رُؤْيَا يُوحَنَّا ٱللَّاهُوتِيِّ
عُنوان هاد الكْتاب باللُغة الإغريقِيّة يَعني "يَكشَف". هاد الكْتاب يَهدَر على حاجات كانو مْخَبّيين ونْكَشفو.
والله أعلَم، نْدار كْتاب "الرُؤيا" مع الآخَّر مْتاع القَرن الأَوَّل بَعد الميلاد. في هَداك الوَقت، كان القَيصَر الروماني يْحَب يَنعبَد كي الإلَه والمَسيحِيّين كانو مَحڤورين، كايَن اللي صَبرو وكايَن اللي ما قَدروش.
هاد الكْتاب مْعَمَّر بالرُموز، اللي كانو يَقراوَه فالوَقت اللي نَكتَب فيه كانو يَفَّهموه. كايَن اللي يْشوفو باللي هاد الكْتاب مَكتوب للمَسيحِيّين اللي كانو مَحڤورين في هَداك الوَقت، وحَب الله يْبَيَّنَّلهُم باللي راهو رايَح يَهلَك الشَر والشَرّاني، وباللي واحَد ما يَقدَر يَمنَع وْعودو بسْلاك حْبابو باش يَتحَققو؛ وكايَن اللي يْشوفو باللي هاد الكْتاب، من الفَصل 4، يَهدَر على مُستَقبَل الكَنيسة والدَنيا.
كي تَقرا هاد الكْتاب تَحبَس تَلت مَرّات : • فالفُصول من 1 ل 3: تَلقا سَبع بْراوات لسَبع كْنايَس. هاد الكْتاب كامَل يَهدَر مع هاد السَبع كْنايَس. • فالفُصول من 4 ل 20: الكاتَب يَتَّرفَد للسْما، يْشوف حاجات ويَوصَفهُم. يْوَرّي مع الأوَّل كيفاش يَسوع يْخَلّي كْتوب العَهد القْديم يَنحَلّو ويَنفَهمو، ويْوَرّي تاني باللي بْشارة الإنجيل تْخُص كامَل الشُعوب. أومبَعد يَحكي على الحَرب الكْبيرة ضَد قُوّات الشَر. يَسوع الحَي يْبان في صِفة الخْروف وهُوَ اللي يَغلَب. • فالفُصول من 21 ل 22: تْشوف الخَلق الجْديد اللي يْوَجّدو الله. في هاد الخَلق، كايَن مْدينة، أورشَليم اللي تَهبَط من السْما هْدِيّة من عَند الله. هاد الزوج فْصول هومَ اللي يْكَمّلو الرُؤيا وهومَ اللي تَكمَل بيهُم خُطّة الله اللي بْدات فالبَدية مْتاع الكْتاب المْقَدَّس: فالتَكوين 3. 24، المَلايكة غَلقو الطْريق اللي تَدّي لسَجرة الحْياة؛ وفالرُؤيا 22. 2، سَجرة الحْياة راهي في وَسط المْدينة، ووْراقها يَشفيو الناس.
كْتاب الرُؤيا نَكتَب فالوَقت وين كان الشَر يْبان قْوي بَزّاف. هاد الكْتاب يْسَجَّع المومنين باش يْقاومو الشَر ويَستَنّاو نُصرة الله الأخرانِيّة.
1
1 وَحي يَسوع المَسيح اللي عْطاهولو الله باش يْبَيَّن لعْبادو الشي اللي رايَح يَصرا بالخَف، واللي بْعَت مْلاكو باش يْخَبَّر بيه عَبدو يوحَنّا، 2 اللي شْهَد بكَلمة الله وبشْهادة يَسوع المَسيح، كُل ما شاف. 3 يا سَعد اللي يَقرا واللي يَسَّمعو كْلام النُبوّة، اللي يَحَّفضو الشي اللي نْكتَب فيها، خاطَر الوَقت قْريب.
سْلام للسَبع كْنايَس
4 من يوحَنّا للكْنايَس السَبعة اللي في آسيا: نَعمة ليكُم وسْلام من عَند الكايَن واللي كان والجاي، ومن عَند الأرواح السَبعة اللي راهُم قُدّام عَرشو، 5 ومن يَسوع المَسيح، الشاهَد، الأمين، بْكَر اللي قامو من الموت ورايَس سْلاطَن الأرض، اللي يْحَبّنا وسَلَّكنا من دْنوبنا بدَمّو، 6 ورَدّنا مَملَكة، رْجال دين لإلَهو وباباه، ليه المَجد والقُوّة للدْوام؛ آمين.
7 هاو جاي مع السْحاب، كُل عين تْشوفو حَتّى اللي تَقبوه، ويْنوحو عليه كامَل قْبايَل الأرض. إيه، آمين.
8 أنا الألِف واليا، يْقول الرَب الإلَه، الكايَن واللي كان والجاي، القادَر.
البَدية مْتاع الرُؤيا
9 أنا يوحَنّا، خوكُم وشْريككُم فالتَجرُبة والمَلَكوت والصْبَر في يَسوع. كُنت فالجَزيرة اللي يْسَمّيوها بَطمُس علي جال كَلمة الله وشْهادة يَسوع. 10 كُنت فالروح في يوم الرَب، وسْمَعت مورايَ صوت قْوي كي صوت البوق، 11 يْقول: أكتَب واش تْشوف في كْتاب وأبَّعتو للكْنايَس السَبعة في آفسُس وسْميرنا وبَرغامَس وتِياتيرا وساردَس وفيلادَلفِيا ولاودِكِيّة.
12 دَرت باش نْشوف الصوت اللي كَلَّمني، وكي دَرت شَفت سْبَع شَندالات مْتاع الدْهَب، 13 وفي وَسط الشَندالات واحَد يْشَبَّه لبْنادَم، كان لابَس لْباس حَتّى للرَجلين ومْحَزَّم صَدرو بحْزام مْتاع الدْهَب، 14 راسو وشَعرو بْيَض كي الصوف البيضة، كي التَلج، وعينيه كي لْهيب النار، 15 رَجليه بْحال النْحاس، كي اللي راهو فالنار، وصوتو كي صوت ماء قوي، 16 عَندو في يَدّو اليْمنى سَبع نْجوم، وخارَج من فَمّو سيف قاطَع من زوج جْوايَه، ووَجهو يَبرَق كي الشَمس في قُوَّتها. 17 وكي شَفتو، طَحت عَند رَجليه كي المِيَّت. حَط يَدّو اليْمنى علِيَّ وقال: "ما تْخافش، أنا الأوَّل والآخَّر، 18 والحَي، كُنت مِيَّت وهاني حَي للدْوام، حاكَم مْفاتَح الموت ومَسكَن الموتى. 19 أكتَب الشي اللي شَفتو، اللي كايَن واللي رايَح يَصرا من بَعد. 20 لُغز النْجوم السَبعة اللي شَفتهُم في يَدّي اليْمنى والشَندالات السَبعة مْتاع الدْهَب: النْجوم السَبعة هومَ المَلايكة مْتاع الكْنايَس السَبعة، والشَندالات السَبعة هومَ الكْنايَس السَبعة.