1 Rau i ipa yau Yemis. Au kapraingi ke Maro iye Tool Mai Yesu Kirisi. Ngan awodo rau i imala pang yang ang di rara ke Isrel sangaul be balana ru tina yo nookoot nga kamagirigiri a la kayepe kataunu ye di tooltool ke malala kapala nga. Ngan awete lo ponana kiau pang ang le imot.

2 Ang di diek yo katara lomim medana pang Yesu nga, ngan kene yo be touanga matana matana tina ngan sa be pombe pang yang nga, ngan ole kakamata nen, ngan so ke be lomim ponana ye. 3 Awete nen, yesoo ang ngan ole lomim galanga nen, kumata be touanga pombe pang yang nga, ngan be itouo lo medana yo kiang nga, a be nen ngan ipamedang ye dada yo be kakodo le tutube a kasolo urata moonoo ye i. 4 Ngan nen le kakodo le tutube a kasolo urata moonoo yo be pombe pang yang nga le lo imot, a be nen ngan ipamedang le ke be kamaka ye so ke Maro pitiap yege, bong ole kapon dook ye so ki nga le imot. 5 Le kumata ang tina ngan atu be taukan lo galanga ye dada dook mata yo be itoo in nga, ngan ipatarau pang Maro ngan ole ikap panga le mai. Ngan Maro in dawa ben tool yo katene malmal pang di tooltool yo titoru ye so, ngan tiap, bong ya in lon ponana be ikap so yo nen ngan paidi. 6 Bong ye kene yo be ipatarau ye in nga, ngan ke be lon rru tiap, bong itara lono medana moolmool inbe ipatarau. Yesoo, kumata le be lon rru nga, ngan ole iyei dawa ben tiek yo eng ipa ngan ipillongi le kokor ki popobe a ila be iman i. 7 Le tool yo nen i, in kin lon tar be ole ikaua so sa ye Tool Mai, ngan be. 8 Ya in lon rru nen nga le dada ki yo iyei nga, ngan ke be itara lono dook ye inbe itoo, ngan tiap.

9 Ngan sei ede yo itara lono medana pang Yesu i, in be ballingana tiap inbe ene mai tiap nga, ngan ke be lon ponana, yesoo ye Maro matana ngan ya in ben tool ene mai. 10 Inbe ede san yo ballingana i, in ke be lon ponana ye yo Maro irautoo ene le idu lopo ye so ki tina ngan. Yesoo, di tooltool ballingadi yo di tapdi tiyitmak edi ye balingi kidi tina nga, ngan ole tilledi sokorai dawa ben dingding gok bolana. 11 Ngan kumata be ke ise a isini le be yesene mai mata nga, ngan ole iyesnaia dingding bolana tani le imagur, inbe ole igarung bolana yo moro ki dook mata san ngan le dook tiap. Le gaongo leu ye tool yo ballingana i, in ole itu ye urata ki ke kaungu pat le le lo imata sokorai a ila.

12 Ngan tool be ikodo le tutube a isolo urata moonoo ke touanga tina yo be pombe pang ye nga, ngan ole Maro iyei urata dook mata panga. Yesoo, ye kene yo be ikodo le imede inbe irausap touanga tina le imot nga, ngan ole ikaua yepongo dook mata yo taukan motingi i. Ngan yepongo tani in Maro ipamede betanga medana ye be ole ikauu pang di tooltool yo lodi panga mai san nga.

13 Nen le kumata kene yo be touanga atu pombe pang ye tool a be itoua nga, ngan kin iwete be touanga tani in ipa ye Maro be. Yesoo, Maro i ke be itouo tool sa a be iyei dada dook tiap ke noonoo ngan tiap, inbe tool sa ke be itouo Maro nen ngan tiap lapau. 14 Bong idi tina yo atu atu nga, ngan touanga pombe pang yidi, yesoo idi taudu lod kaua urata ye dada dook tiap yo be tayei nga, ngan nen le iyolidi a la tayei. 15 Ngan nanga, kumata le dada dook tiap tina yo iken lodo ngan be ipon mata nga, ngan ole dawa ben garup kapono nga, lo ngan be ipasuiu dada dook tiap ke noonoo tina ngan dawa ben ipasuiu natunu nga. Ngan nen le ye kene yo dada dook tiap ke noonoo tina ngan ise le mai nga, ngan ole ipasuiu matenge. 16 Le ang di diek yo lok pang mai san nga, kin kakawai yang dook leu, ole nen ngan dada dook tiap ke noonoo ikaua lungunu yang.

