1 मिनु परमप्रभु यावेमी अय्‍युब कली फश गिवार रे पा लोव़ लेश्‍शा, अय्‍युब ३१:३५ 2 “दूली लोव़ पा अर्ती गेब सु बाक्‍म? मारेइ मजोक्‍थु मार लोव़ पवा? अय्‍युब ३४:३५ 3 गे बोल्‍यो मुर खोदेंशो दुम्‍शा रपो। मिनु गो इ कली लोव़ हिल्‍लो पाइनुङ। मिनु गे लोव़ लेत्‍ती।

4 गो रागी आ जग वोदुनु, गे ते बाक्‍ङे? गे रुप्‍‍नेवे हना आं कली देनो। 5 मेको कली दोमो सेल्‍चा, दे सुम देंमे? गे तुइक्‍नेवे? मेको पुक्‍चा कली सुम डोरी कीङा। मेको गे तुइक्‍नेवे? हितोपदेस ३०:४ 6 मेको आ जग मार तार वोदा? मेको आ सुर ङा फुल्‍लु सुम वोदा? 7 मेना सुनी ङा सोरुलपुकीमी कालेम कुम्‍सो पाम्‍तेक्‍म। मिनु स्‍वर्गम बाक्‍ब नेल्‍ल ग्‍येरसीशा ग्रीतेक्‍म। भजन संग्रह १९:२; अय्‍युब १:६

8 समुन्‍द्र रागी आ कोव़ज रे बुक्‍शा ग्रूमानु, मेको ब्‍वाक्‍कु तेक्‍चा कली सुम लाप्‍चो चोक्‍गा? भजन संग्रह १०४:८-९; हितोपदेस ८:२९ 9 गो मेको कली गोस्‍स के फेक्‍तीक सेल्‍शा, क्‍येर नाक्‍दोम मेको कली गिल्‍शा वोइक्‍ता। 10 मेको आ सांद वोइश्‍शा, थरपु हिरशा, लाप्‍चोपुकी वोइक्‍ता। 11 मिनु गो मेको कली ‘गे ओशो सम्‍म ला जाक्‍ने चाप्‍नेवे। एकेर सम्‍म ला जाक्‍नेवे। इन ठेयब छालपुकी मेक उइ देक्‍चा माल्‍नीम’ दे माइक्‍तामी।

12 गे मुल सम्‍म ‘सुनी दुमो’ दे अरेवी? सुनी कली मेको आ बाक्‍‍तीके तुइक्‍पदी? 13 मेकोमी रागी आ सुर सम्‍म हाम्‍सो सेल्‍ब। आं अरेशो मटीब आन कली खेरचा कली हिम्‍ब। 14 दोपा खप रे मार मार सेल्‍सीबा, मोपा रागी फांइसीब। मेको वा कली रङम नुप्‍शो खोदेंशो बाक्‍ब। 15 आं अरेशो मटीबपुकीम छेङछेङ मताइनीम। मिनु मेको आन पोक्‍शो गुइ जिक्‍चा पुंइसीनीम।

16 गे समुन्‍द्र आ बुक्‍तीक सम्‍म जाक्‍दीने? आ नेल्‍ल क्‍येङा लुक्‍च ङा बाक्‍तीकेम हिरशा गाक्‍ङे? 17 बेक्‍पाइक्‍ब आ ठेयब लाप्‍चो इ कली कोंइदमे? गे क्‍येर नाक्‍दो ङा लाप्‍चोपुकी तवी? 18 गे रागी गिश ठेयब बाक्‍बा, दे तुइक्‍‍नेवे? गे मेको नेल्‍ल तुइक्‍नेवे हना, आं कली देनो।

19 छेङछेङ आ लतीक लां ते बाक्‍बा? मिनु छिङछिङ आ बाक्‍‍तीक ते बाक्‍बा? 20 गे मेको नेल्‍ल आन बाक्‍तीकेम ल‍ने चाप्‍नेवे? मिनु गे मेको आन बाक्‍‍तीक लतीक लां तुइक्‍नेवे? 21 थमा पा, गे मेको नेल्‍ल तुइक्‍नेवे। मारदे हना मेना गे जरमेने थुम्‍शो बाक्‍‍ते। मिनु गे शुश बर्स ब्रोंइने थुम्‍तीवी।

