार, मेको येरूब-बाल आ तौ ममाइ ङा? मेको नु आ लडाइ पाइब आन कप्‍तान जेबुलमी शेकेम आ आफ हमोर आ मुर आन कली गेय मपामे? गो शेकेम ङा मुर, मारदे मेको कली गेय पाइनीकी? उत्‍पत्ती ३४:२ 29 गो शेकेम ङा मुर आन कली सासन पाइब बाक्‍शो नङ हना, गो अबीमेलेक कली क्‍याम्‍दु वा। गो मेको कली ‘लडाइ पाइब शुश सेल्‍शा, लडाइ पय’ देङ वा” देंमाक्‍त।

30 मिनु सहर ङा सासन पाइब जेबुलमी एबेद आ तौ गाल आ देंशो नेंशा, शुश गाइक्‍ता बाक्‍त। 31 मिनु मेकोमी ख्रुइश्‍शोमी अबीमेलेक कली लोव़ सोइक्‍ता बाक्‍त। मार लोव़ सोइक्‍ता बाक्‍त देंशा हना “एबेद आ तौ गाल नु आ खिं खिं ङा मुर शेकेममी जाक्‍शा बाक्‍शा, सहर ङा मुर आन कली इन पर्बम मरिम्‍शो लोव़ पना पन बाक्‍नीम। 32 मोपतीके गे इन लडाइ पाइब नु नाक्‍दोन बोक्‍शा, सहर ङा लाङगा ङा रूमी रिम्‍दीन। 33 मिनु सुनी कना नां दाप्‍ची ना सहर कली लडाइ तोन। मिनु गाल नु आ मुरपुकी लाङगा ग्रूमानु, मेको आन कली मार पचा माल्‍नीनी, मेको पन” देंमाक्‍त।

34 मिनु अबीमेलेक नु आ लडाइ पाइब नाक्‍दोन बोक्‍शा, ४ हुल दुम्‍शा, शेकेम आ लाङगाम लडाइ तोचा कली बाप्‍शा बाक्‍मा बाक्‍त। 35 मिनु एबेद आ तौ गाल सहर ङा लाङगा लशा, सहर ङा ओव़तीक लाप्‍चोमी राप्‍शा बाक्‍माक्‍त। मिनु अबीमेलेक नु आ लडाइ पाइब आन बाप्‍तीक रे ग्रूमा बाक्‍त। 36 मिनु गालमी मेको आन कली तशा, जेबुल कली “मुरपुकी डांडा रे ब्रुम्‍ना ब्रुम्‍न बाक्‍नीम” देंमाक्‍त। मिनु जेबुलमी “मेको मुर ममाइ, डांडा आ वांकु बाक्‍ब। मेको मुर खोदेंशो तांइसीनीम” दे लोव़ लेत्‍ता बाक्‍त। 37 मिनु लेंशा गालमी “कोव़ङीन, मुरपुकी रागी आ दाते रे ब्रुम्‍ना ब्रुम्‍न बाक्‍नीम। मुर आ हुल का चहिं चिङगा कोंइतीक रवा रे यिना यिन बाक्‍नीम” देंमाक्‍त। इजीकीएल ३८:१२ 38 मिनु जेबुलमी “इ ङोंइती ङा ठेयब लेश्‍शो लोव़, ते लाक्‍गा? गे ‘अबीमेलेक सु बाक्‍बा? गो मारदे मेको कली गेय पाइनीकी?’ देंशो नवे। इ मदाक्‍शो मुर मेको मनमी ङा? मुल लावो। मेकोपुकी नु लडाइ पावो” देंमाक्‍त। 39 मोपतीके गालमी शेकेम ङा ठेयब मुर आन ङोंइती लशा, अबीमेलेक नु लडाइ पवा बाक्‍त। 40 तन्‍न अबीमेलेकमी मेको लडाइ ग्रामाक्‍त। गाल चहिं प्रोक्‍माक्‍त। मिनु शुश मुर साइक्‍चा पुंइसमा बाक्‍त। सहर ङा ठेयब लाप्‍चो सम्‍म शुश मुर शोल्‍मो पा बेक्‍शो बाक्‍मा बाक्‍त। 41 मिनु अबीमेलेक लशा, अरुमाह माइक्‍तीक सहरम बाक्‍माक्‍त। जेबुलमी चहिं गाल नु आ खिं खिं ङा मुर आन कली शेकेम रे खेरमी बाक्‍त।

