22
खुइ आ पर्बम अरेशो
1 सुइमी ब्यफ, भेडा खुइ पशा, क्योरशा ब्वाप्तु हना यो, लेयतु हना यो, मेको मुरुमी ब्यफ का के ५ ओटा ब्यफ थाप्चा माल्ब। भेडा का के ४ ओटा भेडा थाप्चा माल्ब। २सामुएल १२:६; हितोपदेस ६:३१; लूका १९:८ 2 मिनु खुइ कली खुइ पना पन थित्तेक्म हना, मेको कली तुप्शा साइक्तेक्म हना, साइक्ब साइक्चा ङा सजाइ गेचा मपुंइसीनीम। 3 तन्न नां दाप्शा नोले सम्म तुप्शा साइक्तु हना, मेको साइक्ब साइक्चा ङा सजाइ ताइब। खुइ पाइब आ खुइ पशो नेल्ल लेत्चा माल्ब। थाप्ने मचाप्तु हना, वाइल सेल्चा पुंइसीब। 4 मेको खुइ आ खुइ पशो ब्यफ, गधा, भेडा आ बाक्तीकेम सेल थित्तेक्म हना, मार बाक्त हना यो का के निक्शी थाप्पाइक्चा माल्ब।
रू आ पर्बम अरेशो
5 मिनु “सुइमी आ बी ब्यफ, क्यारश भेडामी अरु मुर आन शोक्शो रू नेक्पाइक्तु हना, अङगुर रू ङा अङगुर नेक्पाइक्तु हना, मेकोमी आ आंम रू ङा नेल्ल क्येङा रिम्शो फल थाप्चा माल्ब। 6 सुइमी मी मुइक्तानु, मेको मीम चू नु रूमी बाक्शो मारेइ नेक्तु हना, मेको मी मुइक्बमी मीम नेक्शो नेल्ल थाप्चा माल्ब” देनो।
वोइक्चा गेशो आ पर्बम अरेशो
7 मिनु “सुइमी आ नेक्था ङा मुर कली आ क्येट, अरु मारेइ वोइक्चा कली गेप्तु हना, वोइक्ब मुर आ खिं रे खुइ दुम्त हना, नु खुइ कली थित्तेक्म हना, मेको खुइमी का के निक्शी थाप्चा माल्ब। 8 खुइ मथित्तेक्म हना, मेको खिं ङा ठेयब मुरुमी आंम नेक्था ङा मुर आ मार मार खुइ पवा कों, दे परमप्रभु आ ङोंइती राप्पाइक्चा माल्ब। 9 मिनु बी ब्यफ, गधा, भेडा नु वासी मार मार वोइक्बमी नु वोइक्चा गेब, निम्फामी ‘आं के बाक्ब’ देंताक्स हना, मेको निक्शी परमप्रभु आ ङोंइती जाक्चा माल्नीस। परमप्रभुमी सुम खुइ सुइक्बा, मेकोमी का ङा निक्शी थाप्चा माल्ब। 10 मिनु सुइमी आ नेक्था ङा मुर कली गधा, ब्यफ, भेडा नु अरु बस्तु भाव वोइक्चा कली गेप्तु हना, मेको बस्तु भाव बेक्तेक्म हना, तुप्शा बिग्रेम्तेक्म हना, सुइम मतचा ङा पा मुरुम खुइ पा लाइश्शो बाक्तेक्म हना, १राजा ८:३१-३२ 11 मेको वोइक्बम आ नेक्था ङा मुर आ बस्तु भाव ‘खुइ मपङ’ दे परमप्रभु यावे आ ङोंइती कसम जचा माल्ब। मिनु बस्तु भाव आ होव़पम मेको थमा सुदानु, वोइक्ब मुरुमी मारेइ थाप्चा ममाल्ब। 12 तन्न आ खिं रे खुइ पशो बाक्त हना, मेको वोइक्बमी मेको थाप्चा माल्ब। 13 ब्वाकी ङा जन्तुम मेको बस्तु कली ग्याइश्शा साइश्शो बाक्त हना, मेको वोइक्बम मेको साइश्शो बस्तु दसी चाक्चा माल्ब। मेको ब्वाकी ङा जन्तुमी साइश्शो कली थाप्चा ममाल्ब। उत्पत्ती ३१:३९ 14 मिनु सुइमी आ नेक्था ङा मुर रे ब्यफ का परमा पचा कली पुंइतु हना, बस्तु आ होव़प मबाक्थु, मेको ब्यफ खजा दुम्त हना, बेक्त हना, मेको थमा पा थाप्चा माल्ब। 15 तन्न आ होव़प यो बाक्त हना, मेको मारेइ थाप्चा ममाल्ब। मारदे हना गेय पचा कली क्येट गेशो बाक्ब” देनो।
