1 मिनु अब्राहाम शुश बर्स दुम्‍शा, खूशो दुम्‍माक्‍त। परमप्रभु यावेमी अब्राहाम कली आ पतीक नेल्‍लेमी आसीक गेवा बाक्‍त। उत्‍पत्ती १२:२ 2 मिनु अब्राहाममी आ रू खिं नेल्‍ल कोव़ब नु वाइल आन कली अरेब ठेयब वाइल कली “इ गुइ आं फिला तारी वोतो। 3 गो इ कली परमप्रभु यावे, सरीङ नु रागी ङा परमप्रभु आ नेंमी कसम जपाइक्‍नुङ। मार कसम जपाइक्‍नुङ देंशा हना, आं तौ कली आं बाक्‍शो कनान रागी ङा मीश आल मचाक्‍को। उत्‍पत्ती २८:१; प्रस्‍थान ३४:१६ 4 आं रागी नु आं जात ङा मीश आल का चाक्‍को” दे अब्राहाममी वाइल कली मदा बाक्‍त। 5 मिनु वाइलमी “मेको मीश आल एको रागी जाक्‍चा मबिस्‍साक्‍व हना, इन तौ इन जरमेशो रागीम लाइक्‍चा माल्‍नुङा?” दे हिल्‍लो पवा बाक्‍त। 6 मिनु अब्राहाममी “मोदेंशो गेनायो मपावो। आं तौ कली मेक मलतो। 7 ङोंइती परमप्रभु यावे, सरीङ नु रागी ङा परमप्रभुम आं कली आं आफ आ खिं नु आं जात ङा रागी रे ग्रुंइशा, एक सोइक्‍ताक्‍यी। मेकोमी कसम जशा, आं कली लोव़ पाप्‍तु ‘कनान रागी इ चच युइ आन कली गेनुङमी’ दे माइक्‍ती। मेकोमी आ स्‍वर्ग ङा गेय पाइब इ ङोंइती सोइक्‍ब। आं तौ कली आं जात रे मीश आल का चाक्‍को। २इतिहास ३६:२३; नेहेम्‍याह २:२० 8 मेको मीश आल गे नु जाक्‍चा मबिस्‍साक्‍व हना, गे कसम मजशो खोदेंशो दुम्‍नेवे। आं तौ कली चहिं मलतो” दे अब्राहाममी आ वाइल कली अरेवा बाक्‍त। 9 मिनु मेको वाइलमी आ होव़प अब्राहाम आ फिला तारी गुइ वोइश्‍शा, आ देंशो आ पर्बम कसम जवा बाक्‍त।

10 मिनु नोले मेको वाइलम आ होव़प आ दलओंठ १० ओटा लाइश्‍शा, आ होव़प के मारेइ मारेइ रिम्‍शो कोसेली कुरशा लमाक्‍त। मेकेर रे लशा, मेसोपोटामीया रागीमी नाहोर आ बाक्‍तीक सहर, अराम-नहराइम मेर जाक्‍दीम्‍माक्‍त। उत्‍पत्ती ११:२२-३१ 11 मिनु मेकेर जाक्‍दीश्‍शा, नाक्‍नाक्‍दो मीश मुरपुकी ब्‍वाक्‍कु दिथ जाक्‍ची ना, सहर मओव़थु, दलओंठपुकी इनार आ नेक्‍था नाइक्‍पदा बाक्‍त। 12 मिनु मेकोमी “परमप्रभु यावे, आं होव़प अब्राहाम आ परमप्रभु, मुलाक्‍ती आं कली वारच पने। आं होव़प कली इन गेना हना यो दाक्‍तीके कोंइदीने। मेकोन पुंइनुङ। 13 गो इनार आ नेक्‍था बाक्‍नुङ। मिनु सहर ङा मुर आन तमी ब्‍वाक्‍कु दिथ जाक्‍नीम। 14 गो मीश आल कली ‘इ गाग्री ङा ब्‍वाक्‍कु इच्‍का तूचा गेयी’ देंनुङ। मेको मीश आलमी ‘तूङो। गो इ दलओंठ आन कली यो ब्‍वाक्‍कु तुंइनुङ’ देंत हना, मेको मीश आल इन गेय पाइब इसहाक कली योव़शो बाक्‍ल। मोदेंशो दुम्‍त हना, गे आं होव़प कली इन गेना हना यो दाक्‍तीके कोंइताक्‍नी, दे गो तुइक्‍नुङ” दे परमप्रभु कली लोव़ पवा बाक्‍त।