17 Ngan so tina le imot yo dook mata nga, ngan ipa ke ete a isi. Moolmool, Tamada Maro ikap sokorai so tina paidi ye lo ponana ki. Ya in la tool yo ikarata ke le taudu inbe kanpitiki le tilolo lang katene i. Di ngan tilolo nen, bong kumata be eng tene iyakala matadi nga, ngan ole ni rur, lo ngan be eng tene ikoo ngan tilolo dook mulu. Bong Maro in nen tiap, yesoo ya in ipalele dada yo ki ngan tiap. 18 Ngan ya in itoo ya taunu lono, ngan la le ikaua yepongo paidi ye betanga moolmool yo ki i. Ngan iyei nen a be nen ngan tayei ya di natunu, inbe tamuku pang so tina le imot yo itar nga.

19 Ang di diek nga, ngan lomim tut ye so yo be awete pang nga. Ngan nanga, ang le imot katar talngamim dook ye longono betanga, bong be kawetewete nga, ngan katemim ro be, bong lomim kaua urata ye dook lo ngan be kawetewete. Inbe katemim malmal tarai be, 20 yesoo kate malmal kidi tooltool ngan ke be ilonidi a be nen ngan tayei tooltool noonoonoo dawa ben Maro lono be tayei, ngan tiap. 21 Nen le kagiri dada matana matana yo giri leu nga. Inbe dada dook tiap ke tana yo pompombe le alunu mata nga, ngan kakatte. Inbe ang tapmim katarang le kadu lopo ni a kayepe dook, inbe kaparama betanga ke Maro yo ipe lo lomim koot in. Ngan betanga tani in la be ikau ang a ipamulang ye so dook tiap yo be igarungang i.

22 Ngan nen le betanga tani yo kalonga koot i, in katoo. Bong kin kalonga le iken leu be. Ngan kumata be kalonga sokorai le iken leu nga, ngan ang tapmim ngan ben kakaua lungunu yang. 23 Yesoo, kumata tool atu be ilongo betanga ke Maro, bong be itoo tiap nga, ngan dawa ben tool yo ikamata matana ye tiroongoo i. 24 Ngan ya taunu ikamata a imot motong ila, ngan le palbe leu inbe lon kalli ben ya in matana belei nga. 25 Bong betanga ke Maro yo iru idi ye dada dook tiap ke noonoo yo iparamidi i, in dook mata kaiye. Le kumata be tool itar talngana dook ye betanga ke Maro inbe lon kalli tiap, bong itoo le ikenen leu nga, ngan Maro ole iyei urata dook mata panga ye dada dook mata ki tani.

26 Ngan nanga, kumata tool atu lon kaua urata be so yo iyei ngan ole Maro lon ponana ye, bong be ikap tutu koonoo dook ye betebetanga ki tiap nga, ngan ya taunu in ikaua lungunu ye. Inbe so yo iyei a be Maro lon ponana ye nga, ngan ben so sokorai. 27 Ngan nen le so yo be tayei a be nen ngan Tamada Maro lon ponana ye ngan nen. Ole matad kala di kakase yo be tinadi le tamadi timmata koot nga, inbe di garup yo tiyei tap nga, a be nen ngan talon di a tasolo moonoo yo be pombe pang ye di nga. Inbe so san mulu in nen, ole idi taudu takap tutidi dook, a be nen ngan dada dook tiap yo ke tana i nga, ngan ke be igarungidi le tiniidi giri leu ye Maro matana, ngan tiap. Le kumata be tayei dada nen nga, ngan Maro ole ikamatidi ben tiniidi igalanga inbe taukada busunu ye matana.