मीश आल आ पर्बम अरेशो
16 मिनु “वोंइश मुर कामी कन्ने मीश आल नु मिलो शिलो पा, मेको नु इप्त हना, मेको कली थमा पा ग्युंबे पा आ आफ कली मार मार थाप्चा माल्ब। ब्यवस्था २२:२८-२९ 17 तन्न मीश आल आ आफोमी आ तमी मगेप्तु हना, मेको वोंइश मुरुम कन्ने ग्युंबे पशो खोदेंशो पा, क्येट थाप्चा माल्ब।
थमा पा साइक्चा पुंइसीब मुर
18 टुना मुना पाइब कली ब्रोंइचा मगेचा। लेवी २०:६,२७; लेवी १९:३१; ब्यवस्था १८:१०; १सामुएल २९:९; मलाकी ३:५
19 सु बस्तु नु इप्बा, मेको कली थमा पा साइक्चा माल्नीनी। लेवी १८:२३; ब्यवस्था २७:२१
20 सुमी देवी देवता कली पूजा पाइबा, मेको मुर थमा पा साइक्चा पुंइसीब। परमप्रभु यावे कली ला चढ़ेचा माल्ब। प्रस्थान २०:३-५; ब्यवस्था १३:७-१९; ब्यवस्था १७:२-७
महिक्सीशो मुर आन पर्बम अरेशो
21 अर्को रागी ङा मुर आन कली श्येत मगेचा, मदिप्चा। मारदे हना गे यो इजीप्त रागीमी अर्को रागी ङा मुर दुम्शा बाक्तीनी। लेवी १९:३३-३४; ब्यवस्था १०:१८,१९ 22 आ वोंइश बेक्शो मीश मुर नु रोम रोइक्च आन कली श्येत मगेचा। ब्यवस्था २७:१९; यसैया १:१७; जकरिया ७:१० 23 गेपुकीमी श्येत गेतीनी हना, मेकोपुकीमी आं कली लोव़ पाम्तेक्म हना, गो थमा पा आन पुंइशो गेनुङ। 24 मिनु गो गाइश्शा, इन कली तरवारमी साइक्नन्नी। मिनु इन मीश वोंइश बेक्शो मीश दुम्ब। इन आलपुकी आफ बेक्शो आल दुम्नीम।
25 गेपुकीमी आं मुर आन दाते ङा प्रुङग आन कली क्येट जेर गेतीनी हना, गे क्येट चेम्चा कली चाइक्ब ताक्ब मुर खोदेंशो मदुमीन। लेवी २५:३६; ब्यवस्था २३:२०; हितोपदेस २८:८ 26 मिनु गेपुकीमी मेको आन सुम्तीक वासी क्येट आ पा ङा लाइक्तीनी हना, नां पेरची ना मेको लेत्चा माल्नीनी। ब्यवस्था २४:१०-१३ 27 मारदे हना मेको आन रां ङा सुम्तीक का ला बाक्ब। इप्ची ना दोपा सुम्सीनीमी? आं कली ब्रेत्तेक्म हना, गो आन पुंइशो गेनुङ। मारदे हना गो शिशी पाइब नङ।
परमप्रभु कली मान पा हिंचा
28 परमप्रभु आ पर्बम मरिम्शो लोव़ मपचा। इन कली सासन पाइब कली सराप मपचा। लेवी २४:१४-१६; प्रेरित २३:५ 29 गे इन रू ङा ङोंइती मीशो मारेइ मारेइ नु अङगुर रस चढ़ेचा मरिम्दीन। मिनु इन ङोंइती जरमेशो तौपुकी आं कली गेचा माल्नीनी। प्रस्थान २३:१९; ब्यवस्था १८:४; हितोपदेस ३:९-१०; प्रेरित १३:२,१३ 30 इन बी ब्यफ नु इन भेडा रे यो मोदेंशो पचा माल्नीनी। ७ नाक्त आन ममा नु बाक्चा माल्नीमी। मेको नोले ङा नाक्ती आं कली गेचा माल्नीनी। 31 गेपुकी आं मुर ला दुम्चा माल्नीनी। गे ब्वाकी ङा जन्तुपुकीम साइश्शो मब्वने। मेको कुचुम कली ब्वचा गेन” देनो। लेवी १९:२; १पत्रुस १:१५; लेवी ७:२४; ब्यवस्था १४:२१; इजीकीएल ४:१४; इजीकीएल ४४:३१