1 दाऊद डांडा तार रे इच्‍का आइक्‍ची जाक्‍दीम्‍मेनु, मेफी-बोशेथ आ गेय पाइ‍ब सीबामी दाऊद कली ग्रुमा बाक्‍त। मेकोम लगम पाइश्‍शो गधा निक्‍शीम सहे निक्‍शी शोब्‍ले, सहे का मुठा सोव़शो अङगुर, सहे का फल फुल नु मसक का अङगुर शांबु कुरपाइश्‍शा, चाक्‍गा बाक्‍त। २सामुएल ७:२ 2 पिपमी सीबा कली “गे एको नेल्‍ल मारदे चाक्‍गी?” दे हिल्‍लो पवा बाक्‍त। मिनु सीबाम “एको गधा पिप आ खिं ङा मुर ङोइक्‍चा कली बाक्‍नीस। शोब्‍ले नु फल फुल चहिं ठिटा आन कली जचा कली बाक्‍ब। अङगुर शांबु गोरशो रागीम दशा थशो आन कली तूचा कली बाक्‍ब” देंमाक्‍त। 3 मिनु पिपमी “इ होव़प आ तौ ते बाक्‍म” दे हिल्‍लो पवा बाक्‍त। मिनु सीबाम “मेको यरूसलेममीन बाक्‍शो बाक्‍ब। मेकोमी ‘मुलाक्‍ती इस्राएलीपुकीम आ बाजे आ राज्‍य लेश्‍शा गेनीम’ दे रिम्‍शा बाक्‍शो बाक्‍ब” देंमाक्‍त। २सामुएल १९:२५-३१ 4 मिनु पिपमी सीबा कली “मुल मेफी-बोशेथ आ मारेइ मारेइ इ के दुम्‍‍ब” दे मदा बाक्‍त। मिनु सीबामी “आं प्रभु पिप, गो इन वाइल का नङ। इन ङोंइती शिशी तङल” देंमाक्‍त। १राजा २:८-९; प्रस्‍थान २२:२७

5 मिनु पिप दाऊद बाहुरीम सहरम जाक्‍माक्‍त। मिनु मेकेर सावल आ खिं ङा मुर का, गेरा आ तौ शिमेइ ग्रूशा दाऊद कली सराप चीले पना पन पिमाक्‍त। 6 मेकोम पिप दाऊद नु आ गेय पाइ‍ब नेल्‍ल, लडाइ पाइब नेल्‍ल नु अरु मुर नेल्‍ल आन कली एर ओंथ नेल्‍ल फुल्‍लु क्रोम्‍दीमी बाक्‍त। दाऊद आ ग्‍युरा नु पेरा आ लडाइ पाइब नु आ मुर बाक्‍मा बाक्‍त। 7 शिमेइमी “लावो, लावो, ए मुर साइक्‍ब नु मरिम्‍शो पाइब” दे ग्रीशा, सराप पवा बाक्‍त। 8 मिनु “परमप्रभु यावेम सावल आ खिं ङा मुर आन हुश आ क्‍येक्‍क लेत्‍ताक्‍वे। गे मेको आ पा ङा सासन पाप्‍तीवी। मिनु परमप्रभु यावेमी एको राज्‍य इ तौ अब्‍सालोम कली गेप्‍तु। मुल गे खतम दुम्‍ते श्‍येत जाइनेवे। मारदे हना गे हुश ख्राक्‍श पोक्‍ब बाक्‍नेवे” देंमाक्‍त।