15 मोपा लोव़ पन पना, रेबेका माइश्‍शो मीश आल का गाग्री कुरशा जाक्‍माक्‍त। मेको रेबेका बेथुएल आ तमी बाक्‍माक्‍त। बेथुएल चहिं अब्राहाम आ लोक्‍ब नाहोर नु आ मीश मिल्‍का आस तौ बाक्‍माक्‍त। उत्‍पत्ती २२:२३ 16 रेबेका थम दारशो मीश आल बाक्‍माक्‍त। मिनु ग्‍युंबे मपथु, कन्‍ने बाक्‍शो बाक्‍माक्‍त। मिनु इनारम तोइश्‍शा, आ गाग्री प्रिंशा बेप मुप्‍शा ङोंइ‍से बाक्‍त। 17 मिनु मेको वाइल रेबेका कली ग्रुम्‍थ दोरमाक्‍त। मिनु “इ गाग्री ङा ब्‍वाक्‍कु इच्‍का तूचा गेयी” दे पुना बाक्‍त। 18 मिनु रेबेकामी आ गाग्री रीब पा नाइश्‍शा, तूचा गेवा बाक्‍त। 19 मिनु तूचा गेने थुम्‍शा “गो इन दलओंठ आन कली यो ब्‍वाक्‍कु चाक्‍शा, मरूमा सम्‍म तुंइनुङ” देंमाक्‍त। 20 मिनु आ गाग्री ङा ब्‍वाक्‍कु मेकेर बाक्‍शो शुंगुमी मोइश्‍शा, दोरशा ब्‍वाक्‍कु ब्रथ लमाक्‍त। दलओंठ नेल्‍ल आन कली मरूमा सम्‍म ब्‍वाक्‍कु तुंइदा बाक्‍त। 21 मिनु मेको वाइल छक लाक्‍शा, मेको कली कोव़शा, परमप्रभु यावे आ योव़शो मीश आल बाक्‍म कों मबाक्‍म, दे ब्‍वालेइ पा बाक्‍माक्‍त।

22 मिनु दलओंठ रूथ्री ब्‍वाक्‍कु तूङमे नोले वाइलम आधी शेकेल सुन के मुन्‍द्री नु १० शेकेल सुन के चुरा निक्‍शी शोल्‍शा, रेबेका कली गेवा बाक्‍त। शेकेल का ११.५ ग्राम बाक्‍ब। 23 मिनु वाइलमी “गे सु का आ तमी नवे? आं कली देनो। इ आफ आ खिंम आंइ कली बास बाक्‍चा गेनीमी कों?” दे हिल्‍लो पवा बाक्‍त। 24 मिनु रेबेकामी “गो बेथुएल आ तमी नङ। बेथुएल चहिं नाहोर नु मिल्‍का आस तौ बाक्‍ब। 25 आंइ खिंम नल नु जचा थोव़क शुश बाक्‍ब। बास बाक्‍तीक यो बाक्‍ब” दे मदा बाक्‍त। 26 मिनु वाइलमी खुम्‍की पा बाप्‍शा, परमप्रभु यावे आ ङोंइती गु बाप्‍शा बाक्‍माक्‍त। 27 मिनु मेकोमी “परमप्रभु यावे, आं होव़प अब्राहाम आ परमप्रभु, गे ठेयब बाक्‍नीनी। गे इन शिशी नु इन रिम्‍शो पशो मप्रोंइथु, आं होव़प कली कोंइताक्‍नी। गे आं कली आं होव़प आ लोक्‍ब आ खिं कोंइताक्‍यीनी” दे परमप्रभु यावे कली ठेयब सेला बाक्‍त।

28 मिनु रेबेका दोरशा खिं लेश्‍शा, आ ममा आ खिं ङा मुर आन कली मार मार दुम्‍मे, मेको नेल्‍ल देंमाक्‍त। 29 मिनु लाबान माइश्‍शो, रेबेका आ लोक्‍ब का बाक्‍माक्‍त। मेको दोरशा, इनारम मेको मुर कली ग्रुम्‍थ लमाक्‍त। 30 मारदे हना मेकोमी आ समी आ मुन्‍द्री नु चुरा तशा “मेको मुरुम आं कली मोदेंशो लोव़ पाप्‍तु” देंशो नेंशा, लाबान मेको मुर कली ग्रुम्‍थ लमाक्‍त। मेको मुर आ दलओंठ नु इनारम बाक्‍शो बाक्‍माक्‍त। 31 मिनु लाबानम मेको कली “परमप्रभु यावे आ आसीक राइब, गे मारदे मेकेर बाक्‍नीनी? आंइ खिं पिने। गे नु इन दलओंठ आन कली मारेइ मारेइ ठीक पाता” देंमाक्‍त। 32 मिनु वाइल खिं ओव़माक्‍त। लाबानमी दलओंठ तार वोइश्‍शो नेल्‍ल शोल्‍शा, थुल्‍चा कली नल लाप्‍ता बाक्‍त। मिनु मेको मुर नु आ गेय पाइब आन कली खोइल चिक्‍चा कली ब्‍वाक्‍कु यो गेवा बाक्‍त। 33 नोले मेको आ ङोंइती जचा थोव़क ख्रेत्‍मे बाक्‍त। मेकोमी चहिं “गो मारदे पिङा, इन कली मदेंङा सम्‍म मजाइनुङ, मब्‍वाइनुङ” देंमाक्‍त। मिनु लाबानमी “इन के मार लोव़ बाक्‍मे? लो देनीन” देंमाक्‍त।

