3
Yónimo simátímakain-aai.
Mátíyu 3:1-12, Mááka 1:2-8, Yóni 1:19-28
1 Rómu-waasiti óraakon-awiꞌa Táípíríyasi ména kawáá-kísáú maiyéna sísamaifakemba séfataase-aatai maisuwónkaꞌa Yúndiyaa-marafaken-kawaagon-awiꞌa Póntiyasi-Páírati maúwana Káríri-marafaken-kawaagon-awiꞌa Éroti maúwana áfákon-awiꞌa Fírípi wemá Ítúríya-marafaꞌe Térékónaitisi-marafaꞌe káráwiyuwana Ráíseniyaasi Ápíríni-marafaꞌa káráwiyuwasa 2 miyáumai-waasi káráwiyonkaꞌa Ánásiye Káyafaasiye aifaꞌ-ámáán-káwáágóráí méroyankaꞌa Sékáráíyaan-ááninkon-awiꞌa Yóni máásai-marafaꞌa mérowana Maníkó aaí simámuwana 3 Yóni Yóndani-nonkoni arúfáꞌá wénena simátimena séna sáwí-imayaa tuwéꞌa Maníkómpáꞌá tíyaꞌa nombá maitínkáanana Maníkó kentí sáwí-imayaa maitiyuwáíníye Yóni siyáiye. 4 Miyá súntafena naaófáꞌá Maníkón-aaimo simátímakowin-awiꞌa Áísáya agaimaréna séna
moóráwigo máásai-marafaꞌa ména aaemáíyakemba séna Fasiꞌaénkóní aambó wiꞌankáíyamba wení aambá arupíse íyana minámpáꞌá wíno. 5 Omáꞌa kárámai ukwítuꞌmae koró. Kaentaén-ámbá arupíse oro. Kumpékaapeꞌo uráin-amba maimái kaweꞌán-oro. 6 Maníkó sáwíꞌo úmaimo méraampinkemba
kaweꞌ-ámpáꞌó métinkaindawimba aiꞌmaráínana kumínda seyaafáꞌnánká awánánááwe
Áísáya agaimaréna siyónkaꞌa póna Yónintafena minááí siyáiye.
7 Súwasa Yóni nombá maisinkáínkwae sésa sáwífaꞌ-waasi wempáꞌá tóso uwaná Yóni simátimena séna iyánkó póígon-araaꞌan-owe. Maníkó kentí sáwí-meyamba timínífo nááwa sisará iséra inkaisé wéteo. 8 Kentí sáwí-kisau tuwéꞌo Maníkómpáꞌó téꞌo éꞌa kawe-kísáú maíyaꞌa tuwánánaumne. Émbaramu kentáá síwáꞌná imbá póta Maníkóní kaweꞌ-wáásísá úne séꞌa miyán-ímáyáá ímba oro. Maníkó Émbaramun-aísaafitantamba ónááwemo sénaraa maanóntámpínkémbá kanaámpóꞌa waási úráaro sisaꞌá úráawisino. Émbaramun-aísaafitantambo uráundawi póta kaweꞌ-wáásísá úne séꞌa miyán-ímáyáá ímba oro. 9 Ímbo kaweꞌ-árámbó íyáín-taimo áwáufimbo ayáímai iyafímbó agaisúwáántemba Maníkó miyáumai kentí sáwí-meyamba timíníye Yóni siyáiye.
10 Súwasa isésa sésa simásimenda-aaisa nórasaawa ónaumno suwaná 11 Yóni séna kaeꞌ-únánkwátóimo makéwi ímbo makéwi moórá-mora tíméro. Tómbá makéwi ímbo makéwi moórá-mora tíméro Yóni súwasa 12 taakisi-óntámbó máún-umen-kwaasi Yóni nombá maisinkáínkwae sésa wempáꞌá tésa sésa óraako ómpo nórasaawa ónaumno suwaná 13 Yóni séna ímba karoꞌá símai óraaꞌ-ontambo maíyamba taakisi-óntán-aantemba máéro súwasa 14 i-wáásí sésa kesáá nórasaawa ónaumno suwaná Yóni séna tínkantukeꞌa miwítí óntama maénae ímba seró. Karoꞌ-ááí simátimeꞌa miwítí óntama maénae ímba seró. Kentí kísaugoni méyántáféꞌa ímbo kaórémba tirunkó kaweꞌá ínaꞌa méraaro Yóni siyáiye.