9 मिनु सेरूयाह आ तौ अबीशैमी पिप कली “मारदे मेरे बेक्‍शो कुचुममी आं प्रभु, पिप इन कली सराप पवा? गो आइक्‍ची हांबु लशा मेरे आ पिया ख्रोइक्‍नुङ” देंमाक्‍त। १सामुएल २६:८ 10 तन्‍न पिपमी “ए सेरूयाह आ तौ, गे गो नु मगारचा ङा बाक्‍नीसी। परमप्रभु यावेमी मेको कली ‘दाऊद कली सराप पावो’ दे सोइश्‍शो बाक्‍त हना, सुम तेक्‍ने चाप्‍बा ङा?” देंमाक्‍त। २सामुएल १९:१७-२४ 11 मिनु दाऊदम अबीशै नु आ गेय पाइब नेल्‍ल आन कली “आं तौमी आं कली साइक्‍चा माल्‍ब हना, मेरे बेन्‍‍यामीन आ थर ङा मुर के मार लोव़ पचा ङा? मेरे कली प्रोनीन। मेरेमी सराप पवल। मारदे हना परमप्रभु यावेमीन मेरे कली सराप पचा गेशो बाक्‍म माइ। 12 परमप्रभु यावेम मेरे मुलाक्‍त ङा सराप आ पा ङा आं श्‍येत तशा आं कली रिम्‍शो पाइबा कों” देंमाक्‍त। 13 मिनु दाऊद नु आ मुर आन लां खोदमे बाक्‍त। शिमेइ चहिं दाऊद आ लां गे आइक्‍ची हांबुइ आइक्‍ची हांबु लमाक्‍त। लमेनु दाऊद कली सराप पना पन फुल्‍लु आप्‍ना आप्‍न, खप ब्‍वारना ब्‍वारन लमाक्‍त। 14 मिनु पिप नु मेको नु गाक्‍ब मुर नेल्‍ल यर्दन खोला आ नेक्‍था जाक्‍दीम्‍मा बाक्‍त। मिनु मेको थाम्‍पा दशा नांइ‍समा बाक्‍त।

15 अब्‍सालोम नु मेको नु बाक्‍ब इस्राएली नेल्‍ल यरूसलेम जाक्‍‍मा बाक्‍त। अहीथोफेल यो मेको नु बाक्‍माक्‍त। 16 मिनु अरकी आ खिं ङा हुशाइ दाऊद आ वारचमी अब्‍सालोम कली ग्रुमा बाक्‍त। मिनु मेकोमी अब्‍सालोम कली “पिप गेना हना यो ब्रोंइशा बाक्‍ल। पिप गेना हना यो ब्रोंइशा बाक्‍ल” देंमाक्‍त। २सामुएल १५:३७ 17 तन्‍न अब्‍सालोममी हुशाइ कली “इ वारच कली मप्रोंइतीके, मोदेंशो बाक्‍बा ङा? मारदे गे इ वारच नु मलवे” दे मदा बाक्‍त। 18 मिनु हुशाइमी अब्‍सालोम कली “ममाइ, परमप्रभु यावे मेकेर बाक्‍ब मुर नु इस्राएली नेल्‍लेमी योव़शो मुर आ गेय पचा मिम्‍ताक्‍ङ। गो एक बाक्‍नुङ। 19 मुल गो सुका आ गेय पाइ‍नुङ ङा? पिप आ तौ कली गेय पचा मदुम्‍बा ङा? गो दोपा इन आफ आ गेय पङा, मोपा इन गेय यो पाइ‍नुङ” देंमाक्‍त।

20 मिनु अब्‍सालोममी अहीथोफेल कली “आंइ कली इन अर्ती गेने। गो दोपा गेय पचा माल्‍नीकी?” दे हिल्‍लो पवा बाक्‍त। 21 मिनु अहीथोफेलमी अब्‍सालोम कली “इन आफोमी आ खिं कोव़चा कली प्रोंइशा वोइश्‍शो आ नोले चाक्‍शो मीशपुकी नु इ‍पो। मोपा इन आफ कली मरिम्‍शो पशो इस्राएल नेल्‍लेम नेंनीम। मिनु इन नोले खोइक्‍ब आन थुं बारब” देंमाक्‍त। २सामुएल १५:१६ 22 मोपतीके मेकोपुकीम अब्‍सालोम कली खिं तार ताम्‍बु का कीङमे बाक्‍त। मिनु अब्‍सालोममी इस्राएली नेल्‍लेम तचा ङा पा, आ आफ आ नोले चाक्‍शो मीशपुकी नु इम्‍माक्‍त। 23 मेना मुरपुकीम अहीथोफेल आ अर्ती परमप्रभु आ लोव़ खोदेंशो मिम्‍बाक्‍मा बाक्‍त। मोपतीके दाऊद नु अब्‍सालोमम अहीथोफेल आ अर्ती ठेयब मिम्‍बाक्‍‍सा बाक्‍त।