34 मिनु वाइलमी “गो अब्राहाम आ वाइल नङ। 35 मिनु परमप्रभु यावेमी आं होव़प कली शुश आसीक गेप्‍तु। मिनु शुश शोंप पाइश्‍शो दुम्‍त। मेकोमी मेको कली क्‍यारश भेडा, सुन चांदी, वाइलीम वाइल, दलओंठ नु गधा शुश गेप्‍तु। 36 मिनु आं होव़प आ मीश सारामी खाल्‍पी दुम्‍शा, अब्राहाम के तौ का थिप्‍तु। मिनु अब्राहामम आ तौ कली आ मारेइ मारेइ नेल्‍ल गेप्‍तु। 37 मिनु आं होव़पमी आं कली ‘आं तौ कली आं बाक्‍शो कनान रागी ङा मुर आन तमी मचाक्‍को। 38 गे आं आफ आं खिं नु आं मुर आन खिं रे मीश आल का चाक्‍को’ दे कसम जपाइक्‍ती। 39 मिनु गो आं होव़प कली ‘मीश आल एको रागी जाक्‍ने मबिप्‍बा, कोर में’ देंती। 40 मेकोमी चहिं ‘गो परमप्रभु यावे आ ङोंइती गाक्‍‍नुङ। मेकोमी आ स्‍वर्ग ङा गेय पाइब गे नु सोइक्‍ब। मेकोमी इ कली वारच पाइब। मिनु आं तौ कली आं मुर आन खिं नु आं आफ आं खिं रे मीश आल का चाक्‍को। 41 आं खिं ङा मुर आन बाक्‍तीके जाक्‍दीश्‍शा, मीश आल का मगेतेमी हना, गे कसम मजशो खोदेंशो दुम्‍नेवे’ दे आं होव़पमी आं कली माइक्‍ती।

42 मिनु मुलाक्‍ती इनारम जाक्‍शा, गो ‘परमप्रभु यावे, आं होव़प, अब्राहाम आ परमप्रभु, गे आं कली वारच पने। 43 गो इनार आ नेक्‍था बाक्‍नुङ। मिनु मीश आल ब्‍वाक्‍कु दिथ जाक्‍मानु, मीश आल कली इ गाग्री ङा ब्‍वाक्‍कु इच्‍का तूचा गेयी, देंनुङ। 44 मिनु मेको मीश आलमी तूङीन, गो इन दलओंठ आन कली यो ब्‍वाक्‍कु तुंइनुङ, देंत हना, मेको मीश आल आं होव़प आ तौ कली परमप्रभु यावेमी योव़शो बाक्‍ल’ देंती।

45 मिनु गो आं थुंमी लोव़ पने मथुम्‍थु, रेबेका आ गाग्री मुप्‍शा पित। मिनु इनारम ब्‍वाक्‍कु कीथ तोंइसाक्‍व। मिनु गो ‘आं कली इच्‍का तूचा गेयी’ दे माइक्‍ता। 46 मिनु मेकोमी आ गाग्री रीब पा नाइश्‍शा ‘तूङो। गो इन दलओंठ आन कली यो तुंइनुङ’ देंत। मिनु गो तूता। मेकोमी आं दलओंठ आन कली ब्‍वाक्‍कु तुंइताक्‍व। 47 मिनु गो ‘गे सु का आ तमी नवे?’ दे हिल्‍लो पङानु ‘गो बेथुएल आ तमी नङ। बेथुएल नाहोर नु मिल्‍का आस तौ बाक्‍ब’ दे माइक्‍ती। मिनु गो आ नेंमी मुन्‍द्री पाइक्‍ताक्‍ङ, आ गुइमी चुरा लिक्‍ताक्‍ङ। 48 मिनु गो परमप्रभु यावे आ ङोंइती गु बाप्‍शा ‘परमप्रभु यावे, आं होव़प अब्राहाम आ परमप्रभु, गे रिम्‍शो पाइब बाक्‍नीनी’ दे ठेयब सेल्‍ता। मारदे हना आं होव़प आ लोक्‍ब आ खिं ङा मुर रे आ तौ कली तमी चाक्‍चा कली रिम्‍शो लां कोंइताक्‍यी। 49 मिनु ‘गे आं होव़प कली शिशी नु रिम्‍शो पचा मप्रोंइतीनी हना, आं कली देनीन। मेको पचा मदाक्‍नीनी हना यो देनीन। मारदे हना गो ग्‍युरा पेरा गे लचा माल्‍नुङ’ ” दे लोव़ पवा बाक्‍त।