42 आ दीसा शेकेम ङा मुरपुकी लाङगा रूमी लमा बाक्‍त। मिनु मुरपुकीमी मेको लोव़ अबीमेलेक कली नेंपदमे बाक्‍त। 43 मोपतीके आ लडाइ पाइब आन कली हुल सां पा योक्‍शा, सहर मेर ङा रूमी बाप्‍शा, बाक्‍पदा बाक्‍त। मिनु मुरपुकी सहर रे ग्रूशा पिशो तशा, मेको आन कली साइक्‍मी बाक्‍त। 44 अबीमेलेक नु आ हुल रीब पा ङोंइती बारमा बाक्‍त। मिनु सहर ओव़तीक ठेयब लाप्‍चोमी लडाइ पचा सासमा बाक्‍त। अरु हुल निक्‍शी चहिं पिशा, रूमी बाक्‍शोपुकी नु लडाइ पा मेको आन कली सदमे बाक्‍त। 45 अबीमेलेकमी सुनी रे नाक्‍दो सम्‍म लडाइ पा, मेको सहर कली आंम के सेला बाक्‍त। मेकेर ङा मुर नेल्‍ल आन कली साइक्‍मी बाक्‍त। मिनु सहर खतम पोक्‍शा, हिक्‍सी फ्रवा बाक्‍त।

46 मिनु शेकेम ङा बोल्‍यो दरवार ङा ठेयब मुरपुकीमी सहर खतम दुम्‍शो नेंशा, मेकोपुकी एल-बेरीत देवता आ बोल्‍यो खिं आगा लमा बाक्‍त। न्‍यायाधीस ८:३३ 47 मिनु मुरपुकीमी “शेकेम ङा बोल्‍यो दरवार ङा मुर नेल्‍ल बुक्‍शा बाक्‍नीम” दे अबीमेलेक कली नेंपदमे बाक्‍त। 48 मिनु अबीमेलेक नु आ लडाइ पाइब सल्‍मोन डांडामी लमा बाक्‍त। मेकोमी खा लाइश्‍शा, शाक्‍श क्‍योरशा, बालाम लाप्‍शा कुरा बाक्‍त। आ लडाइ पाइब आन कली “गे आं कली मार पशो तनी, रीब पा मोदेंशो पन” देंमाक्‍त। 49 मोपा लडाइ पाइब नेल्‍लेमी मोदेंशो पा शाक्‍श क्‍योरशा, यित्‍मे बाक्‍त। मिनु अबीमेलेक आ नोले खोदमे बाक्‍त। मेको शाक्‍श लाइश्‍शा, एल-बेरीत आ बोल्‍यो खिंम तेल्‍शा, मी सुइक्‍तमे बाक्‍त। मिनु शेकेम ङा बोल्‍यो दरवारम बाक्‍ब नेल्‍ल बेक्‍मा बाक्‍त। मेकेर हजार का खोदेंशो वोंइश मुर नु मीश मुर बाक्‍शो बाक्‍मा बाक्‍त।

50 मिनु मेकेर रे अबीमेलेक थेबेस गे लमाक्‍त। मिनु मेको थेबेस सहर कली लडाइ पा आंम के सेला बाक्‍त। 51 मेको सहर आ दातेमी बोल्‍यो दरवार का बाक्‍माक्‍त। मिनु सहर ङा मुर नेल्‍ले, वोंइश मुर नु मीश मुरपुकी मेकेर ख्रुइश्‍शा, आन नोले लाप्‍चो चोक्‍शा, नेल्‍ल क्‍येङा तला तारी कौसीमी ङोइश्‍शा बाक्‍मा बाक्‍त। 52 मिनु अबीमेलेक मेको बोल्‍यो दरवार आ नेक्‍था जाक्‍शा, लडाइ तोवा बाक्‍त। मिनु बोल्‍यो दरवार कली मी सुइक्‍चा, दे दरवार ङा लाप्‍चो आ नेक्‍था जाक्‍दीम्‍माक्‍त। 53 मेना मीश मुर कामी तला ङा यात तोक्‍शा, मेको आ पिया प्रोल्‍शा गेवा बाक्‍त। 54 मिनु अबीमेलेकमी रीब पा आ या कुरब कली ब्रेश्‍शा “मुरपुकीमी ‘मीश मुर कामी मेको कली साइक्‍तु’ दे मदेंमल, दे रीब पा इ तरवार शोइश्‍शा, साइय्‍यी” दे मदा बाक्‍त। मिनु आ या कुरबमी तूदानु, अबीमेलेक बेक्‍माक्‍त। १सामुएल ३१:४; २सामुएल ११:२१ 55 मिनु इस्राएल ङा मुरपुकीमी अबीमेलेक बेक्‍शो तशा, नेल्‍ल आंम आंम खिं गे लेम्‍मा बाक्‍त। 56 मोपा परमप्रभुमी अबीमेलेक आ आफ कली पशो पाप, आ ७० जना लोक्‍ब आन कली साइश्‍शो आ क्‍येक्‍क लेत्‍ता बाक्‍त। 57 मिनु परमप्रभुमी शेकेम ङा मुर आन मरिम्‍शो पशो आ पर्बम क्‍येक्‍क लेत्‍ता बाक्‍त। मेकोपुकीमी येरूब-बाल आ तौ योथाम आ सराप रमा बाक्‍त। न्‍यायाधीस ९:२०