15 Yúndaa-waasi Maníkómó íyáfasinankaraiwaimba amuꞌmarésa mésa Yónin-aai isésa óraaꞌ-imayaa ésa sésa Maníkómó íyáfasinankaraiwai wemá Yóniyaꞌi fíꞌowawaꞌiyo suwaná 16 Yóni séna kesínaaembo tíndawi wemá óraako kembá íyáákaraifo wemó aaí síndaraꞌo kemó sendá sáwíꞌan-iye. Kemá nombá maitinkánaumpo wemá Maníkóní Ufaen-ámútánkómbá aiꞌmaráínana kuména kempímbá óraaꞌa uwátinkena iyamó agáéntemba íníye. 17 Aawinkwínaumo sipetifímbó mósá makésamo mentúwááwanamo anómba marapáꞌó kúmísanamo ásimo fiyúndágo aútúwáísasamo kámakamaꞌo in-íyáfímbó wiyúꞌmaimo agaisuwésamo anómbo naaúmpaꞌo mósá máráántemba waási miyáráámbá íníye Yóni séna 18 Maníkóní ásé-aai ísámai kaweꞌá íwae séna miyán-ááí simátímaꞌmaena iyáiye.
Ísumba nombó maiyánkarain-aai.
Mátíyu 3:13-17, Mááka 1:9-11
19-22 Yóni simátímaꞌmae wéiyena sáwífaꞌ-waasi nombá maitinkéna ánaaemba Ísumba maiyankówana inaí súwana kampúaran-tawaai tuwínkaaꞌ-úwana Maníkóní Ufaen-ámútánkó mááufuꞌ-numaraamba úmaena aneꞌá kumbérowana aaigó aantemba wíyómpakemba séna emá kesááninko ónaꞌa en-ímáyáá wéeꞌa áfááraumai aamoí uwánkaumne siyáiye.
Yóni Maníkóní ásé-aai simátimumbanifo Káríri-marafaken-kawaagon-awiꞌa Éroti áfákon-awaainínkón-áwíꞌa Érótíyasimba maiyówana mindásafena fíꞌo-fiꞌon-tantaaꞌo sáwíꞌo úntafena Yóni séna sáwíꞌa óne súwana Éroti Yónimba áíꞌmai ándáfaꞌa ankéna mindásafena sáwí-kisau maimaéna iyáiye.
Ísun-aíwáꞌnáti túwíkon-aai.
Mátíyu 1:1-17
23 Ísu marapáꞌá kumbéna moórá-waai úmai siyáánkai-aatai maisuwéna wénena Maníkón-aaimo simátiminda ómbarena úwasa waási imáyáa ésa sésa Yósepin-ááninkon-iye siyáawe.