50 मिनु लाबान नु बेथुएलमी “मेको नेल्‍ल परमप्रभु यावे आ पशो बाक्‍ब। मार पाइनस्‍कु मार देंनस्‍कु ङा। 51 लो, रेबेका कली लतो। मिनु लावो। इन होव़प आ तौ आ मीश दुम्‍ल। दोपा परमप्रभु यावेमी लोव़ पवा, मोपा दुम्‍ल” देंसा बाक्‍त।

52 मिनु अब्राहाम आ वाइलम मेको लोव़ नेंशा, परमप्रभु यावे आ ङोंइती खुम्‍की पा बाप्‍शा, मेको कली ठेयब सेला बाक्‍त। 53 मिनु आ गेय पाइबमी सुन नु चांदी के गहना नु दारशो वासी रेबेका कली गेमे बाक्‍त। आ लोक्‍ब नु आ ममा आस कली यो मार मार गेमे बाक्‍त। 54 मिनु जशा तूशा, आ गेय पाइबपुकी नु नाक्‍दो बाक्‍मा बाक्‍त। मिनु सुनी कना बोक्‍मानु, वाइलमी “आं होव़प आ बाक्‍तीक लेत्‍चा गेयीनी” देंमाक्‍त। 55 मिनु रेबेका आ लोक्‍ब नु आ ममामी “रेबेका १० नाक्‍त सम्‍म बाक्‍ल, कोर में। मिनु नोले लन” देंसा बाक्‍त। 56 मिनु वाइलमी “परमप्रभु यावेमी आं कली आसीक गेशा, रिम्‍शो पा वारच पाइक्‍ती। मोपतीके आं कली मक्‍योल्‍यीनी। आं होव़प आ बाक्‍तीक लेत्‍चा गेयीनी” देंमाक्‍त। 57 मिनु मेको निक्‍शीम “रेबेकामी मार देंबा, मेको नेंय” देंसा बाक्‍त। 58 मिनु रेबेका कली ब्रेश्‍शा “एको मुर नु लाइनेवे?” दे हिल्‍लो पाम्‍सेनु “गो लाइनुङ” देंमाक्‍त। 59 मिनु नोले आ समी रेबेका नु आ कली वारच पाइब, अब्राहाम आ वाइल नु आ गेय पाइब आन कली सोइक्‍तमे बाक्‍त। 60 लचा ङोंइती रेबेका कली आसीक गेशा “गे आं समी बाक्‍नेवे। सोशा बोशा, शुश दुमीने। इ चच युइ आन कली आन जोरी सत्रु आन कली ग्राङीन” दे आसीक गेमे बाक्‍त। उत्‍पत्ती २२:१७ 61 मिनु नोले रेबेका नु आ वारच पाइब बोक्‍शा, दलओंठ ङोइश्‍शा, मेको मुर नु ल‍सा बाक्‍त। मोपा वाइलमी रेबेका कली लाइश्‍शा, आ होव़प आ खिं लेम्‍माक्‍त।

62 मिनु इसहाक बेयर-लहाइ-रोइ माइश्‍शो ब्‍वाक्‍कु बुक्‍तीके रे पिमाक्‍त। मारदे हना दक्‍खिन रागी नेगेबम बाक्‍शो बाक्‍माक्‍त। उत्‍पत्ती १६:१४; उत्‍पत्ती २५:११ 63 मिनु नाक्‍नाक्‍दो रूमी हिरथ लमाक्‍त। मिनु कोव़ङानु, ङोन रे दलओंठपुकी पिशो तवा बाक्‍त। 64 मिनु रेबेकामी इसहाक कली तशा, दलओंठ रे फ्रु तोंइसे बाक्‍त। 65 मिनु अब्राहाम आ वाइल कली “मेरे इं कली ग्रुम्‍थ पीब मुर सु में?” दे हिल्‍लो पवा बाक्‍त। मिनु वाइलमी “आं होव़प बाक्‍ब” देंमाक्‍त। मेको नेंशा, रेबेकामी आ कुप्‍नीम कुल सुम्‍से बाक्‍त।

66 मिनु वाइलमी इसहाक कली मार मार दुम्‍मे, मार मार पवा, नेल्‍ल शेंदा बाक्‍त। 67 मिनु इसहाकम रेबेका कली आ ममा सारा आ ताम्‍बुम ओंइदा बाक्‍त। मिनु नोले ग्‍युंबे पाम्‍से बाक्‍त। मिनु इसहाकम आ मीश कली दाक्‍ता बाक्‍त। मोपा इसहाक आ ममा बेक्‍शो प्रेंदा बाक्‍त। उत्‍पत्ती २३:१-२