22 गे शुश फुं बाक्‍तीकेम ओव़ङे? गे शुश मुप्‍स बाक्‍तीक तवी? यहोसु १०:११; यसैया ३०:३० 23 गो मेको श्‍येत ङा नाक्‍ती नु लडाइ ङा नाक्‍त कली खेक्‍शा वोइक्‍ता। 24 तेको लां रे छेङछेङ ब्राइबा? मिनु पूर्ब ङा फश ते रे ग्रूबा?

25 सुम ठेयब रेउ लतीक लां सेला? बुंबु पतीक आ लां सुम सेला? अय्‍युब २८:२६ 26 मेको मुर मबाक्‍शो रागी नु गोरशो रागी जिप्‍पाइक्‍चा कली बाक्‍ब। 27 मुर मबाक्‍शो रागी नु सोव़शो रागी गिगी सेल्‍चा कली सुम लां सेला?

28 मार रेउ आ आफ बाक्‍बा? सीत कली जरमेब सु बाक्‍बा? 29 सुका आ कोव़ज रे फुं जरमेसे? सरीङ रे दोक्‍ब फुरश आ ममा सु बाक्‍बा? 30 ब्‍वाक्‍कु फुल्‍लु खोदेंशो सारो दुम्‍ब। फुरश समुन्‍द्र आ तार सारो दुम्‍ब।

31 गे किरकिटी सोरुल आन कली पाइक्‍ने चाप्‍नेवे? गे मिर्गसीरा सोरुल कली खिक्‍‍शो डोरी आ गाठो प्राक्‍ने चाप्‍नेवे? अय्‍युब ९:९ 32 मार गे सोरुल आ हुल आन कली आन गाक्‍शो लां रे ग्रुंइने चाप्‍नेवे? सप्‍तबर्सी सोरुल आन हुल कली लां कोंइने चाप्‍नेवे? 33 मार गे स्‍वर्ग ङा फुल्‍लुम मुशा ब्रेक्‍शो तुइक्‍‍नेवे? गे रागीम मेको मोदेंशो सेल्‍ने चाप्‍नेवे? येरमीया ३३:२५ 34 गे गोस्‍स कली ‘रेउ यीवो’ दे अरेने चाप्‍नेवे? मिनु मोपा आंम कली जिप्‍पाइक्‍ने चाप्‍नेवे? 35 मार गे चिला कली आ लांम सोइक्‍ने चाप्‍नेवे? मार मेकोपुकीम ‘गो एक बाक्‍‍तक’ दे इ कली देंनीमी। 36 सुम थुं कली तुइक्‍तीक गेवा? सुम थुं कली रुप्‍तीक गेवा? 37 सरीङ ङा मारेइ मारेइ हिक्‍ने चाप्‍तीक तुइक्‍तीक थुं पाइश्‍शो सु बाक्‍बा? मिनु सरीङ ङा ब्‍वाक्‍कु वोइक्‍तीके रे सुम ब्‍वाक्‍कु थोक्‍ने चाप्‍बा? 38 मोदेंशो दुम्‍त हना, फुरक हिलो दुम्‍शा, खप डल्‍ला दुम्‍शा ग्‍याइक्मुशा बाक्‍नीमी।

39 गे गुप्‍स कली आ सिखार माल्‍शा गेने चाप्‍नेवे? मेको आ शोव़लु बेक्‍शो रूपाइक्‍ने चाप्‍नेवे? 40 मेको आन पुक्‍खीम बाक्‍नीम। ख्रुइश्‍शा सिखार बाप्‍शो बाक्‍नीम। गे मेको कली रूपाइक्‍ने चाप्‍नेवे? 41 एर ओंथ हिरशो खद आन चाइक्‍बमी जचा मतथु परमप्रभु कली पुन्‍मे नोले सुम मेको आन कली थुल्‍बा?” दे परमप्रभुमी अय्‍युब कली देंमाक्‍त। भजन संग्रह १४७:९