Yósepi afowán-áwíꞌa Írai úwana
24 Írai afowán-áwíꞌa Mátáti úwana
Mátáti afowán-áwíꞌa Rífái úwana
Rífái afowán-áwíꞌa Méríkai úwana
Méríkai afowán-áwíꞌa Yánai úwana
Yánai afowán-áwíꞌa Yósepi úwana
25 Yósepi afowán-áwíꞌa Mátátayasi úwana
Mátátayasi afowán-áwíꞌa Émósi úwana
Émósi afowán-áwíꞌa Néamu úwana
Néamu afowán-áwíꞌa Ésírai úwana
Ésírai afowán-áwíꞌa Nágai úwana
26 Nágai afowán-áwíꞌa Méati úwana
Méati afowán-áwíꞌa Mátátayasi úwana
Mátátayasi afowán-áwíꞌa Sémeni úwana
Sémeni afowán-áwíꞌa Yóséki úwana
Yóséki afowán-áwíꞌa Yónda úwana
27 Yónda afowán-áwíꞌa Yóánani úwana
Yóánani afowán-áwíꞌa Résa úwana
Résa afowán-áwíꞌa Sérápáperi úwana
Sérápáperi afowán-áwíꞌa Síáritiyeri úwana
Síáritiyeri afowán-áwíꞌa Nérai úwana
28 Nérai afowán-áwíꞌa Méríkai úwana
Méríkai afowán-áwíꞌa Éndai úwana
Éndai afowán-áwíꞌa Kósamu úwana
Kósamu afowán-áwíꞌa Érímendamu úwana
Érímendamu afowán-áwíꞌa Éya úwana
29 Éya afowán-áwíꞌa Yósúwa úwana
Yósúwa afowán-áwíꞌa Éríyesa úwana
Éríyesa afowán-áwíꞌa Yórimu úwana
Yórimu afowán-áwíꞌa Mátáti úwana
Mátáti afowán-áwíꞌa Rífái úwana
30 Rífái afowán-áwíꞌa Símiyoni úwana
Símiyoni afowán-áwíꞌa Yúndaa úwana
Yúndaa afowán-áwíꞌa Yósepi úwana
Yósepi afowán-áwíꞌa Yónamu úwana
Yónamu afowán-áwíꞌa Éráyakimu úwana
31 Éráyakimu afowán-áwíꞌa Méríya úwana
Méríya afowán-áwíꞌa Ména úwana
Ména afowán-áwíꞌa Mátáta úwana
Mátáta afowán-áwíꞌa Nétáani úwana
Nétáani afowán-áwíꞌa Téfíti úwana
32 Téfíti afowán-áwíꞌa Yési úwana
Yési afowán-áwíꞌa Ópéti úwana
Ópéti afowán-áwíꞌa Póási úwana
Póási afowán-áwíꞌa Sárimoni úwana
Sárimoni afowán-áwíꞌa Násoni úwana
33 Násoni afowán-áwíꞌa Ámínándapu úwana
Ámínándapu afowán-áwíꞌa Ándimini úwana
Ándimini afowán-áwíꞌa Ánái úwana
Ánái afowán-áwíꞌa Ésíroni úwana
Ésíroni afowán-áwíꞌa Pérési úwana
Pérési afowán-áwíꞌa Yúndaa úwana
34 Yúndaa afowán-áwíꞌa Yékopu úwana
Yékopu afowán-áwíꞌa Áísáaki úwana
Áísáaki afowán-áwíꞌa Émbaramu úwana
Émbaramu afowán-áwíꞌa Téra úwana
Téra afowán-áwíꞌa Néꞌo úwana
35 Néꞌo afowán-áwíꞌa Séráki úwana
Séráki afowán-áwíꞌa Ríyu úwana
Ríyu afowán-áwíꞌa Péréki úwana
Péréki afowán-áwíꞌa Ípa úwana
Ípa afowán-áwíꞌa Síra úwana
36 Síra afowán-áwíꞌa Kénaani úwana
Kénaani afowán-áwíꞌa Áfákisati úwana
Áfákisati afowán-áwíꞌa Sému úwana
Sému afowán-áwíꞌa Nówaa úwana
Nówaa afowán-áwíꞌa Rémeki úwana
37 Rémeki afowán-áwíꞌa Métúsara úwana
Métúsara afowán-áwíꞌa Ínóki úwana
Ínóki afowán-áwíꞌa Yéréti úwana
Yéréti afowán-áwíꞌa Máꞌárariri úwana
Máꞌárariri afowán-áwíꞌa Kénaani úwana
38 Kénaani afowán-áwíꞌa Ínosi úwana
Ínosi afowán-áwíꞌa Séti úwana
Séti afowán-áwíꞌa Ándámu wemá
Maníkón-áánimban-iye.
Miwí Ísun-aíwáꞌná owé-ímáyáá uráawe.